Read Toraja-Sa'dan 1 DATU 19 Bible Online

1 DATU 19 - Toraja-Sa'dan bible

1 DATU 19

¹Iatonna pokadami Ahab lako Izebel tu mintu’ apa mangka napogau’ Elia, sia diona mintu’ nabi napatei pa’dang,

²nasuami Izebel tu misa’ tau umpokadanni Elia, kumua: nasanggangimira mintu’ deata sia la narangnganni pole’pa, ke tae’i namasiang attu susi duka te, angku pasusii sunga’na ke simisa’i tau iato mai tu sunga’mu.

³Iatonna issanmi Elia tu iannato, ke’de’mi anna male umpallaian kalena, narampo lako Bersyeba, lili’na Yehuda, anna patorroi dio tu taunna.

⁴Apa iatu ia, misa-misa male lako padang pangallaran, lan kalingkan sangallo, narampo unno’ko’ lako to’ garonto’ roten, anna kabariimi tu la mate sia nakua: Lendu’ masangku totemo! Alami tu sunga’ku, o PUANG, belanna iate aku tae’ angku mandu melo na iatu mai to doloku.

⁵Umbambangammi kalena, anna mamma’ diong to’ garonto’ roten. Ta’kala denmi misa’ malaeka’ urremme’i nama’kada nakua: Millikko, kumande.

⁶Iatonna messaile natiromi dao to’ ulunna, denmo tu pa’ranggina ditunu dao batu lalikan malassu sia gori-gori nanii uai lan; kumandemi sia mangiru’, anna bambangan kalena sule.

⁷Sae pole’omi tu malaeka’Na PUANG tonna ma’penduan, anna remme’i sia ma’kada nakua: Millikko kumande, kopako manii, belanna mambelapa tu lalanmu.

⁸Millikmi anna kumande sia mangiru’ na kande iate napomatoto’ lumingka patangpulo allona patangpulo bonginna sae lako buntunNa Puang Matua, iamotu Horeb.

⁹Urrampoimi misa’ lo’ko’, anna torro ma’bongi lan. Ta’kala saemi tu kadanNa PUANG lako kalena, Nakua: Ma’aparoko indete, Elia?

¹⁰Mebalimi nakua: Lendu’ tongan malallangna penaangku ungkilalai PUANG, Kapenombanna mintu’ ma’dandan maritik, belanna naboko’i mintu’ to Israel tu basseMi sia narondonni tu mintu’ inan pemalaramMi sia napatei pa’dang tu mintu’ nabimMi, na aku mannamo tinampe sia undaka’mo lalan la ungka’tu sunga’ku.

¹¹Ma’kadami nakua: Tassu’ko mai, ammu bendan dao buntu iate dio oloNa PUANG. Attu ia dukate, to ke la lendu’mi tu PUANG, manassa den angin bara’ sia talimpuru’, umpalalla buntu sia untesse buntu batu, undoloan PUANG. Apa tae’ tu PUANG lan talimpuru’ iato. Iatonna rapa’mo tu angin bara’, saemi tu lino’. Apa tae’ tu PUANG lan lino’ iato.

¹²Iatonna tae’mo tu lino’ bu’tumi tu api. Apa tae’ duka tu PUANG lan api iato. Iatonna tae’mo tu api, denmi tu angin mangiri’-iri’ pela’.

¹³Iatonna rangimi Elia, tu iannato, nabungku’mi bayu lamba’na tu lindona, tassu’mi anna bendan dio ba’ba lo’ko’. Pakalan saemi tu gamara nakua: Ma’aparoko indete, Elia?

¹⁴Mebalimi nakua: Lendu’ tongan malallangna penaangku ungkilalai PUANG, Kapenombanna mintu’ ma’dandan maritik, belanna naboko’imo mintu’ to Israel tu basseMi, sia narondonni tu mintu’ inan pemalaramMi sia napatei pa’dang tu mintu’ nabimMi, na aku mannamo tinampe sia undaka’mo lalan la ungka’tu sunga’ku.

¹⁵Ma’kadami tu PUANG lako Nakua: Suleko unnola lalanmu lako padang pangallaran Damsyik; iammu sae lako, tokkoi tu Hazael, dadi datu to Aram.

¹⁶Sia la mutokko tu Yehu, anakna Nimsi dadi datunna to Israel, na iatu Elisa, anakna Safat dio mai Abel-Mehola, la mutokko dadi nabi ussondako.

¹⁷Attu iato minda-minda tu tilendok dio mai pa’dangna Hazael, la napatei Yehu, na minda-minda tu tilendok dio mai pa’dangna Yehu, la napatei Elisa.

¹⁸Sia diona pa’poraiangKu natorropa dio lu to Israel tu tau pitungsa’bu, iamo mintu’ guntu’ tu tae’ bangpanamalinguntu’ dio tingayona Baal sia mintu’ lindo tu tae’ bangpa naudungi.

¹⁹Ke’de’mi tu Elia dio mai, anna appa’i tu Elisa, anakna Safat, marassan umpa’tengkoan sapi sangpulo dua ayokana naturu’i dio to’ ma’pessangpulo duanna. Iatonna lendu’imi Elia, nabuanganmi bayu lamba’na.

²⁰Natampemi Elisa tu mintu’ sapi, anna undi ma’dondo-dondo urrundu’ Elia nama’kada nakua: Elorampa’ dolo male urraka’ indo’ ambe’ku, kumane undi urrundu’komi. Nakuami tu Elia lako: Sulemoko, belanna apara tu mangka kupogau’ lako kalemu?

²¹Tibalikmi sule dio mai boko’na Elia anna alai tu sapi sangayoka, narere’i, anna tollo’i dao to’ kayu oongan sapi; iatu duku’ iato naben taunna, anna kumande tu tau iato mai. Mangkato ke’de’mi, naundi urrundu’ Elia sia ungkamayai.