Read Toraja-Sa'dan 1 DATU 16 Bible Online

1 DATU 16 - Toraja-Sa'dan bible

1 DATU 16

¹Iatonna attu iato saemi tu kadanNa PUANG lako Yehu, anakna Hanani, tu diona kamandasanna Baesa, nakua:

²Tu belanna Kuangka’moko diong mai to’ barra’-barra’ angKu padadiko arungna taungKu to Israel, apa urrundu’moko bate lalanna Yerobeam sia ussua taungKu to Israel umpogau’ kasalan sia umpa’dikki penaangKu napobua’ mintu’ kasalanna,

³iamoto angKu la ummangsanni tu Baesa sola bati’na sia la Kupasusi bati’na Yerobeam, anakna Nebat, tu bati’mu.

⁴Minda-minda tu bati’na Baesa mate lan lu kota, iamo la nakande asu, na minda-minda mate dio lu padang, iamo la nasialai manuk-manuk dao lu langi’.

⁵Iatu tang dipokadannapa tu mintu’ tuna’na Baesa, sia mintu’ apa napogau’ sia kalalonganna, tang tisura’moraka lan sura’ ossoranna mintu’ datu Israel?

⁶Mangkato malemi tama batu dilobang tu Baesa sola nene’ to dolona, anna dipeliang dio Tirza na Ela, anakna muane, ussondai dadi datu.

⁷Sae dukami tu kadanNa PUANG lako Baesa sia mintu’ bati’na, tu nalopian nabi Yehu, anakna Hanani, belanna mintu’ kakadakean napogau’ dio pentiroNa PUANG sia belanna penggauranna tu umpa’dikki penaanNa Puang, naurunganni iatu kedona susi bati’na Yerobeam, sia belanna ia dukamo mangka umpatei tau iato mai.

⁸Iatonna taun ma’penduangpulo nnannan tu Asa umparenta to Yehuda, dadimi datu tu Ela, anakna Baesa, umparenta to Israel dio Tirza duang taun.

⁹Iatu Zimri, tu taunna, iamo umpangului sangsesena kareta parari, umpaden kasiturusan la unneai. Iatonna marassan mangiru’ dio Tirza lan banuanna Arza, pangulu sandan uai datu dio Tirza, namalango,

¹⁰tamami tu Zimri, naba’tai anna mate, tonna taun ma’penduangpulo mpitu tu Asa umparenta to Yehuda, na Zimri ussondai dadi datu.

¹¹Iatonna ma’parentamo anna unnisung dao isungan kapayungan, napatei nasangmi tu mintu’ bati’na Baesa, moi misa’ muane tae’ napatuoi, la iatu mai sangdadianna la iatu mai sangmanena.

¹²Susimoto tu Zimri ummangsanni mintu’ bati’na Baesa, susitu kadanNa PUANG, tu Napokada diona Baesa, nalopian nabi Yehu,

¹³buntu tumangna mintu’ kasalan napogau’ Baesa sola Ela, anakna, sia kasalan napa’pesuan lako to Israel umpogau’i, naurunganni iatu penggauranna tu tae’ bang gai’na umpa’dikki penaanNa PUANG, Kapenombanna to Israel.

¹⁴Iatu tang dipokadannapa tu mintu’ tuna’na Ela sia mintu’ apa napogau’, tang tisura’moraka lan sura’ ossoranna mintu’ datu Israel?

¹⁵Iatonna taun ma’penduangpulo mpitu tu Asa umparenta to Yehuda, dadimi datu tu Zimri dio Tirza pitung allo; tonna marassan tu to buda umpatama limbu Gibeton, lili’ to Filistin.

¹⁶Iatonna rangimi to buda tu umpatama limbu kota iato, kumua: iatu Zimri umpaden kasiturusan, sia mangka dukamo umpatei datu, naangka’mi mintu’ to Israel tu Omri, kamandang surodadunna to Israel dadi datu lan allo iato dio to’ inan nanii ma’tenda.

¹⁷Ke’de’mi tu Omri sola mintu’ to Israel dio mai Gibeton, anna patama limbui tu Tirza.

¹⁸Iatonna tiroi Zimri kumua ditalomo tu kota, malemi tama benteng tongkonan layuk, anna ballai tu tongkonan layuk daona lu, namate,

¹⁹buntu tumangna mintu’ kasalan napogau’, belanna napogau’ tu apa kadake dio pentiroNa PUANG sia urrundu’ bate lalanna Yerobeam sia unturu’ kasalan mangka napogau’ tonna pa’pesuanni lako to Israel umpogau’ kasalan.

²⁰Iatu tang dipokadanna tu mintu’ tuna’na Zimri sia iatu kasiturusan natampa tang tisura’moraka lan sura’ ossoranna mintu’ datu Israel?

²¹Attu iato tipa’duami tu to Israel; sangsese malang lako Tibni, anakna Ginat, la unnangka’i datu, na iatu sesena malang lako Omri.

²²Apa nasau’ buda to malang lako Omri na iatu to malang lako Tibni, anakna Ginat. Iatonna matemo tu Tibni, iamotu Omri ma’parenta.

²³Iatonna taun ma’pentallungpulo mmisa tu Asa umparenta to Yehuda, dadimi datu tu Omri umparenta to Israel, sangpulo dua taunna. Annan taunna ma’parenta dio Tirza.

²⁴Naallimi tu tanete Samaria da’dua talenta[8] salaka dio mai Semer, nabangunni tu kota dao tanete iato, nasangai Samaria, napasikona sanganna Semer, puangna tanete iato.

²⁵Iatu Omri umpogau’ apa kadake dio pentiroNa PUANG, mandu kadake anna iatu napogau’na mintu’ to dolona.

²⁶Urrundu’ mintu’ bate lalanna Yerobeam, anakna Nebat, sia unturu’ kasalan, napa’pesuan lako to Israel umpogau’i, naurunganni iatu penggauranna tu tae’ bang gai’na umpa’dikki penaanNa PUANG, Kapenombanna to Israel.

²⁷Iatu tang dipokadannapa tu mintu’ tuna’na Omri sia mintu’ apa napogau’ sia kalalonganna, tang tisura’moraka lan sura’ ossoranna mintu’ datu Israel?

²⁸Mangkato tamami batu dilobang tu Omri dipasola nene’ to dolona, anna dipeliang dio Samaria, na Ahab, anakna muane, ussondai dadi datu.

²⁹Iatonna taun ma’tallungpulo ngkarua tu Asa umparenta to Yehuda, dadimi datu tu Ahab, anakna Omri, umparenta to Israel. Iatu Ahab, anakna Omri, duangpulo ndua taunna umparenta to Israel dio Samaria.

³⁰Iatu Ahab, anakna Omri, umpogau’ apa kadake dio pentiroNa PUANG, mandu kadake anna iatu mintu’ to dolona.

³¹Iatu unturu’ kasalanna Yerobeam, anakna Nebat, maringnganpa, apa natompoi pole, belanna umpobaine Izebel, anakna Etbaal, datu to Sidon, sia male umpengkaolai Baal sia tukku umpenombai.

³²Napabendanammi Baal tu misa’ inan pemalaran lan banua Baal, tu nagaragai dio Samaria.

³³Sia nagaraga siapa Ahab tu lentong kayu dipodeata; napatarru’ bangmi Ahab tu penggauran susito, naurunganni umpa’dikki penaanNa PUANG, Kapenombanna to Israel, mandu pole’ na iatu mintu’ datu to Israel dolona.

³⁴Iatonna linona Ahab nabangun pole’mi Hiel, to Betel, tu kota Yerikho. Sisayurammi anak pa’bunga’na, iamo tu Abiram tonna parandanganni; sia sisayuran anak tampakna, iamotu Segub tonna pabendanni tu babangan — susi kadanNa PUANG tu mangka Napokada nalopian Yosua, anakna Nun.