Read Toraja-Sa'dan 1 DATU 4 Bible Online

1 DATU 4 - Toraja-Sa'dan bible

1 DATU 4

¹Iatu datu Salomo umparenta lili’na mintu’ Israel.

²Inde sia tu mintu’ to diala parea dio kalena: Azarya, anakna Zadok, tu to minaa,

³Elihoref sia Ahia anakna Sisa, pangulu to massura’; na Yosafat, anakna Ahilud tu pa’paelean,

⁴na Benaya, anakna Yoyada, tu kamandang lompo; na Zadok sola Abyatar to minaa;

⁵Azarya, anakna Natan, pangulu to maraya; na Zabut, anakna Natan, misa’i to minaa, tu sangmanena datu;

⁶na Ahisar tu pangulu sandan uainna datu, sia Adoniram, anakna Abda, kapalana to umpasirundunan pa’diaman lompo.

⁷Sia den dukato marayanna Salomo sangpulo dua lan mintu’ lili’na Israel tu la umpoissan kandena datu sia tongkonan layukna; sisangbulan lan sangtaun la untu’gun kandena datu.

⁸Inde sia tu sanganna, iamotu: Ben-Hur dao buntu Efraim;

⁹na Ben-Deker, dio Makas sia dio Saalbim,

¹⁰sia dio Bet-Semes sia dio Elon-Bet-Hanan; na Ben-Hesed dio Arubot, naparenta dukapa Sokho sia mintu’ lili’na padang Hefer;

¹¹na Ben-Abinadab umparenta Dor tu mentanetena, iamoto tu umpobaine Tafat, anakna Salomo;

¹²na Baana, anakna Ahilud umparenta Taanakh sia Megido sia mintu’ lili’na Bet-Sean, dio sa’dena Sartan, rokkona Yizreel, randuk dio mai Bet-Sean sae lako Abel-Mehola, tu’tun dio lakona Yokmeam;

¹³na Ben-Geber dio Ramot dio Gilead, tu umparenta mintu’ tondokna Yair, anakna Manasye dio Gilead sia mintu’ lili’na Argob dio Basan, annanpulona kota kapua tu dirinding tembo’ sia disalli’ tambaga;

¹⁴na Ahinadab, anakna Ido, dio Mahanaim,

¹⁵na Ahimaas dio Naftali; ia duka umpobaine anakna Salomo, disanga Basmat;

¹⁶na Baana, anakna Husai, dio Asyer sia Alot;

¹⁷na Yosafat, anakna Paruah dio Isakhar,

¹⁸na Simei, anakna Ela, dio Benyamin;

¹⁹na Geber, anakna Uri, dio lili’na Gilead, parentana Sihon, datu to Amori, sia Og, datu Basan, sia ia manna to maraya dio tondok iato.

²⁰Iatu bilangan to Israel sia to Yehuda susi karangan dio biring tasik budanna; iatu tau iato mai kumande sia mangiru’ sia parannu-rannu.

²¹Iatu datu Salomo umparenta mintu’ kadatuan randuk dio mai salu Efrat sae lako tondok to Filistin, landa’ lako lili’na Mesir; iatu tau iato mai ma’kasian sia mengkaola lako Salomo lan mintu’ allo katuoanna.

²²Iatu kandena Salomo lan sangallo den tallungpulo koro’[1] ta’pung manissang na annan pulona koro’ ta’pung.

²³Sangpulo sapi malompo, duangpulo sapi dikambi’, saratu’ domba, senga’pa tu mintu’ donga sia kijang sia anuang sia angsa malompo.

²⁴Belanna naparenta datu tu mintu’ lili’ indena mai salu Efrat, randuk dio mai Tifsah sae lako Gaza, iamotu mintu’ datu indena mai Salu, anna marampa’ tu datu tiku lao.

²⁵Mintu’na to Yehuda sia to Israel, torro tang nairi’ angin diong to’ garonto’ anggoro’na sia garonto’ arana randuk dio mai Dan sae lako Bersyeba, angge tuona datu Salomo.

²⁶Den duka naampui Salomo tu barung nanii patangpulo sa’bunna darang urriu’ karetana datu sia sangpulo dua sa’bu pakkanarang.

²⁷Sia mintu’ to maraya, ke nalambi’oi tu bulanna, umpasakkaran kandena datu sia mintu’ to untarima kande dio mai datu Salomo, naurunganni tae’ misa’ naerean.

²⁸Sia dalle sisikan sia dalame tu diben darang pangriu’ sia darang malinta’ dibaa lako inan dipamanassamo, pantan unturu’ apa dipapassananni.

²⁹Sia Naben Puang Matua kakinaan tu Salomo sia kamatarrusan kapua tongan sia kapaissanan maluangan susi bungin dio randan tasik,

³⁰naurungan iatu kakinaanna Salomo mandu kapua anna kakinaanna to dio lu rampe matallo sia mintu’ kakinaanna to Mesir.

³¹Mandu kinaa ia anna mintu’ tau sia anna Etan, to Ezrahi, sia Heman sia Kalkol sia Darda, anakna Mahol, naurungan tarompo’ tu sanganna dio lu mintu’ bangsa tiku lao.

³²Nasa’bu’ tu tallungsa’bu kada peada’ na iatu mintu’ sengona sangsa’bu llimang lise’.

³³Sia nasa’bu’ duka tu diona mintu’ kayu, randuk dio mai kayu arasi’ dao Libanon sae lako kayu supa, tu tuo dio rinding tembo’; sia nasa’bu’ duka tu diona mintu’ patuoan, manuk-manuk, olo’-olo’ mendonglo’ sia mintu’ bale.

³⁴Sia dio mai mintu’ bangsa pantan sae tau la umperangii kakinaanna Salomo, sia pesuanna mintu’ datu lan lino tu umpekarebai tu diona kakinaanna.