Read Toraja-Sa'dan 1 DATU 20 Bible Online

1 DATU 20 - Toraja-Sa'dan bible

1 DATU 20

¹Narampunmi Benhadad, datu to Aram, tu mintu’ surodadunna sia iatu datu duangpulo ntallu nasolan sola darang sia kareta. Ke’de’mi umpatama limbu Samaria, sia sirari pa’tondokanna.

²Nasuami tu ba’tu pira-pira to guling lu tama kota, lako Ahab, datu to Israel,

³umpokadanni kumua: Inde sia tu kadanna Benhadad: mintu’ salakamu sia bulaanmu, apangku nasang, susi dukato tu mai baine ballomu sia anak ballomu, apangku duka.

⁴Mebalimi tu datu to Israel nakua: Susitu kadammi, puangku datu, aku te taummina’ sia mintu’ tu mai apa kuampui.

⁵Mangkato sae pole’mi tinde to guling, anna ma’kada nakua: Inde sia tu kadanna Benhadad: Mangkamo kusua tu tau mati’ kumua: Iatu salakamu sia bulaanmu sia bainemu sia anakmu, inang la muben nasangna’.

⁶Apa masiang attu susite totemo, angku sua taungku lako kalemu, anna paressai tu tongkonan layukmu sia iatu mai banuanna to mase’ponmu, anna ala nasangi tu mintu’ apa tang namaseanna penaammu.

⁷Attu iato natambaimi datu to Israel tu mintu’ pekaamberan lan tondok, nama’kada nakua: Issanmi sia tiromi, kumua tau iate undaka’ bang kadake, belanna iatonna mangkamo ussua tau lako kaleku untuntun mintu’ anakku sia baineku sia mintu’ salaka sia bulaanku, tae’ra kupasisalai.

⁸Ma’kadami tu mintu’ pekaamberan sia mintu’ to buda lako datu, nakua: Da miperangii lenni sia da mipalaloi tu pa’porainna.

⁹Mangkato ma’kadami lako to gulingna Benhadad nakua: Inde sia tu la mipokada lako puangku datu: Iatu mintu’ apa mipokada dolo lako taummi, la kupogau’, apa iatu iannate, tae’mo kubela umpogau’i. Malemi sule tu to guling iato umparampoanni Benhadad te pebali iate.

¹⁰Mesua pole’mi tu Benhadad lako nakua: Nasanggangimora’ mintu’ deata sia la narangnganni pole’pa, ke la susinna iatu batu manisak dio Samaria sandai sisangraku’ tu mintu’ surodadu tu undi unturu’na’.

¹¹Apa mebali tu datu Israel nakua: Kuanni kumua: Minda-minda untakin pa’dangna, da namassattuan butung to manglossokan.

¹²Narangimi Benhadad te kada iate, tonna marassan unno’ko’ sangpangirusan tu mai datu lan tenda nama’kada lako mintu’ to mase’ponna, nakua: Tiangka’mokomi ullaoi! Ke’de’mi la ullaoi tu kota iato.

¹³Pakalan anna sae tu misa’ nabi umpentireke’i Ahab, datu to Israel, nama’kada nakua: Inde sia tu kadanNa PUANG: Mutiromoraka tu to buda mamak bang? Manassa allo iate Kusorongi tama limammu, ammu issanni kumua Akumo tu PUANG.

¹⁴Ma’kadami tu Ahab nakua: Mindara? Nakuami tu nabi: Inde sia tu kadanNa PUANG: Iamotu mai pia muane arungna lembang. Mekutanaomi tu datu nakua: Mindara tu la umparandukki ullaoi dolo? Mebalimi nakua: Kamu.

¹⁵Mangkato nabilangmi Ahab tu mai pia muane arungna lembang, den dua ratu’ tallungpulo ndua tau, namane umbilangi tu to buda, iamotu mintu’ to Israel, den pitungsa’bu.

¹⁶Tassu’mi tu tau iato mai tonna ma’tangnga allo, tonna marassan tu Benhadad unno’ko’ mangiru’ samalangona lan tenda sola tu mai datu, tallungpulo ndua, tu to untundui.

¹⁷Iatonna tassu’mo dolo tu mai pia muane arungna lembang, naparampomi to (ma’penniro) lako Benhadad, tu to nasuamo umpenniroi, nakua: Tassu’mo ba’tu pira-pira muane lan mai Samaria.

¹⁸Nakuami: Iake tassu’i tu tau iato mai la massikaelo, tingkan tuoi, sia iake tassu’i la parari, ke ma’dinni tingkan tuo dukai.

¹⁹Mane marassan to, tassu’mi tu mai pia muane arungna lembang, sia iatu mai surodadu undimo urrundu’i.

²⁰Pantan napateimi tu balinna, naurunganni mallai nasang tu to Aram naula’ to Israel. Na Iatu Benhadad, datu to Aram, ma’darang umpallaian kalena sola ba’tu pira-pira pakkanarang.

²¹Tassu’mi tu datu to Israel anna sanggangi tu ba’tu pira-pira darang sia kareta, sia papatean tongan dio lu to Aram.

²²Undinnato saemi tu nabi umpennoloi datu to Israel, anna ma’kada nakua: Melo ke mipamatoto’i tu kalemi, ammi tangnga’i sia la mitimbang apa tu la mipogau’, belanna taun pole la sae tu datu Aram ullaoi pole’komi.

²³Ma’kadami lako datu Aram tu mintu’ to mase’ponna, nakua: Iatu Kapenombanna tau iato iamotu kapenomban dao lu buntu; iamoto anna sau’kanni. Apa iake kirarii dio lu merrantena, manassa kitaloi.

²⁴Melo ke mipogau’i susite: Tassu’i tu mai datu dio mai pangka’na ungkamandangi surodadu ammi angka’i tu to maraa la ussondai.

²⁵Sia la mipasakka’ tu surodadummi sama budanna tu surodadu mangka rabun, sia darang sama budanna tu dolona sia kareta sama budanna to dolona, angki rarii sola nasang tu tau iato mai dio merrantena, tae’ angki tang la ussau’i. Napasiolami datu tu kadanna tau iato mai, napogau’i susito.

²⁶Iatonna taun pole’ to, napasakka’mi Benhadad tu mintu’ to Aram, anna ke’de’ lako Afek la sirari to Israel.

²⁷Dipasakka’ dukamo tu mintu’ surodadunna to Israel, sia dipasandai kinallo, anna ke’de’ male ullaoi to Aram. Ma’tendami tu to Israel sitingoan tau iato mai butung to duang tuntunan bembe’, apa iatu to Aram nasamboi bang tu rante.

²⁸Saemi tu taunNa Puang Matua mennolo nama’kada lako datu to Israel, nakua: Inde sia tu kadanNa PUANG: Belanna nakua tu to Aram, kumua iatu PUANG iamo Kapenomban dao lu buntu, tangia ia Kapenomban dio lu merrantena, iamoto angKu sorongi tu to buda tu mamak bang tama limammu, ammi issanni kumua Akumo tu PUANG.

²⁹Sitingoan bangmi lan pitung allo. Iatonna ma’pitung allomo randukmi sirari, anna taloi to Israel tu to Aram lan sangallo saratu’ sa’bunna to parari ma’lingka.

³⁰Na iatu tinampenapa mallai lako Afek, tama kota, anna tuanni rinding tembo’ tu tau duangpulo mpitu sa’bu tu torronapa. Attu iato rampo dukami Benhadad tama kota, anna mallai umpasilamban-lamban bilik.

³¹Ma’kadami tu mintu’ to mase’ponna datu lako, nakua: Kirangimo sola nasang kumua iatu mintu’ datu to Israel to masokan. Iamoto melo ke massambu’ karoro’kan sia ma’tali ulangkan ammi elorangkan sola nasang male umpennoloi datu to Israel, den sia manii upa’ anna katirinnai tu sunga’mi.

³²Massambu’ karoro’mi tu tau iato, sia napotali tu ulang; anna male umpennoloi datu to Israel. Ma’kadami lako nakua: Inde sia tu kadanna taummi Benhadad, nakua: Katirinnai dikka’ tu sunga’ku. Nakuami tu datu: Tuo siaparaka ia? Siulu’ku to.

³³Nakanassaimi tau iato tu tanda melo iate, namadomi’ unnarra’i tu kadanna, nakua: Tonganna iatu Benhadad siulu’na puangki. Nakuami tu datu: Malekomi untambai tu puangmi dio mai. Tassu’mi tu Benhadad sae umpessitiroi datu, anna pakendekki datu langngan kareta.

³⁴Ma’kadami tu Benhadad lako datu nakua: Iatu mintu’ tu narampa ambe’ku dio mai ambe’mi, la kupasulemo; sia dieloran dukakomi untanan pasa’ dio Damsyik, susitu natanan ambe’ku dio Samaria, sia la untananki’ misa’ basse angku messiman dio mai kalemi. Untananmi basse sola duai, anna eloranni Ahab male.

³⁵Attu iato ma’kadami tu misa’ passikola nabi lako solana tete dio kadanNa PUANG, nakua: Bambana’! Apa noka tu tau iato umbambai.

³⁶Ma’kadami lako nakua: Belanna nokako unturu’ kadanNa PUANG, manassa, iake mutampemo’, la den misa’ singa umpateiko. Iatonna tampemi naapparanmi misa’ singa anna patei.

³⁷Mangkato sitammuomi misa’ tau senga’ anna ma’kada nakua: Bambana’! Napemanduimi tau iato nabamba, anna bangke.

³⁸Malemi tu nabi iato, anna bendan dio lalan untayan datu, sia nabalili tu rupanna umbimbin matanna.

³⁹Iatonna lendu’ tu datu, metambami tinde nabi lako nakua: Iatonna tassu’ tu taummi anna tama kasirarian, ta’kala saemi misa’ tau untambaina’ lendu’, tu ussolan misa’ tau lako kaleku sia ma’kada nakua: Kampai te tau iate; ianna pa’de, moi umba-umba nakua, manassa sunga’mu la ussonda sunga’na, boko’ ke mubaya’na’ salaka misa’ talenta.[10]

⁴⁰Iatonna marassan lu lako lu dio mai masara’ tu taummi, pa’demi. Ma’kadami tu datu to Israel lako nakua: La susimoto tu kara’tasanna kara-karamu; iko kalena urra’ta’i.

⁴¹Natikaraimi tinde nabi unnalai tu pebimbin dio mai to’ matanna, anna tandai datu to Israel, kumua ia misa’i dio mai mintu’ nabi.

⁴²Ma’kadami tinde nabi lako datu, nakua: Inde sia tu kadanNa PUANG: Belanna murampanan male tu to Kupamanassa pepayu, iamoto iatu sunga’mu la ussonda sunga’na, sia bangsamu la ussonda bangsana.

⁴³Malemi sule tu datu Israel lako banuanna kumamu’dang sia sengke, anna rampo lako Samaria.