Read Toraja-Sa'dan 1 DATU 5 Bible Online

1 DATU 5 - Toraja-Sa'dan bible

1 DATU 5

¹Nasuami Hiram, datu Tirus tu pesuanna lako Salomo, belanna narangi, kumua iatu Salomo ditokko mendadi datu la ussonda ambe’na, belanna iatu Hiram tontong sisangmane karra’ Daud.

²Nasuami Salomo tu tau lako Hiram, nakua:

³Miissan, kumua iatu ambe’ku Daud tae’ anna belai umpabendananni banua tu sanganNa PUANG, Kapenombanna, napobua’ mintu’ kasirarian tu napatingoanni tau tiku lao sae lako Napatunduk PUANG tu tau iato mai diong to’ lentekna.

⁴Apa totemo Nakamaseina’ PUANG, Kapenombangku, kamarampasan tiku lao, natae’ tau kusiualian sia tae’ kapangean sia tae’ kamandasan.

⁵Manassamo kusanga la kupabendanan banua tu sanganNa PUANG, Kapenombangku, susitu kadanNa PUANG lako ambe’ku Daud Nakua: Iatu anakmu tu la Kupaunnisung dao isungan kapayungammu ussondako, iamo la umpabendananni banua iato tu sangangKu.

⁶Iamoto suai tu mai tau lao ullellenganna’ kayu arasi’ dao Libanon, sia da’ito natundui taummi tu taungku, sia iatu sarona taummi la kubaya’ pada tu mipokadanna, belanna miissan kumua tae’i misa’ tu taungku manarang manglelleng kayu susito Sidon.

⁷Iatonna rangimi Hiram tu kadanna Salomo, sende tonganmi, nama’kada nakua: Mintu’na kadipudian lu lako PUANG te allo iate, tu mangka ungkamasean Daud misa’ pia muane kinaa la umparentai te bangsa kapua iate.

⁸Kurangimo tu apa misua tau umpokadanna’; la kupogau’ nasang tu pa’poraiammi diona tu kayu arasi’ sia kayu sendana.

⁹Mintu’ taungku la umbaai dao mai Libanon rokko tasik, angku a’ga raki’i lan tasik, sia kusombaranni lako inan tu la mipamanassanna’, anna dibukai inde to dio, ammi ma’din unnalai. Apa iatu kamu la minturu’ tu palakungku, iamotu la miben kande tu to lan tongkonan layukku.

¹⁰Susito nabenmi Hiram kayu arasi’ sia sendana tu Salomo sama tu naanga’na.

¹¹Nabenmi Salomo duangpulo sa’bu koro’[2] gandung tu Hiram la napokande tau lan tongkonan layukna sia duangpulo koro’ minna’ saitun dilambuk; iate napa’bengan Salomo lako Hiram ke taunoi.

¹²Nakamaseimi PUANG kakinaan tu Salomo susitu Naallu’ lako kalena; denmi kasikaeloanna Hiram sola Salomo sia untanan duka misa’ basse sola duai.

¹³Mesuami tu datu Salomo unnarak tau dio mai mintu’ to Israel la ma’diama; iatu to diarak den tallungpulo sa’bunna.

¹⁴Nasuami datu tu tau iato mai male langngan Libanon, sisangsa’bu lan sangbulan sisonda-sonda; sangbulan dao Libanon, anna duang bulan dio banua. Adoniram ungkapalai tu pa’diaman iato.

¹⁵Ondongpito, den tu to mamullena datu pitungpulo sa’bu na karua pulona sa’bu to ma’pa’ batunna dao lu padang ma’buntunna.

¹⁶Senga’pi to tu pangulu mantari’na Salomo tu untiro pa’diaman, tallungsa’bu ntalluratu’, tu ungkapalai mintu’ to undiamai tu pa’diaman iato.

¹⁷Sia nasua datu tu tau umpa’ batu kapua, iamotu batu maballo, anna batu dipa’ dipoparandangan banua iato.

¹⁸Mintu’ pandena Salomo sia mintu’ pandena Hiram sia to Gibal untara kayu sia umpa’ batu sia napasirapa’ melo tu apa iato la umbangunni tu banua.