Read Toraja-Sa'dan 1 DATU 15 Bible Online

1 DATU 15 - Toraja-Sa'dan bible

1 DATU 15

¹Iatonna ma’sangpulo karuamo taunna datu tu Yerobeam, anakna Nebat, dadimi datu tu Abiam umparenta to Yehuda.

²Tallung taun ma’parenta dio Yerusalem; na iatu indo’na disanga Maakha, anakna Abisalom.

³Naturu’ bang tu mintu’ kasalanna ambe’na, tu napogau’ ambe’na dolona, sia iatu penaanna tang lantuk langngan PUANG Kapenombanna, susi kalantukanna penaanna Daud, nene’ to dolona.

⁴Apa bannang dio Daud, anNa kamasei PUANG, Kapenombanna, misa’ palita lan Yerusalem, belanna Napabangun tu anakna ussondai sia Napabantang tu Yerusalem.

⁵Belanna napogau’mo Daud tu apa malolo dio pentiroNa PUANG sia tae’ anna sepang dio mai mintu’ apa Napasananni angge tuona, sangadinna ia manna tu penggauranna lako Uria to Het.

⁶Tontong bang tu kasirarianna Rehabeam na Yerobeam lan mintu’ allo katuoanna.

⁷Iatu tang dipokadannapa tu mintu’ tuna’na Abiam, sia mintu’ apa napogau’, tang tisura’moraka lan sura’ ossoranna mintu’ datu to Yehuda? Sia den bang tu kasirarianna Abiam na Yerobeam.

⁸Mangkato malemi tama batu dilobang tu Abiam sola nene’ to dolona, anna dipeliang lan kotana Daud, na Asa, anakna muane, ussondai dadi datu.

⁹Iatonna ma’duangpulomo taunna tu Yerobeam umparenta to Israel, dadimi datu tu Asa umparenta to Yehuda.

¹⁰Patangpulo mmisa taunna ma’parenta dio Yerusalem; iatu indo’na disanga Maakha, anakna Abisalom.

¹¹Iatu Asa umpogau’ apa malolo dio pentiroNa PUANG, susi Daud nene’na.

¹²Naula’i lan mai tondok tu mai to ma’gau’ sala dio to’ dipa’deatainna sia napembuangan tu mintu’ rapang-rapang dipodeata nagaragai nene’ to dolona.

¹³Moi na iatu Maakha, indo’na, natassu’i dadi datu baine, belanna unggaragai rapang-rapang megallian, iamotu Asyera. Nata’tak-ta’tak Asa tu rapang-rapang megallian iato sia naballa diong lombok Kidron.

¹⁴Apa iatu inan madao tu dinii memala’ tae’ nadiratoi. Moi susito iatu penaanna Asa lantuk lako PUANG lan mintu’ allo katuoanna.

¹⁵Nabaami tama banuanNa PUANG tu mintu’ apa napamarimbangan ambe’na lako Puang sia mintu’ apa tu ia kalena umpamarimbanganni lako Puang, iamotu salaka, bulaan sia ma’rupa-rupa pareanan.

¹⁶Tontong bang tu kasirarianna Asa na Baesa, datu to Israel, temponna ma’parenta.

¹⁷Iatu Baesa, datu to Israel, ke’de’ ullaoi to Yehuda, anna bentengi tu Rama, la unnampangi lalan, kumua da naden misa’ tau tassu’ sia tama umpennoloi Asa, datu to Yehuda.

¹⁸Attu iato naala nasangmi Asa tu mai salaka sia bulaan tu tinampena siapa lan bilik pangnannanna banuanNa PUANG sia iatu lan bilik pangnannanna banuanna datu, anna sorongi lako to mase’ponna, nasuai datu Asa lao umbaai lako Benhadad, anakna muane Tabrimon, anakna muane Hezion, datu to Aram, dio Damsyik, nakua:

¹⁹Den tu basse lan alla’ta, lan alla’na ambe’ku sia ambe’mi. Iate pamengan kupa’pea lako kalemi iamotu salaka sola bulaan. Ammi pokai tu bassemi sola Baesa, datu to Israel, kumua anna soro’ dio mai kaleku.

²⁰Napasiolami Benhadad tu kadanna datu Asa, anna suai tu pangulu rarinna ullaoi tu mai kota to Israel, natalomi tu kota Iyon sia Dan sia Abel-Bet-Maakha sia lili’na Kinerot sia mintu’ lili’na tondok Naftali.

²¹Iatonna rangimi Baesa tu iannato, nasoroi’mi umbenteng Rama, anna sule lako Tirza.

²²Napesuammi datu Asa unnarak mintu’ to Yehuda, moi misa’ tae’ tau torro; iatu batu sia kayu napake Baesa umbenteng Rama, nabaa nasang tau iato, na apa iamoto tu napake datu Asa umbenteng Geba lan lili’na Benyamin sia Mizpa.

²³Iatu tang dipokadannapa tu mintu’ tuna’na Asa, sia mintu’ kalalonganna sia mintu’ apa napogau’, sia mintu’ tondok nabenteng, tang tisura’moraka lan sura ossoranna mintu’ datu Yehuda? Iatonna matuamo, kambang patomalimi tu lentekna.

²⁴Mangkato malemi tama batu dilobang tu Asa sola nene’ to dolona, anna dipeliang lan kotana Daud, nene’ to dolona, lan liangna nene’ to dolona. Na Yosafat, anakna muane, ussondai dadi datu.

²⁵Iatu Nadab, anakna muane Yerobeam, dadi datu umparenta to Israel tonna taun ma’penduan kadatuanna Asa umparenta to Yehuda; umparentami to Israel duang taun.

²⁶Napogau’mi tu apa kadake dio pentiroNa PUANG. Urrundu’ bate lalanna ambe’na sia unturu’ tu kasalan napa’pesuan ambe’na lako to Israel umpogau’i.

²⁷Iatu Baesa, anakna Ahia, dio mai rapu Isakhar, umpaden kasiturusan la unneai. Napatei Baesa dio Gibeton, lili’ to Filistin, tonna patama limbui Nadab sola mintu’ to Israel tu Gibeton.

²⁸Napatei Baesa tonna taun ma’pentallunna tu Asa umparenta to Yehuda, anna ia dadi datu ussondai.

²⁹Iatonna mane mangka ma’parenta, napateimi tu mintu’ bati’na Yerobeam; tae’ nasesai tu kepenaanna dio lu Yerobeam, namangsanni nasang, susitu kada Napokada PUANG nalopian taunNa, iamotu Ahia, to Silo,

³⁰buntu tumangna mintu’ kasalan napogau’ kalena Yerobeam, sia kasalan napa’pesuan lako to Israel umpogau’i sia mintu’ penggauranna tu umpa’dikki penaanNa PUANG, Kapenombanna to Israel.

³¹Iatu tang dipokadanna tu mintu’ tuna’na Nadab, sia mintu’ apa napogau’, tang tisura’moraka lan sura’ ossoranna datu Israel?

³²Tontong bang tu kasirarianna Asa na Baesa, datu to Israel, temponna ma’parenta.

³³Iatonna taun ma’pentallunna Asa umparenta to Yehuda, dadi datumi tu Baesa, anakna muane Ahia, umparenta mintu’ to Israel duang pulo nna’pa’ taunna dio Tirza.

³⁴Napogau’mi tu apa kadake dio pentiroNa PUANG. Urrundu’ bate lalanna Yerobeam sia unturu’ kasalan napa’pesuan lako to Israel umpogau’i.