Read Toraja-Sa'dan 2 DATU 13 Bible Online

2 DATU 13 - Toraja-Sa'dan bible

2 DATU 13

¹Iatonna taun ma’penduangpulomo ntallu kadatuanna Yoas, anakna Ahazia, datu to Yehuda, dadimi datu tu Yoahas, anakna Yehu, umparenta to Israel dio Samaria; anna ma’parenta sangpulo pitu taunna.

²Napogau’mi tu apa kadake dio pentiroNa PUANG sia unturu’ mintu’ kasalan, napa’pesuan Yerobeam, anakna Nebat, lako to Israel umpogau’i; tae’ namemboko’ dio mai to.

³Iamoto re’dekmi ara’Na PUANG lako to Israel, anNa sorongi tu tau iato mai tama limanna Hazael, datu to Aram sia tama limanna Benhadad, anakna Hazael lan mintu’ attu.

⁴Apa iatu Yoahas umpengkamoyai kamamaseanNa PUANG anNa perangii PUANG, belanna Natiromo Puang, tumba masarrangna datu Aram umpakario-rio to Israel.

⁵Nakamaseimi PUANG tu to Israel misa’ tau urrampananni, naurungan tau iato mai tilendok dio mai kuasanna to Aram, anna pada untorroi tendana sule tu to Israel susi dolona.

⁶Apa tae’ naboko’i tu mintu’ kasalanna bati’na Yerobeam, tu napa’pesuan lako to Israel umpogau’i sangadinna napatarru’ bang tau iato mai. Sia tontong duka bendan dio Samaria tu lentong kayu dipodeata.

⁷Tonganna tae’ napatorroanni surodadu sangadinna pakkanarang limangpulo sia kareta sangpulo sia iatu to ma’lingka sangpulo sa’bu; belanna nasanggangmo datu to Aram tu tau iato mai sia napasusi barra’-barra’ ke attu panglulluran.

⁸Iatu tang dipokadannapa tu mintu’ tuna’na Yoahas sia mintu’ penggauranna sia mintu’ penggauran lalongna, tang tisura’moraka lan sura’ ossoranna mintu’ datu to Israel?

⁹Iatu Yoahas malemo tama batu dilobang sola nene’ to dolona, anna dipeliang dio Samaria, Anna Yoas, anakna muane, ussondai dadi datu.

¹⁰Iatonna taun ma’pentallungpulo mpitu kadatuanna tu Yoas, datu to Yehuda, dadimi datu tu Yoas, anakna Yoahas, umparenta to Israel dio Samaria; anna ma’parenta sangpulo annan taunna.

¹¹Napogau’mi tu apa kadake dio pentiroNa PUANG; tae’ naboko’i tu mintu’ kasalan, tu napa’pesuan Yerobeam, anakna Nebat, lako to Israel umpogau’i; napatarru’ bang datu to.

¹²Iatu tang dipokadannapa tu mintu’ tuna’na Yoas sia mintu’ tu apa napogau’ sia mintu’ penggauran lalongna, tu diona kasirarianna Amazia, datu to Yehuda, tang tisura’moraka lan sura’ ossoranna mintu’ datu to Israel?

¹³Iatonna malemo tama batu dilobang tu Yoas sola nene’ to dolona, naisungimi Yerobeam tu isungan kapayungan. Dipeliangmi tu Yoas dio Samaria sola mintu’ datu to Israel.

¹⁴Iatonna masaki tu Elisa, tu saki napobannang mate, saemi tu Yoas, datu to Israel lako kalena anna tumangi’ dio olona sia ma’kada nakua: O ambe’ku, ambe’ku! Karetana sia pakkanarangna to Israel!

¹⁵Nakuami tu Elisa lako: Alako pana sola tinaran. Naalammi pana sola tinaran.

¹⁶Nakuami tu Elisa lako datu to Israel: Toemi tu pana. Natoemi. Naparemme’i limanna Elisa tu limanna datu.

¹⁷Mangkato nakuami: Bungka’i tu pentiroan ma’palulako matallo. Iatonna bungka’mi ma’kadami Elisa nakua: Pa’pananni. Napa’panammi. Nakuami: Iamoto tu tinaran kapataloan lu dio mai PUANG, iamotu misa’ pana untalo to Aram. Iatu to Aram la mitalo dio Afek, naurunganni sanggang tu tau iato mai.

¹⁸Mangkato nakuami: Alami tu tinaran. Naalami to. Nakuami tu Elisa lako datu to Israel: Pembambanni rokko padang. Napembambammi pentallun namane untorroi.

¹⁹Re’dekmi ara’na tu taunNa Puang Matua lako, sia ma’kada nakua: Iakemmi bambai pellima ba’tu pennannan, manassa la mitalo tu to Aram sae lako sanggangna tu tau iato mai. Apa totemo pentallunri mitalo tu to Aram.

²⁰Mangkato matemi tu Elisa, napeliangmi tau. Iatonna iato denmi ba’tu pira-pira tuntunan to Moab tama tondok la mangrampa, tonna randuk pentaunan.

²¹Den pissan nadilamun tu misa’ tau, pakalan natiromi tau iato mai tu sangtuntunan tau; napembuangammi tinde to mate tama liangna Elisa, anna male mallai. Iatonna rumbumi tu batang rabukna Elisa, tuomi sule, anna malimbangun bendan.

²²Iatu Hazael, datu Aram, umpakario-rio to Israel angge tuona Yoahaz.

²³Apa Nakarimmanni PUANG tu tau iato mai sia Nakamasei, anna pessailei belanna basseNa sola Abraham, Ishak na Yakub; tae’ Namorai ussanggangi sia tae’pa Nasualei tu tau iato mai dio mai oloNa.

²⁴Iatonna matemo tu Hazael, datu to Aram, Benhadadmi, anakna muane, dadi datu ussondai.

²⁵Iatu Yoas, anakna Yoahas, unnalai sule tu ba’tu pira-pira kota lan mai limanna Benhadad, anakna Hazael; iatu kota iato naala Hazael dolo lan mai limanna Yoahas, ambe’na Yoas tonna sirari. Natalomi Yoas pentallun tu Benhadad, naalai sule tu mai kotana to Israel.