Read Toraja-Sa'dan 2 DATU 15 Bible Online

2 DATU 15 - Toraja-Sa'dan bible

2 DATU 15

¹Iatonna taun ma’penduangpulo mpitu kadatuanna Yerobeam, datu to Israel, dadimi datu tu Azarya, anakna Amazia, datu to Yehuda.

²Iatonna dadi datu sangpulo annanmo taunna, anna ma’parenta limang pulo ndua taunna dio Yerusalem. Iatu indo’na disanga Yekholya, to Yerusalem.

³Napogau’mi tu apa malolo dio pentiroNa PUANG, susitu mintu’ penggauranna Amazia, ambe’na.

⁴Ia mannamo tu inan madao, tae’ nadiratoi; na iatu to buda tontong siapa mantunu sia memala’ dao tu inan madao.

⁵Naparuai parri’ PUANG tu datu, naurunganni golenan sae lako allo kamateanna, anna ma’banua torro senga’, na Yotam anakna datu, umpangului tu tongkonan layuk sia umparenta mintu’ pa’tondokan.

⁶Iatu tang dipokadannapa tu mintu’ tuna’na Azarya sia mintu’na apa napogau’, tang tisura’moraka lan sura’ ossoranna mintu’ datu to Yehuda?

⁷Iatu Azarya malemo tama batu dilobang sola nene’ to dolona, anna dipeliang dipasola nene’ to dolona lan kotana Daud. Anna Yotam, anakna muane ussondai dadi datu.

⁸Iatonna taun ma’pentallungpulo ngkarua kadatuanna Azarya, datu to Yehuda, dadimi datu tu Zakharia, anakna Yerobeam, umparenta to Israel, dio Samaria; anna ma’parenta annan bulanna.

⁹Napogau’mi tu apa kadake dio pentiroNa PUANG susi mintu’ penggauranna nene’ to dolona; tae’ naboko’i tu mintu’ kasalan napa’pesuan Yerobeam, anakna Nebat, lako to Israel umpogau’i.

¹⁰Umpadenmi kasipakulu-kuluan tu Salum, anakna Yabesh, unneai napatei dio tingayona to buda. Na ia ussondai dadi datu.

¹¹Iatu tang dipokadannapa tu mintu’ tuna’na Zakharia, manassa tisura’mo lan sura’ ossoranna mintu’ datu to Israel.

¹²Susimorato tu kadanNa PUANG tu mangka Napokada lako Yehu, nakua: Iatu mai anakmu muane la unisung dao isungan kapayunganna Israel sae lako osso’ ma’penna’pa’na. Dadi dukami susito.

¹³Iatu Salum, anakna Yabesh, dadi datu tonna taun ma’pentallungpulo ngkasera kadatuanna Uzia, datu Yehuda; anna ma’parenta sangbulan dio Samaria.

¹⁴Attu iato ke’de’mi tu Menahem, anakna Gadi, dio mai Tirza, lako Samaria. Anna patei tu Salum, anakna Yabesh, dio Samaria. Anna ia ussondai dadi datu.

¹⁵Iatu tang dipokadannapa tu mintu’ tuna’na Salum sia kasipakulu-kuluan napabu’tu, manassa tisura’mo lan sura’ ossoranna mintu’ datu Israel.

¹⁶Attu iato nataloi Menahem tu tondok Tifsah, anna pongkoi tu mintu’ pa’tondokan sia iatu mai to lan lili’na randuk dio mai Tirza, belanna tae’ nabungkaranni babangan. Iamoto napongkoi tu tau iato mai sia naballak tu tambukna mintu’ baine ma’tambuk.

¹⁷Iatonna taun ma’pentallungpulo ngkasera kadatuanna Azarya, datu Yehuda, dadimi datu tu Menahem, anakna Gadi, umparenta to Israel; anna ma’parenta sangpulo taunna dio Samaria.

¹⁸Napogau’mi tu apa kadake dio pentiroNa PUANG; tae’ naboko’i lan mintu’ allo katuoanna tu mintu’ kasalan napa’pesuan Yerobeam, anakna Nebat, lako to Israel umpogau’i.

¹⁹Ke’de’mi tu Pul, datu to Asyur, la ullaoi tondok Israel, apa nasorongan Menahem, sangsa’bu talenta[7] salaka tu Pul, kumua anna tundui umpabantangi tu kadatuan iato lan limanna.

²⁰Iatu mintu’ doi’ napalaku Menahem dio mai to Israel, iamotu dio mai mintu’ to sugi’, anna benni datu Asyur, silimangpulo sikele’[8] salaka ke misa’oi tau. Mangkato sulemi tu datu Asyur tae’ natorro lan tondok iato.

²¹Iatu tang dipokadannapa tu mintu’ tuna’na Menahem sia mintu’ tu apa napogau’, tang tisura’moraka lan sura’ ossoranna mintu’ datu to Israel?

²²Iatu Menahem tamamo batu dilobang dipasola nene’ to dolona. Anna Pekahya, anakna muane ussondai dadi datu.

²³Iatonna taun ma’pellimangpulo kadatuanna Azarya, datu Yehuda, dadimi datu tu Pekahya, anakna Menahem, umparenta to Israel dio Samaria; anna ma’parenta duang taun.

²⁴Napogau’mi tu apa kadake dio pentiroNa PUANG; tae’ naboko’i tu mintu’ kasalan napa’pesuan Yerobeam, anakna Nebat, lako to Israel umpogau’i.

²⁵Iatu Pekah, anakna Remalya, kamandangna, sipakulu-kulu limangpulo tau dio mai Gilead unnea datu, anna patei dio Samaria, lan tambakukunna tongkonan layuk sola Argob sia Arye; napateimi anna ia ussondai dadi datu.

²⁶Iatu tang dipokadannapa tu mintu’ tuna’na Pekahya, sia mintu’ tu apa napogau’, manassa tisura’mo lan sura’ ossoranna mintu’ datu Israel.

²⁷Iatonna taun ma’pellimangpulo ndua kadatuanna Azarya, datu Yehuda, dadimi datu tu Pekah, anakna Remalya, umparenta to Israel dio Samaria; anna ma’parenta duangpulo taunna.

²⁸Napogau’mi tu apa kadake dio pentiroNa PUANG; tae’ naboko’i tu mintu’ kasalan napa’pesuan Yerobeam, anakna Nebat, lako to Israel umpogau’i.

²⁹Iatonna linona Pekah, datu Israel, saemi tu Tiglat-Pileser, datu Asyur, untalo kota Iyon. Abel-Bet-Maakha, Yanoah, Kedesh sia Hazor, Gilead sia Galilea, sia mintu’ tondok Naftali; napali’i tu pa’tondokan lako Asyur.

³⁰Iatu Hosea, anakna Ela, umpadenmi kasipakulu-kuluan unnea Pekah, anakna Remalya; napateimi anna ia ussondai dadi datu tonna taun ma’penduangpulo kadatuanna Yotam, anakna Uzia.

³¹Iatu tang dipokadannapa tu mintu’ tuna’na Pekah, sia mintu’ tu apa napogau’, manassa tisura’mo lan sura’ ossoranna mintu’ datu to Israel.

³²Iatonna taun ma’penduan kadatuanna Pekah, anakna Remalya, datu to Israel, dadimi datu tu Yotam, anakna Uzia, datu Yehuda.

³³Duangpulomo llima taunna tonna dadi datu, anna ma’parenta sangpulo annan taunna dio Yerusalem. Iatu indo’na disanga Yerusa, anakna Zadok.

³⁴Napogau’mi tu apa malolo dio pentiroNa PUANG, umpeolai mintu’ tu napogau’ Uzia ambe’na.

³⁵Ia mannamo tu inan madao tae’ nadiratoi; na iatu to buda tontong siapa mantunu sia memala’ dao tu inan madao. Sia datu duka unggaragai tu Babangandaonalu banuanNa PUANG.

³⁶Iatu tang dipokadannapa tu mintu’ tuna’na Yotam, sia mintu’ tu apa napogau’, tang tisura’moraka lan sura’ ossoranna mintu’ datu to Yehuda?

³⁷Napatiakka’mi PUANG tu Rezin, datu to Aram, sia Pekah, anakna Remalya, la ullaoi tondok Yehuda.

³⁸Mangkato iatu Yotam tamamo batu dilobang dipasola nene’ to dolona, anna dipeliang dipasola nene’ to dolona lan kotana Daud. Na Ahas, anakna muane, ussondai dadi datu.