Read Toraja-Sa'dan 2 SAMUEL 9 Bible Online

2 SAMUEL 9 - Toraja-Sa'dan bible

2 SAMUEL 9

¹Ma’kadami tu Daud nakua: Denparaka torro tu bati’na Saul, angku pogau’ kamasokanan lako kalena belanna Yonatan?

²Denmi misa’ tau lan tongkonan layukna Saul, disanga Ziba. Natambaimi tau mennolo lako Daud, anna ma’kada tu datu lako nakua: Ikomoraka Ziba? Mebalimi nakua: Io puang.

³Nakuami datu: Denparaka torro tu bati’na Saul, angku pogau’ kamaturu-turuanNa Kapenomban lako kalena? Ma’kadami tu Ziba lako datu, nakua: Denpa misa’ muane, anakna Yonatan, tu kupi’ patomali.

⁴Ma’kadami datu nakua: Umbara nanii? Mebalimi Ziba lako datu, nakua: Lan sia banuanna Makhir, anakna Amiel dio Lodebar.

⁵Mesuami datu Daud unnalai lan mai banuanna Makhir, anakna Amiel, dio mai Lodebar.

⁶Saemi tu Mefiboset, anakna Yonatan, anakna Saul mennolo lako Daud, sia tukku rokko padang anna menomba. Nakuami Daud: E Mefiboset. Mebalimi nakua: Io, Puang.

⁷Ma’kadami Daud lako kalena nakua: Da mumataku’, belanna inang la umpogau’na’ kamasokanan lako kalemu belanna ambe’mu, Yonatan, la kupasule nasang tu mintu’ pa’lakna nene’mu, sia tontong dukaki’ la kumande sola.

⁸Tukkumi menomba anna ma’kada nakua: Tau apara te taummi, ammi la umpessaileiri, anna butungna’ to misa’ asu mate?

⁹Mangkato natambaimi datu tu Ziba, taunna Saul, nama’kada lako nakua: Mintu’ tu apanna Saul sia mintu’ rapunna, kukamasean anakna puangmu Yonatan.

¹⁰La mukarangan tu pa’lak iato, iko sia anakmu muane sia mintu’ kaunammu, sia la muposara’ tu burana, anna kandei anakna puangmu. Iatu Mefiboset, anakna puangmu, la tontongna’ kumande sola. Iatu Ziba sangpulo lima tu anakna muane, anna duangpulo tu kaunanna.

¹¹Mebalimi tu Ziba lako datu nakua: Mintu’ tu kadanna puangku datu, kuturu’ nasang. Susimoto tu Mefiboset kumande sola Daud susi misa’ anak datu.

¹²Iatu Mefiboset den misa’ anakna muane bitti’pa disanga Mikha. Sia mintu’ tu to torro lan banuanna Ziba, taunna nasang Mefiboset.

¹³Susito torromi tu Mefiboset dio Yerusalem, belanna tontong kumande sola datu. Iatu lette’na kupi’ patomali.