Read Toraja-Sa'dan 2 SAMUEL 8 Bible Online

2 SAMUEL 8 - Toraja-Sa'dan bible

2 SAMUEL 8

¹Mangkato natalomi Daud tu to Filistin, napalumbangi baka direngnge’; narampai dio mai to Filistin tu kakuasan lan kota.

²Sia natalo duka tu to Moab, sia nasua mamma’ tungara diong padang, nasuka’i ulang; iake naalaoi ulang pesuka’ sipenduan, iamo dipatei, na iatu ganna’na sipissan ulang pesuka’, iamo dipatuo. Susimoto tu to Moab mengkanorong lako Daud sia umbaya’ sima.

³Sia natalo Daud tu Hadadezer, anakna Rehob, datu Zoba, tonna male umpasule kuasanna sae lako salu Efrat.

⁴Narampami Daud sangsa’bu pituratu’ tu pakkanarang sia to lumingkana duangpulo sa’bu sia napesuan Daud ungka’ta’i tu mintu’ ura’ lette’na darang kareta, apa iatu saratu’ napopa’elo’na.

⁵Saemi tu to Aram dio mai Damsyik la untundui Hadadezer, datu Zoba, apa natalo Daud tu to Aram, anna mate duangpulo sa’bu.

⁶Sia napao’ko’imi Daud surodadu ma’kampa lan tu ba’tu pira-pira tondok dio Aram lili’na Damsyik, anna lumbang baka direngnge’ tu to Aram lako Daud sia umbaya’ sima. Susimoto tu PUANG ungkamasei Daud kapataloan umba-umba nanii male.

⁷Naalami Daud tu mintu’ balulang bulaan, tu dio mintu’ surodadunna Hadadezer, nabaai lako Yerusalem.

⁸Na lan mai Betah sia Berotai, kotana Hadadezer, nanii Daud unnala tambaga bu’dak.

⁹Iatonna rangimi Tou, datu Hamat, kumua natalomo Daud tu mintu’ surodadunna Hadadezer,

¹⁰nasuami Tou tu Yoram, anakna, mennolo lako datu Daud, la umpekutanan kamalaga’-lagaranna sia umparampo passalama’ lako kalena, belanna nararii tu Hadadezer sia natalo belanna iatu Hadadezer tontong bang sirari Tou — ; nabaami Yoram tu ba’tu pira-pira pareanan salaka sia bulaan sia tambaga.

¹¹Napamarimbangammi datu Daud tu iannato lako PUANG sola tu mintu’ bulaan sia salaka tu napamarimbangan dio mai mintu’ bangsa, tu mangka napalumbang baka direngnge’;

¹²iamotu dio mai to Aram sia to Moab sia to Amon sia to Filistin sia to Amalek sia dio mai pangrampa dio mai Hadadezer, anakna Rehob, datu Zoba.

¹³Kaleleammi tu sanganna Daud tonna sulemo untalo to Edom diong Lombok Ma’sin, namate tau sangpulo karua sa’bunna.

¹⁴Sia napao’ko’i surodadu ma’kampa lan tu Edom; lan mintu’ tondok Edom napao’ko’i surodadu ma’kampa, naurunganni lumbang baka direngnge’ tu mintu’ to Edom lako Daud. Susimoto tu PUANG ungkamasei Daud kapataloan umba-umba nanii male.

¹⁵Iatonna datui Daud tu mintu’ to Israel, untoe katonganan sia kamaloloan lako mintu’ taunna.

¹⁶Iatu Yoab, anakna Zeruya, kamandang lompona surodadu sia Yosafat, anakna Ahilud, pa’paelean;

¹⁷sia Zadok, anakna Ahitub sia Ahimelekh, anakna Abyatar, to minaa sia Seraya iamo kapala to massura’;

¹⁸na iatu Benaya, anakna Yoyada, pangulunna to Kreti sia to Pleti sia iatu anakna muane Daud iamo to minaa.