Read Toraja-Sa'dan 1 DATU 18 Bible Online

1 DATU 18 - Toraja-Sa'dan bible

1 DATU 18

¹Iatonna masai allomo lan taun ma’pentallunna, rampomi tu kadanNa PUANG lako Elia, nakua: Maleko umpa’petiroan kalemu lako Ahab, belanna la Kupasaemo tu uran dao te kuli’na padang.

²Malemi tu Elia la umpa’petiroan kalena lako Ahab. Attu iato karorian pannang dio Samaria.

³Iamoto natambaimi Ahab tu Obaja, pangulu sandan uainna. Iatu Obaja, mengkaola tongan langngan PUANG.

⁴Belanna iatonna rabunni Izebel tu nabinNa PUANG, naala Obaja tu saratu’ nabi, anna bunii, silimangpulo lan ke misa’oi lo’ko’, anna parakai naben roti sola uai.

⁵Nakuami tu Ahab lako Obaja: Maleko sumalong lan lu tondok, dio lu to’ kalimbuang sia salu, umbai anta kabu’tui sia riu, anta patuopi te mai darang sia bagala’ sia da tapatei tu ba’tu pira-pira patuoan.

⁶Naborongannimi tu tondok la nasalongngi; iatu Ahab la unnola senga’, na iatu Obaja unnola senga’ duka.

⁷Iatonna marassan tu Obaja lumingka, pakalan nasitammu Elia; iatonna tandaimi tukkumi umpekatabe’i, nakua: Kamuraka te, puangku Elia?

⁸Mebalimi lako nakua: Io, akumo; laokomi umpokadanni puangmi, kumua: Inde sia to tu Elia.

⁹Apa nakua tu Obaja lako: Apara salaku te, ammi sorongra’ tama limanna Ahab, kumua anna pateina’?

¹⁰La lelukraka tuoNa PUANG, Kapenombammi, manassa tae’ tu misa’ bangsa sia kadatuan nasala nanii puangku ussua tau lako undaka’komi; ianna kuai tu tau iato mai, kumua: tae’ ia inde, nasuami tu bangsa sia kadatuan iato umpalao sumpa, kumua tae’ naappa’komi.

¹¹Na totemo mikua: Malekomi, pokadanni puangmi kumua: Inde sia to tu Elia.

¹²Iake malemo’ untampekomi, anna saemo tu PenaanNa PUANG umbaa senga’komi, na tae’ kutandai umba tu minii, sia iake rampomo’ umpokadanni Ahab, anna tae’ naappa’komi, manassa napateina’. Na iate aku taummi mengkaola bangna’ lako PUANG tempon bitti’ku.

¹³Tae’raka midipokadan tu apa mangka kupogau’ tonna patei nasangi Izebel tu nabinNa PUANG? Attu iato kubuni tu saratu’ nabinNa PUANG, limangpulo ke simisa’oi lo’ko’ sia kuparakai kuben roti sola uai.

¹⁴Na totemo mikua: Malekomi umpokadanni puangmi kumua: Inde sia to tu Elia. Manassa la napateina’.

¹⁵Nakuami tu Elia: La lelukraka tuoNa PUANGna mintu’ ma’dandan maritik, tu kupengkaolai, manassa la umpa’pekitananna’ kaleku te allo iate lako kalena.

¹⁶Malemi tu Obaja sitiro Ahab, anna parampoi lako, anna male tu Ahab umpessitammui Elia.

¹⁷Iatonna tiromi Ahab tu Elia, nakuami lako: Inderokoka te, e to umpamandasa to Israel?

¹⁸Mebalimi nakua: Tae’ kupamandasai tu to Israel, sangadinna kamu kalena sia sangdadianna ambe’mi, belanna umboko’ikomi pepasanNa PUANG, ammi pengkaolai tu mintu’ Baal.

¹⁹Totemo suai tu tau umpasirampun mintu’ to Israel langngan buntu Karmel lako kaleku, sia nabi Baal a’pa’ ratu’ llimangpulo sola nabi Asyera a’pa’ratu’ tu biasa kumande dio medana Izebel.

²⁰Napa’pesuammi Ahab tu mintu’ to Israel sirampun sia narampun duka tu mintu’ nabi langngan buntu Karmel.

²¹Attu iato napentireke’imi Elia tu mintu’ to buda, anna ma’kada nakua: Sangapaporokomi la lumingka sondo’ patomali? Iake PUANG tu Kapenomban, pengkaolaimi, ianna Baal, pengkaolaimi. Moi sangbuku kada tae’ napebalii to buda lako.

²²Nakuami tu Elia lako tau buda: Aku mannamo tinampe tu nabinNa PUANG, apa iatu nabinna Baal, a’pa’ ratu’ llimangpulo.

²³Totemo la mibenkan da’dua sapi laki, da’ito napilei tau iato mai tu taana misa’ sapi laki, anna ta’tak-ta’takki, anna palangnganni to’ kayu tu panta’tak iato, apa da napadukkui api; angku pasakka’ dukai tu misa’ sapi, angku patorroi dao to’ kayu sia tae’ duka angku la umpadukkui api.

²⁴Mangkato metambamokomi ussa’bu’ sanganna kapenombammi, na iatu aku la metamba dukana’ ussa’bu’ sanganNa PUANG. Na umba-umba tu Kapenomban mebali umbengan api, iamoto tu Kapenomban. Mebalimi tu mintu’ to buda nakua: Melomoto.

²⁵Nakuami Elia lako tu mai nabi Baal: La mipileimo tu anak sapi, ammi pasakka’i dolo, belanna budakomi kamu. Ammi metamba ussa’bu’i tu sanganna kapenombammi, apa da mipadukkui api.

²⁶Naalami tau iato mai tu sapi laki, tu nabenni Elia, anna pasakka’i, nametamba ussa’bu’ sanganna Baal tempon dio mai melambi’ sae lako ma’tangngana allo, nakua: O Baal, pebaliikanni! Apa tae’ tu gamara sia moi misa’ tau tae’ duka mebali. Unnondo-ondomi tu tau iato mai untikui inan pemalaran mangka nagaraga.

²⁷Iatonna ma’tangngamo allo natellemi Elia nakua: Metamba polekomi umpekapuai gamarammi, belanna kapenomban ia. Manassa marassanpa ma’tangnga’, ba’tu untoyanganpi kalena, ba’tu malepi lao; umbai naleppengpa, iamoto la ditundanpa.

²⁸Metambami tu tau iato mai, umpekapuai tongan gamaranna sia natori’-tori’ pa’dang sia doke tu mai kalena susitu ada’na, naurunganni umpentombang rara.

²⁹Iatonna lendu’ ma’tangngamo allo, marukkami kandeatan sae lako attu dinii memala’ bongi, apa tae’ tu gamara, sia moi misa’ tau tae’ duka mebali ba’tu umpalanni penaa.

³⁰Nakuami tu Elia lako mintu’ to buda: Mareke’komi mai. Sae nasangmi tu tau umpentireke’i. Napemeloi sule tu inan pemalaranNa PUANG, tu mangka disanggang.

³¹Naalami Elia tu batu sangpulo dua, pada tu bilangan sukunna anakna Yakub, tu mangka narampoi kadanNa PUANG, Nakua: Israel tu la sangammi.

³²Anna batu iato nagaragai inan pemalaran siindo’ sanganNa PUANG sia nakalo’i tiku lao tu inan pemalaran iato, silasa dipannii duang sea[9] banne.

³³Napasirundunanni tu kayu, nata’tak-ta’takki tu sapi laki anna patorroi dao to’ kayu iato.

³⁴Nakuami: Issii uai tu busso a’pa’, bolloi tu pemala’ ditunu pu’pu’ sia iatu kayu. Mangkato nakuami: Tolei susito. Napogau’mi ma’penduan. Mangkato nakuami: Tole pole’i. Napogau’mi ma’pentallun to,

³⁵naurunganni iatu uai lolong tiku lao dio to’ pemalaran, ondongpi naponnoi uai tu kalo’.

³⁶Iatonna lambi’mi attunna dinii memala’ bongi, tassu’mi tu nabi Elia dio tingayona to buda nama’kada nakua: O PUANG, Kapenombanna Abraham, Ishak na Israel, allo iate melo, ke payanni, kumua Kamumo tu Kapenomban dio lu to Israel, sia akumo tu taumMi, na iatu mintu’ apa kupogau’ te unturu’ kadamMi.

³⁷Pebaliina’, o PUANG! pebaliina’, anna issanni te tau buda, kumua Kamuri, o PUANG, Kapenomban, sia kumua Mipatibalikki tu penaanna tau iate mai.

³⁸Ta’kala songlo’mi dao mai tu apinNa PUANG, anna imbakanni nakande tu pemala’ ditunu pu’pu’ sia kayunna sia mintu’ batu sia litak, sia iatu uai diong kalo’ pura nalepa’i.

³⁹Iatonna tiroi to buda tu iannato, tukkumi sae rokko padang, nama’kada nakua: PUANG, Iamo Kapenomban, PUANG, Iamo Kapenomban.

⁴⁰Ma’kadami tu Elia lako tau iato mai nakua: Tingkanni tu mintu’ nabi Baal, moi misa’ tae’ nama’din lussu’. Natingkanmi anna solan nasangi Elia rokko salu Kison, napatei inde to.

⁴¹Undinnato ma’kadami tu Elia lako Ahab nakua: Malemokomi, kumande sia mangiru’, belanna denmo to ongngo’na uran kamban.

⁴²Malemi tu Ahab kumande sia mangiru’, apa iatu Elia male langngan botto Karmel, anna tukku rokko padang, lan alla’na guntu’na.

⁴³Nakuami tu Elia lako taunna: Maleko langngan, ammu tiroi tama tasik. Malemi tu taunna langngan untiroi, nakuami: Moi misa’ tae’ apa ditiro. Nakuami tu Elia: Male poleko. Susi bang to sae lako pempitu.

⁴⁴Iatonna ma’pempitumo, nakuami: Den salebu’ sama pala’ kendek diong mai tasik. Nakuami tu Elia: Laoko umpokadanni Ahab kumua: Mesuamokomi umpasakka’i tu darangmi dio lu kareta, ammi male rokko, da nakurungkomi uran.

⁴⁵Pakalan lan sangpekkappidian matari namalotongmo tu langi’, nakabu’ salebu’ sia angin, nasae tu uran kamban tongan. Na iatu Ahab malemo ma’kareta lako Yizreel.

⁴⁶Apa narondong limanNa PUANG tu Elia, anna beke’i tu aakna, nadolo dio olona Ahab sae lako lalan lu lako Yizreel.