Read Toraja-Sa'dan 1 DATU 8 Bible Online

1 DATU 8 - Toraja-Sa'dan bible

1 DATU 8

¹Iatonna attu iato narampunmi Salomo tu mintu’ pekaamberanna to Israel sia mintu’ pangulunna sukunna, iamotu to paa dio lu tongkonanna to Israel, mennolo lako datu Salomo dio Yerusalem, la umbaai langngan tu patti basseNa PUANG diong mai tondokna Daud, iamotu Sion.

²Ma’rampunmi tu mintu’ muane to Israel lako datu Salomo, la umpakaraya pa’gauran lan bulan Etanim, iamotu bulan ma’pempitu.

³Iatonna sae nasangmo tu pekaamberanna to Israel, naangka’mi mintu’ to minaa tu patti,

⁴anna baai langngan tu pattinNa PUANG sia Tenda Kasitammuan sia mintu’ pareanan maindan tu lan tenda iato; iatu umbaai langngan iamotu mintu’ to minaa sia to Lewi.

⁵Iatu datu Salomo sia mintu’ kasirampunan to Israel, tu sirampun lako kalena dio tingayo patti, umpemalaran domba sola sapi tu tang dikemba’ diia’ sia dibilang diona kabudanna.

⁶Iatu patti basseNa PUANG nabaa to minaa tama inanna, iamotu bilik dio boko’ lan banua iato, iamotu bilik tarru’ maindan diongna lu pani’ karubion.

⁷Belanna iatu karubion umballa’ pani’na patomali dao inan patti iato, naurungan iatu karubion ussamboi dao mai tu patti iato sola pebullena.

⁸Iatu pebulle iato kalando tongan, naurunganni kaanan tu tampakna dio mai bilik maindan dio tingayo bilik dio boko’, apa tae’ natiroi tau dio mai salian; iatu apa iato tontong dio sae lako allo totemo.

⁹Tae’ bang apa senga’ lan patti iato, sangadi papan batu da’dua tu napalan Musa dao Horeb, iamotu papan batu basse, tu natanan PUANG sola to Israel, tonna tassu’ tu tau iato mai lan mai tondok Mesir.

¹⁰Iatonna tassu’mo tu mintu’ to minaa lan mai banua maindan lako salian, nasitutu’imi sangkombong salebu’ tu banuanNa PUANG,

¹¹naurunganni tae’ natananni tu mintu’ to minaa bendan menomba, diona salebu’ iato, belanna naponnoi kamala’biranNa PUANG tu banuanNa PUANG.

¹²Ma’kadami tu Salomo nakua: Napokadamo PUANG kumua la torro lan kamalillinan.

¹³Kupasundunmo umbangunni tu banua iato, tu Minii torro, iamotu misa’ inan matontongan tu Minii torro sae lakona.

¹⁴Mangkato menggirikmi tu datu, anna passakkei tu mintu’ kombongan to Israel, tonna bendan tu mintu’ kombongan to Israel.

¹⁵Sia ma’kada nakua: Mintu’ kadipudian lu langngan PUANG, Kapenombanna to Israel, tu mangka umpasundunni tu apa mangka Nasa’bu’ randan dipudukNa lako Daud, ambe’ku, Nakua:

¹⁶Randuk dio mai allo Kunii ussolan taungKu sun lan mai Mesir, tae’ angKu pilei langsa’i tu misa’ kota dio lu mintu’ sukunna to Israel, la dinii umbangunni tu misa’ banua, kumua anna nii sangangKu lan, sangadinna Kutonno’ bua kayumo tu Daud la umpangului tu taungKu Israel.

¹⁷Bu’tumi lan penaanna Daud, ambe’ku, la umbangunanni misa’ banua tu sanganNa PUANG, Kapenombanna to Israel.

¹⁸Nakuami PUANG lako Daud, ambe’ku kumua: Bu’tumo lan penaammu la umbangunanni banua tu sangangKu, melo to, belanna den bu’tu susito lan penaammu.

¹⁹Apa tae’ nala iko la umbangunni tu banua iato, sangadinna anakmu muane tu bu’tu dio mai kalemu, iamo la umbangunanni banua tu sangangKu.

²⁰Naparampo randannamo PUANG tu kada mangka Napokada, belanna tunannangmo’ ussonda Daud, ambe’ku, sia unnisungmo’ dao isungan kapayunganna Israel, susitu kadanNa PUANG, sia iate banua iate kubangunammo sanganNa PUANG, Kapenombanna to Israel.

²¹Sia kupasakkarammo misa’ inan tu patti, tu nanii basseNa PUANG, tu Natanan sola nene’ to dolota, tonna solanni tu tau iato mai tassu’ lan mai tondok Mesir.

²²Bendanmi tu Salomo dio tingayo inan pemalaranNa PUANG sitingoan mintu’ kombongan to Israel, anna mempala’ langngan langi’.

²³Sia ma’kada nakua: O PUANG, Kapenombanna to Israel, tae’ tu Kapenomban senga’ sangadinna Kamu manna, la lan langi’ dao la dao kuli’na padang diong, tu umpalanda’ basseMi sia kamasokanamMi lako taumMi, tu lantuk penaanna lolang dio oloMi.

²⁴Sia tu umpalanda’i lako taumMi Daud, ambe’ku, tu apa mangka Mipokadanni, ondongpi Mipasundunmo tu apa mangka nasa’bu’ randan dipudukMi, susite allo totemo.

²⁵Na totemo, o PUANG, Kapenombanna to Israel, palanda’mi tu apa mangka Mipokada lako taumMi Daud, ambe’ku, kumua: Tae’ anna ka’tu len tu bati’mu dio oloKu la unnisungi isungan kapayunganna Israel, podo ke ungkaritutui lalanna tu anakmu muane sia lolang dio oloKu susi kalolangammu dio oloKu.

²⁶Na totemo, o Kapenombanna to Israel, denno upa’ narampo randanna tu kada, tu mangka Mipokada lako taumMi Daud, ambe’ku.

²⁷Apa tongannaraka tu Puang Matua torro dao kuli’na padang? Iatu langi’, moi na iatu langi’ ma’iringanna dao, tae’ anna kullei unnalaKomi, apa pole’pa te banua iate tu mangka kubangun.

²⁸Sailei te passambayangna sia pengkamoyana taumMi, o PUANG, Kapenombangku, sia perangii tu petamba sia passambayang, tu napennoloan taumMi dio oloMi;

²⁹kumua Mitiroi allo bongi te banua iate, iamotu inan tu mangka Mipokada kumua: Iatu sangangKu la inde to dio — amMi perangii tu passambayang, tu la napennoloan taumMi lan inan iate.

³⁰Perangii tu pengkamoyana taumMi sia taumMi to Israel, tu la napennoloan lan inan iate. Manassa la Miperangii sia lan mai inan Minii torro, iamotu dao suruga; sia iamMi rangimi, la Mipa’dei tu kasalangki.

³¹Iake denni misa’ tau kasalan lako solana, anna suai solana menggata, kumua naruai tampak ropu sia sae menggata dio tingayo inan pemalaramMi lan banua iate,

³²la Miperangii dao mai suruga, sia Mipogau’i to sia la Mipaolai salunna tu taumMi, amMi pasalai tu to sala sia Mipasule langngan botto ullunna tu penggauranna, amMi sanda-tonganni tu to tongan sia Mipapakkanni sitinaya kamalamburanna.

³³Iake nataloi ualinna tu taumMi to Israel, belanna kasalan tu tau iato mai lako Kalemi, anna mengkatoba’ lako Kalemi unnaku sangamMi sia massambayang sia mengkamoya lako Kalemi lan banua iate,

³⁴la Miperangii dao mai suruga sia pa’dei tu kasalanna taumMi to Israel sia pasulei tu tau iato mai tama tondok, tu mangka Mikamasean nene’ to dolona.

³⁵Iake titutu’i tu langi’, naurunganni tae’ uran sae, belanna kasalammo tu tau iato mai lako Kalemi, anna massambayang lan inan iate unnaku sangamMi sia natobaran tu salana, belanna Mipopengkadiongammo,

³⁶attu iato la Miperangii dao mai suruga sia la Mipa’dei tu kasalanna taumMi sia taumMi to Israel — belanna Mipatuduan lalan melo tu tau iato mai tu sipatu la naolai — sia Mipasaean uran tu padang, tu mangka Mikamasean taumMi la napomana’.

³⁷Iake ra’pak padangi lan tondok iato ba’tu denni ropu, ba’tu pasianni ba’tu langkoi tu gandung, ba’tu denni batik sola nango; ba’tu napapusa’i ualinna tu tau iato mai lan lu mintu’ kota dio lu tondokna, ke saei tu sala umbanna parri’ ba’tu saki,

³⁸ba’tu umba-umbanna passambayang ba’tu ia duka tu pengkamoya tu la napennoloan ba’tu minda-mindannai tu mintu’ taumMi to Israel, belanna pantan natandai tu kapussakanna penaanna, naurunganni mempala’ lan banua iate,

³⁹perangii dao mai suruga, inan matontongamMi sia pa’dei kasalanna sia da Mipopa’elo’na bangi sia pantan Mipapakkanni sitinaya mintu’ kedona, saba’ Mitandai tu penaanna — belanna Kamu manna untandai tu penaanna mintu’ ma’rupa tau — ,

⁴⁰anna kataku’Komi tu tau iato mai lan mintu’ allo angge tuona lan tu tondok, tu Mikamasean nene’ to doloki.

⁴¹Ia duka tu to sae, tu tangia taumMi to Israel, ke saei dio mai tondok mambela belanna sangamMi,

⁴²— belanna narangi tau tu sanga pasareongamMi sia lima matoto’Mi sia takia’ tiangka’Mi — , sia iake saei massambayang lan banua iate,

⁴³la Miperangii dao mai suruga inan matontongamMi, sia pasituru’i tu mintu’ apa napengkamoyai tu to sae lako Kalemi, anna mintu’ bangsa dao kuli’na padang untandai tu sangamMi, naurunganni umpangke’Komi tu tau iato mai, susi taumMi to Israel, sia anna tandai, kumua sangamMimo tu disa’buranni te banua iate, tu mangka kupabendan.

⁴⁴Iake sunni tu taumMi la sirari ualinna lako lalan Mipapatuanni sia massambayang lako PUANG mentingo lako kota iate, tu mangka Mipilei langsa’, sia lako banua iate, tu mangka kubangunan sangamMi,

⁴⁵perangii dao mai suruga tu passambayangna sia pengkamoyana sia sandatonganni.

⁴⁶Iake kasalammi tu tau iato mai lako Kalemi — moi misa’ tau tae’ tang kasalan — anna re’dek ara’Mi lako tau iato mai sia Misorong lako ualinna, naurunganni nabaa male tu tau iato mai la napali’ tama tondokna, la mambelanna, ba’tu la mandappi’na,

⁴⁷sia iake napalan penaai tau iato mai tu apa iato lan tu tondok dinii male umpali’i, anna mengkatoba’ sia mengkamoya lako Kalemi lan tondokna tu to umpali’i sia ma’kada nakua: kasalammokan, umpogau’mokan kakadakean sia tang mekaalukmokan,

⁴⁸sia iake lantukki tu tau iato mai mengkatoba’ situang mintu’ deatanna lan tondokna mintu’ ualinna tu umpali’i, sia iake massambayangi lako Kalemi mentingo lako tondok iate, tu mangka Mikamasean nene’ to dolona, sia lako kota iate, tu mangka Mipilei langsa’ sia lako banua iate, tu mangka kubangunan sangamMi,

⁴⁹attu iato la Miperangii dao mai suruga, inan matontongamMi, tu passambayangna sia pengkamoyana tau iato mai amMi sanda-tonganni.

⁵⁰Sia la Mipa’dei tu mintu’ kasalan napogau’ taumMi lako Kalemi, sia kapatodo-tintinganna ullendai pepasanMi sia pabu’tuanni kamamasean lan penaanna tu to umpali’i naurunganni ungkamasei tu tau iato mai.

⁵¹Belanna iatu tau iato mai taumMi sia mana’Mi, tu mangka Misolan tassu’ lan mai Mesir, lan mai to’ dapo’ bassi.

⁵²Iamoto la Mitiro tu pengkamoyana taumMi sia pengkamoyana taumMi to Israel sia la Miperangii pempiran-piranni meongli’ lako Kalemi.

⁵³Belanna Mipamarimbanganammo Kalemi tu tau iato mai dio mai mintu’ bangsa dao kuli’na padang, susitu mangka Mipokada nalopian Musa, taumMi, tomMi solanni tu nene’ to doloki tassu’ lan mai Mesir, o Puangki PUANG.

⁵⁴Iatonna upu’mo tu Salomo umpakendekki langngan PUANG te mintu’ passambayang sia pengkamoya iate, bendanmi dio tingayo inan pemalaranNa PUANG, tonna soro’ malinguntu’ sia mempala’ langngan langi’,

⁵⁵sia bendan anna passakkei tu mintu’ kombongan to Israel, nametamba nakua:

⁵⁶Mintu’na kadipudian lu langngan nasang PUANG, tu umpa’kamasean kamarampasan lako to Israel, taunNa, susitu mintu’ apa mangka Napokada; moi sangbuku kada tae’ tu tang landa’ dio mai tu mintu’ kada melo, tu mangka Napokada, nalopian Musa, taunNa.

⁵⁷Lalasia manii anNa rondongki’ PUANG, Kapenombanta, susitu Ia mangka urrondong nene’ to dolota; sangapaoi upa’ da Natampeki’ sia da Natumpuki’.

⁵⁸Sangadinna la Napamalang lako Kalena tu penaanta anta turu’i tu mintu’ lalanNa sia ungkaritutui tu pepasanNa sia apa Napondok sia Napa’parentan tu mangka Napepasanan lako nene’ to dolota.

⁵⁹Lalasia manii na iate mintu’ kadangku, tu kupennoloan lan pengkamoyaku lako PUANG, la mareke’ keallo sia kebongi dio oloNa PUANG, Kapenombanta, anna sanda-tonganni tu taunNa sia to Israel, taunNa, kiallo-kiallo.

⁶⁰Anna issanni mintu’ bangsa dao kuli’na padang, kumua PUANGmo tu Kapenomban, tae’ senga’na,

⁶¹sia anna iatu penaammi mengkara’pa lako PUANG, Kapenombanta, la lolang umpengkaolai tu mintu’ apa Napondok sia ungkaritutui pepasanNa, susite allo totemo.

⁶²Napemalarammi datu sola mintu’ to Israel tu pemala’ pangrere’ dio oloNa PUANG.

⁶³Iatu pemala’ kasalamaran tu napemalaran Salomo lako PUANG, duangpulo ndua sa’bunna tu sapi sia saratu’ duangpulo sa’bunna tu domba sola bembe’. Susimoto tu datu sola mintu’ to Israel urrarai tu banuanNa PUANG.

⁶⁴Allo ia bangsiamoto anna pamarimbanganni datu tu tangnga tarampak tu dio tingayo banuanNa PUANG, belanna inde to dio nanii umpasakka’i tu pemala’ ditunu pu’pu’ sia kande dipemalaran sia lompo pemala’ kasalamaran, belanna iatu inan pemalaran tambaga tu bendan dio oloNa PUANG tarru’ bitti’, tang naala tu pemala’ ditunu pu’pu’ sia kande dipemalaran sia lompo pemala’ kasalamaran.

⁶⁵Attu iato napakarayami Salomo sola mintu’ to Israel tu allo kapua, iamotu misa’ kasirampunan kapua, randuk dio mai lalan lu lako Hamat sae lako salu’-salu’ Mesir, dio oloNa PUANG, Kapenombanta, lan pitung allo sia pitu pole’pa allona, sangpulo a’pa’ allona mintu’.

⁶⁶Iatonna allo ma’pengkaruamo nasuami male tu to buda, anna palakuanni tau iato mai kamasakke-sakkean tu datu, namane sule lako tendana, parannu sia sende-sende diona kameloan, tu Napogau’ PUANG lako Daud, taunNa, sia lako to Israel, taunNa.