Read Toraja-Sa'dan 1 DATU 2 Bible Online

1 DATU 2 - Toraja-Sa'dan bible

1 DATU 2

¹Iatonna la madomi’mo nalambi’ lampakna tu Daud, napasanmi lako Salomo, anakna, nakua:

²La malemo’ unnola lalanna mintu’ issinna lino, iamoto la batta’ko sia la tenko misa’ muane.

³Sia pogau’i tu mintu’ Natuntunna PUANG, Kapenombammu: iamotu unturu’ lalanNa sia ungkaritutui mintu’ apa Napondok sia pepasanNa sia atoranNa sia pangadaranNa, susitu mintu’ apa disura’ lan sukaran alukna Musa, ammu palolang marampa’i tu mintu’ apa mupogau’ sia mintu’ apa mukarang.

⁴Anna palanda’i PUANG tu pangallu’ tu mangka Napokada diona aku kumua: Iake nakaritutui meloi anakmu tu mai lalanna sia lolang maruru’ dio oloKu sia lantuk tu penaanna sia kalebu deatanna, manassa moi misa’ bati’mu tang la ka’tu unnisungi isungan kapayunganna Israel.

⁵Muissan dukai tu apa nagauranna’ Yoab, anakna Zeruya, iamotu apa nagauran da’dua pangulu rari to Israel, diona Abner, anakna Ner na Amasa, anakna Yeter, tu umba napakuanni umpatei sia napatibollo tu rarana susito lan tananan ra’, moi anna attu kasitaman, natombangmi rara iato tu salipi’na lan aakna sia sepatunna lan lentekna.

⁶La lolang kinaako, da mueloranni tu ubanna male marampa’ rokko lino to mate.

⁷Apa iatu mai anakna Barzilai to Gilead, la mutiroan kameloan, sia la sangisungangko sola kumande tu tau iato mai, belanna susito tu tau iato mai tonna sae umpessitammuina’, tongku mallai dio mai kakammu Absalom.

⁸Den siapa dio kalemu tu Simei, anakna Gera, to Benyamin dio mai Bahurim, tu untampakkina’ ropu tampak ropu mapassik tongan, tongku male lako Mahanaim; apa undinna to saemi lako randan salu Yordan untammuina’; iamoto angku palao sumpa lako kalena tete dio PUANG, kumua tae’ kula umpateiko pa’dang.

⁹Apa totemo da mueloranni tu salana tang diukung belanna misa’ko to kinaa; manassa muissan tu apa sipatu la mugauranni, kumua ammu parokkoi lino to mate tu ubanna sitombang rara.

¹⁰Malemi tu Daud tama batu dilobang sola nene’ to dolona, anna dipeliang lan kotana Daud.

¹¹Iatu Daud patangpulo taunna undatui to Israel; pitungtaun ma’parenta dio Hebron, anna tallungpulo ntallung taun dio Yerusalem.

¹²Unnisungmi tu Salomo dao isungan kapayunganna Daud, ambe’na, anna dipabantang tongan tu kadatuanna.

¹³Saemi tu Adonia, anakna Hagit, mennolo lako Batsyeba, indo’na Salomo; mekutanami tu Batsyeba, nakua: Lantuk siaraka tu kasaeammu? Mebalimi nakua: Io, lantuk sia.

¹⁴Mangkato, ma’kadami nakua: Den sangbuku kada la kuparampo lako kalemi. Mebalimi tu Batsyeba nakua: Pokadami.

¹⁵Nakuami: Miissan duka, kumua iatu kadatuan inang taaku sia pada nasangamo tu mintu’ to Israel kumua akumo la datu, anna membali kataananna adingku, belanna PUANGmo umpapatui.

¹⁶Totemo misa’ri tu apa kupalaku lako kalemi, da mitang umpasiolai. Mebalimi tu Batsyeba nakua: Pokadami.

¹⁷Ma’kadami nakua: Pokadanni datu Salomo — belanna tae’ anna tang umpasiolai tu palakummi — anna benna’ tu Abisag, to Sunem, kupobainei.

¹⁸Mebalimi tu Batsyeba nakua: Melomi; kupokadammira datu tu palakummu.

¹⁹Saemi tu Batsyeba lako datu Salomo la umparampoi lako datu tu diona apa napokada Adonia. Ke’de’mi tu datu la umpessitammui indo’na, anna tukku lako; unno’ko’mi tu datu dao isungan kapayunganna, anna mesua umbanni isungan tu indo’ kadatuan, anna unnisung dio kananna datu.

²⁰Ma’kadami nakua: Den kutungkanan lako kalemi apa bitti’ bangsia, da mitang umpasiolai te palakungku. Nakuami tu datu lako: Palakumi, indo’, tae’ angku la umpasisalai tu palakummi.

²¹Nakuami tu Batsyeba: La miben Adonia, kakammi, napobainei tu Abisag, to Sunem.

²²Mebalimi tu datu Salomo lako indo’na, nakua: Ma’apai anna Abisag manna, to Sunem, mipalakuan Adonia? Palakuan tarru’i te kadatuan, belanna kakangku, sia la ia la to minaa Abyatar la Yoab, anakna Zeruya.

²³Umpalaomi sumpa tu datu tete dio PUANG, nakua: Nasanggangimora’ Puang Matua sia la Narangnganni pole’pa, ke tae’i na kadanna kalena Adonia untumang sunga’na.

²⁴La lelukraka tuoNa PUANG, tu untokkona’ sia umpannisungna’ dao kapayunganna ambe’ku Daud, sia ungkamaseanna’ bati’ lan tongkonan layuk, susitu Naallu’, ke tae’i nadipatei bangsiamo tu Adonia allo iate.

²⁵Nasuami datu tu Benaya, anakna Yoyada, umba’tai anna mate.

²⁶Nakuami tu datu lako to minaa Abyatar: Maleko lako Anatot, lako to’ bela’mu, belanna to sipatu dukako la dipatei, apa tae’ kula umpateiko totemo, belanna iko tu umbulle pattinNa Puangta PUANG dio olona ambe’ku Daud sia belanna pada muperasai ambe’ku tu mintu’ kamaparrisan.

²⁷Natassu’imi Salomo tu Abyatar, kumua damo anna dadi to minaanNa PUANG; susimoto nanii umpalanda’i tu kadanNa PUANG, tu Napokada dolomo Puang diona bati’na Eli dio Silo.

²⁸Iatonna rampomo tu kareba iato lako Yoab — belanna iatu Yoab ma’mirringan lako Adonia, moi anna dolona tae’ anna ma’mirringan lako Absalom — mallaimi tu Yoab lu tama tendaNa PUANG, natoei tu tanduk inan pemalaran.

²⁹Napokadami tau lako datu Salomo kumua iatu Yoab mallai tama tendaNa PUANG, nabendan dio sa’de inan pemalaran. Nasuami Salomo tu Benaya, anakna Yoyada, nakua: Maleko ammu ba’tai.

³⁰Malemi tu Benaya tama to’ tendaNa PUANG, nama’kada lako Yoab nakua: Nakua kadanna datu: Tassu’ko. Mebalimi nakua: Tae’, la’bi’ mate indena’ te. Naparampomi Benaya tu kada iate lako datu, nakua: Susite tu kadanna Yoab sia susimote tu nabalianna’.

³¹Nakuammi datu: Pogau’mi susitu kadanna, ba’tai ammu lamunni, ammu sapui dio mai kaleku sia dio mai tongkonan layukna ambe’ku tu rara to tang sala tu napatibollo Yoab.

³²La Napasulean PUANG tu rarana dao botto ulunna, belanna mangka umba’ta sia umpatei pa’dang tu da’dua to malambu’ sia melo anna ia, tu tang naissan ambe’ku Daud, iamotu Abner, anakna Ner, pangulu rarinna to Israel sia Amasa, anakna Yeter, pangulu rarinna to Yehuda.

³³Susimoto tu rarana tau sola duai la dipasulean langngan botto ulunna Yoab sia langngan ulunna mintu’ lanto mimi’na sae lakona, apa iatu Daud sola mintu’ lanto mimi’na sia to lan banuanna sia isungan kapayunganna la unnappa’ kamarampasan dio mai PUANG tontong sae lakona.

³⁴Malemi langngan tu Benaya, anakna Yoyada, anna ba’tai namate, nalamunni tau dio to’ banuanna dio padang pangallaran.

³⁵Naangka’mi datu tu Benaya, anakna Yoyada, dadi kamandang lompo ussonda Yoab, anna to minaa Zadok ussonda Abyatar.

³⁶Mangkato mesuami tu datu umpopetambai Simei, anna kuanni kumua: Garagangko kalemu misa’ banua dio Yerusalem, ammu nii; da mutassu’ len lan mai la male umba-umba nii.

³⁷La muissan melo, kumua iake tassu’ lenko, ammu lamban salu Kidron, manassa la mateko dipongko na iatu raramu iko kalena urrengnge’i.

³⁸Mebalimi tu Simei lako datu nakua: Tonganna te kadammi; mintu’ kadammi la kududung. Torromi ba’tu pirang-pirang allo tu Simei dio Yerusalem.

³⁹Apa iatonna upu’mo tallungtaun, pakalan mallaimi tu da’dua kaunanna Simei lako Akhis, anakna Maakha, datu Gat; napokadami tau lako Simei nakua: Iatu kaunammi sola duai dio sia tondok Gat.

⁴⁰Ke’de’mi tu Simei, anna suai tu tau ullapikki keledainna, namale lako Gat umpessitiroi Akhis, la undaka’ kaunanna. Malemi dio mai tu Simei, anna solanni tu kaunanna dio mai Gat.

⁴¹Napokadami tau lako Salomo kumua iatu Simei sunmo lan mai Yerusalem male lako Gat, anna sule dio mai.

⁴²Mesuami datu untambai Simei, nama’kada tu datu lako nakua: Tang kusumparokoka tete dio PUANG sia kupakulu-kulu tonganko kumua: Ia bangsiato allo munii sun dio mai male umba-umba nii, la muissan kumua manassa la mate dipongkoko? Mukuami lako kaleku: Tonganna te kadammi, la kududung.

⁴³Iamoto ma’apai anna tae’ ammu karitutui tu sumpa tete dio PUANG sia pepasan mangka kupadudungangko?

⁴⁴Sia nakuapa tu datu lako Simei: Muissan duka sia tu mintu’ kakadakean — lan duka sia penaammu — tu mugauran ambe’ku Daud; totemo la Napasule PUANG langngan ulummu tu mintu’ kakadakeammu.

⁴⁵Apa na maupa’mora tu datu Salomo sia iatu isungan kapayunganna Daud la bantang tontong sae lakona dio oloNa PUANG.

⁴⁶Nasuami datu tu Benaya, anakna Yoyada, anna male umba’tai tu Simei, naurunganni mate. Dipabantangmi tu kadatuan tete dio limanna Salomo.