Read Toraja-Sa'dan 1 DATU 21 Bible Online

1 DATU 21 - Toraja-Sa'dan bible

1 DATU 21

¹Iatonna mangkamo tu mintu’nato dadimi susite. Iatu Nabot, to Yizreel unnampui misa’ pa’lak anggoro’ dio Yizreel sikadappi’ tongkonan layukna Ahab, datu Samaria.

²Ma’kadami tu Ahab lako Nabot nakua: Benna’ tu pa’lak anggoro’mu, angku nii untanan utan, belanna iatu pa’lak iato siamping banuangku; la kuben siako misa’ pa’lak anggoro’ sondana melo ia na iate; ba’tu iake musangai melo la kubaya’ doi’ lako kalemu tu allinna.

³Apa ma’kada tu Nabot lako Ahab, nakua: Napatoyangmira PUANG dio mai kaleku la ussorongi mati’ kalemi tu mana’ nene’ to doloku.

⁴Sulemi tu Ahab tama banuanna kumamu’dang sia sengke diona tu kada mangka napokada Nabot to Yizreel lako kalena, susite nakua: tae’ kula ussorongi lako kalemi tu mana’ nene’ to doloku. Umbambangammi kalena dao katindoanna, anna memboko’ bang sia manoka kumande.

⁵Attu iato saemi tu Izebel bainena lako kalena, anna ma’kada nakua: Ma’apari ammi kumamu’dang bangra sia manoka kumande?

⁶Mebalimi lako nakua: Dikua mangkamo’ sipa’kada-kada Nabot, to Yizreel sia kukua lako: Benna’ tu pa’lak anggoro’mu, kubaya’ doi’i tu allinna, ba’tu iake musangai melo, la kubenko misa’ pa’lak anggoro’ sondana. Apa mebali nakua: Tae’ kula ussorongi lako kalemi tu pa’lak anggoro’ku.

⁷Ma’kadami tu Izebel bainena lako, nakua: Kamu tu datu umparenta to Israel totemo! Millikkomi ammi kumande, pamatanai tu penaammi; aku la umbenkomi tu pa’lak anggoro’na Nabot, to Yizreel.

⁸Naoki’mi Izebel tu ba’tu pira-pira sura’ tete dio sanganna Ahab, anna ca’i peca’na Ahab, anna pa’peai tu sura’ iato lako mintu’ pekaamberan sia to kapua lan lu kotana, tu sangtondok Nabot.

⁹Inde sia tu kada lan sura’ iato, nakua: Metambakomi, anna ma’puasa mintu’ tau, ammi paunnisungi tu Nabot dao inan mala’bi’na dio olona to buda.

¹⁰Ammi paunno’ko’ da’dua to bulituk untingoi, la ussa’bii kumua: Umpa’kada solangi Puang Matua sia datu. Solanni lako salian kota, ammi tumbui batu samatena.

¹¹Napogau’mi sangtondokna, iamotu pekaamberan sia to kapua, tu torro lan kotana, susitu napesuanna Izebel lako, susitu disa’bu’ lan sura’ dipa’pea lako tau iato mai.

¹²Metambami anna ma’puasa mintu’ tau, anna paunnisungi tu Nabot dao inan mala’bi’na dio olona to buda.

¹³Attu iato saemi tu tau da’dua, iamotu to bulituk, unno’ko’ untingoi, anna sa’bii te to bulituk sola duai tu Nabot dio olona to buda, nakua: Ia tinde Nabot umpa’kada solangi Puang Matua sia datu. Nasolammi tau iato mai lako salian kota, anna tumbui batu samatena.

¹⁴Mangkato mesuami tu tau iato mai umpokadanni Izebel, kumua mangkamo tu Nabot ditumbui batu anna mate.

¹⁵Iatonna rangimi Izebel kumua matemo tu Nabot ditumbui batu, ma’kadami tu Izebel lako Ahab, nakua: Millikmokomi, alami mipoapai tu pa’lak anggoro’na Nabot, to Yizreel, iamotu pa’lak manoka umbenkomi dialli doi’, belanna iatu Nabot tae’mo natuo, sangadinna matemo.

¹⁶Iatonna rangimi Ahab, kumua matemo tu Nabot, millikmi tu Ahab, anna male lako pa’lak anggoro’na Nabot, to Yizreel, la unnalai napoapa.

¹⁷Attu iato saemi tu kadanNa PUANG lako Elia, to Tisbe, nakua:

¹⁸Ke’de’ko mumale lako sitammu Ahab, datu to Israel, tu torro dio Samaria; lanmo pa’lak anggoro’na Nabot, tu nanii male lako unnalai la napoapa.

¹⁹Ammu ma’kada lako kumua: Inde sia tu kadanNa PUANG: Mangkamorokoka papatean sia unnala duka mana’na tau? Sia la mukua duka lako kumua: Inde sia tu kadanNa PUANG: Iatu inan nanii asu mangka ullepa’i rarana Nabot, dio duka inan iato la nanii asu ullepa’i tu raramu.

²⁰Nakuami Ahab lako Elia: Mukabu’tuimora’ka, e ualingku? Nakuami tu Elia: Tonganna kukabu’tuimokomi, belanna umbalukmokomi kalemi umpogau’ apa kadake dio pentiroNa PUANG.

²¹Nakua kadanNa Puang: Manassa la Kuparampoiko kamandasan, sia la Kuputtaiko sia iatu muane, bati’na Ahab la Kumangsanni la to mala’bi’na la to bitti’na dio lu to Israel.

²²Sia iatu bati’mu la Kupasusi bati’na Yerobeam, anakna Nebat, sia Kupasusi bati’na Baesa, anakna Ahia, belanna mupabu’tu tu pa’dik penaa, napobannang to Israel umpogau’ kasalan.

²³Sia ia duka tu diona Izebel nakua kadanNa PUANG: La nakande asu tu Izebel dio to’ benteng tembo’ salianna Yizreel.

²⁴Minda-minda tu bati’na Ahab lan lu kota la nakande asu, na minda-minda tu mate dio lu padang, la nakande manuk-manuk dao lu langi’.

²⁵Inang tae’ lenpa tau susi Ahab umbaluk kalena la umpogau’ kadake dio pentiroNa PUANG, belanna nasede Izebel, bainena.

²⁶Iatu gau’na megallian liu, belanna mengkaola lako deata, lan mintu’na tu napogau’ to Amori, tu Naula’i PUANG dio mai olona to Israel.

²⁷Iatonna rangimi Ahab tu mintu’ kada iate, nase’bu-se’bumi tu tamangkalena, anna potamangkale karoro’, sia ma’puasa; ondongpi umbambangan kalena mennammu’ karoro’ sia napela’-pela’ lumingka.

²⁸Attu iato saemi tu kadanNa PUANG lako Elia, to Tisbe, nakua:

²⁹Mutiromoraka, kumua iatu Ahab umpamadiongan kalena dio oloKu? Belanna umpamadiongammo kalena dio oloKu, iamoto natae’ angKu la umparampoi kamandasan ke tuopi, sangadinna angge tuonapi anakna muane, Kumane umparampoi kamandasan tu bati’na.