Read Toraja-Sa'dan 2 DATU 18 Bible Online

2 DATU 18 - Toraja-Sa'dan bible

2 DATU 18

¹Iatonna taun ma’pentallun kadatuanna Hosea, anakna Ela, datu to Israel, dadimi datu tu Hizkia, anakna Ahas, umparenta to Yehuda.

²Duangpulomo llima taunna, tonna dadi datu, anna ma’parenta duangpulo ngkasera taunna dio Yerusalem. Iatu indo’na disanga’ Abi, anakna Zakharia.

³Napogau’mi tu apa malolo dio pentiroNa PUANG, susitu mintu’ napogau’ Daud, nene’ to dolona.

⁴Naratoimi tu mintu’ inan madao dinii memala’, sia natesse-tesse tu batu dipodeata sia nalelleng tu lentong kayu dipodeata, sia nanisak-nisak duka tu ula’ tambaga tu nagaragai Musa, belanna sae lako allo iato nanii to Israel memala’. Nasangaimi tau Nehustan.

⁵Sande’mi tu datu lako PUANG, Kapenombanna to Israel; naurunganni undinna tae’ tu sangtende’na dio lu mintu’ datu to Yehuda, moi dolona anna ia tae’ duka.

⁶Sia la’ka’ tu datu lako PUANG, tae’ naboko’i sia nakaritutui tu mintu’ pepasan, tu mangka Napepasanan PUANG lako Musa.

⁷Iamoto Narondongi PUANG; umba-umba tu nanii male, inde to nanii maupa’. Nabalimo tu datu Asyur sia tae’mo napengkaolai.

⁸Natalomi tu to Filistin sae lako Gaza sia (Nasanggang) tu mintu’ lili’na, randuk dio mai manara pa’kampan sae lako kota ditambakuku.

⁹Iatonna taun ma’penna’pa’na kadatuanna Hizkia, iamotu taun ma’pempitu kadatuanna Hosea, anakna Ela, datu Israel, ke’de’mi tu Salmaneser, datu Asyur, ullaoi Samaria sia umpatama limbui.

¹⁰Natalomi tau iato mai tonna upu’mo tallung taun; iatonna taun ma’pennannan kadatuanna Hizkia, iamotu taun ma’pengkasera kadatuanna Hosea, datu Israel, ditalomi tu Samaria.

¹¹Napali’mi datu Asyur tu to Israel lako Asyur sia nabaa lako Halah, sia lako biring salu Habor, iamotu salu dio Gozan, sia lako tu mai kota to Madai.

¹²Belanna tae’ naperangii tau iato mai tu PUANG, Kapenombanna, sangadinna natengkai tu basseNa; iamotu mintu’ apa Napepasanan lako Musa, taunNa PUANG; tae’ naperangii sia tae’ napogau’i.

¹³Iatonna taun ma’pessangpulo a’pa’na kadatuanna Hizkia, saemi tu Sanherib, datu Asyur, urrarii mintu’ kota ditambakukunna Yehuda anna taloi.

¹⁴Ussuami pesua tu Hizkia, datu Yehuda, lako datu Asyur dio Lakhis, nakua: Salamo’; serekomi dio mai kaleku, na apa-apa tu mipapassananna’ la kupassan. Napapassannimi datu Asyur tu Hizkia, datu Yehuda, tallu ratu’ talenta salaka[9] na tallungpulo talenta bulaan.[10]

¹⁵Nasorongmi Hizkia tu mintu’ salaka lan banuanNa PUANG sia lan bilik pangnannanna tongkonan layuk.

¹⁶Iatonna iato nakalopakkimi Hizkia tu bulaan dio mai mintu’ ba’ba sia lentong banua kabusunganna PUANG tu napale’ke’ Hizkia, datu Yehuda; anna sorongi lako datu Asyur.

¹⁷Mangkato nasuami datu Asyur tu kamandang ma’iringanna sia pangulu to mase’ponna datu sia kamandang lompo dio mai Lakhis sola sangtuntunan surodadu matoto’ lako Yerusalem, lako datu Hizkia. Ke’de’mi tu tau iato mai anna rampo lako Yerusalem. Iatonna rampomo, ma’kaponanmi sikandappi’ saruran limbong iringna dao dio lalan ma’palulakona padang pamusoran sampin bulu domba.

¹⁸Iatonna metamba tu tau iato mai kumua nasae tu datu, tassu’mi tu Elyakim, anakna Hilkia, pangulu sandan uai sola Sebna, pangulu to massura’, sia Yoah, anakna Asaf, pa’paelean, lako tau iato mai.

¹⁹Ma’kadami tu kamandang lompo lako tau iato mai, nakua: Pokadanni Hizkia, kumua: Susite tu kadanna datu kapua, iamotu datu Asyur: Umbara susitu kapa’rannuanan tu lan penaammi?

²⁰Misangaraka, kumua puduk bangri la dipomanarang sia la dipomatoto’ parari! Mindara miporannuan, ammi balira’?

²¹Manassa mirannuan tu tekken bulo le’to, iamotu Mesir, anna minda-minda undemme’i, la natossok tu limanna, anna tarru’i; susimoto tu Firaun, datu Mesir, lako mintu’ tu to urrannuanni.

²²Apa iake mikua lako kaleku, kumua: Urrannuangkan PUANG, Kapenombangki tangiaraka Ia tu mangka naputtai Hizkia mintu’ inan madaoNa dinii memala’ sia inan pemalaranNa, anna ma’kada lako to Yehuda sia mintu’ issinna Yerusalem, nakua: La tukkukomi menomba dio tingayo inan pemalaran iate?

²³Totemo melo ke sitangga’komi puangku, datu Asyur, angku benkomi darang duangsa’bu, ke mibela dukai umpadenni tu pakkanarang la ussakei.

²⁴Umba mikua la umbelai sitingoan sala umbanna misa’i tu to maraya, moi iatu tau madionganna puangku? Apa ma’rannuan lakokomi Mesir belanna mintu’ kareta parari sia mintu’ pakkanarang.

²⁵Iamoto tang pangeloranNaraka PUANG, angku sae ullaoi te kota iate sia ussanggangi? PUANGmo tu mangka ma’kada lako kaleku Nakua: Malemoko ullaoi te tondok iate sia ussanggangi.

²⁶Nakuami tu Elyakim, anakna Hilkia sia Sebna sia Yoah lako kamandang lompo: Melo ke ma’basa Aramkomi umpa’kadaikanni, belanna kitandai sia; ke ma’dinni da mima’basa Yehuda ma’kada lako kaleki dio pa’peranginna mintu’ to buda, tu dao rinding tembo’.

²⁷Apa nakua tu kamandang lompo lako tau iato mai: Nasuara’ka puangku umparampoi te mintu’ kada iate lako puangmi sia lako kalemi? Tang lakoraka tu mintu’ to unno’ko’ dao rinding tembo’ la dinii umparampoi, tu la misisolan ungkande tainna sia unniru’ tenena?

²⁸Malemi lako tingayo tu kamandang lompo, anna metamba umpekapuai gamaranna ma’basa Yehuda, nakua: Perangiimi tu kadanna datu kapua, iamotu datu Asyur.

²⁹Inde sia tu kadanna datu iato: Da napakenakomi Hizkia, belanna tae’ nabelai ullendokangkomi lan mai kuasangku.

³⁰Sia da nanarankomi Hizkia la urrannuan PUANG, kumua: Manassa PUANG la ullendokangki’, naurunganni iate kota iate tae’ nadisorong tama kuasanna datu to Asyur.

³¹Da miperangii tu kadanna Hizkia, belanna nakua kadanna datu to Asyur: Menombakomi sia ussorongkomi kalemi lako kaleku, ammi pantan ungkandei tu bua anggoro’mi sia bua arami sia pantan unniru’ uai lan mai bubunmi.

³²Sae lako kasaeangku umpalelekomi lako misa’ padang tu susi padangmi, iamotu misa’ padang sebo gandungna sia uai anggoro’ ba’runna, misa’ padang sebo rotinna sia pa’lak anggoro’na, misa’ padang sebo kayu saitunna sia minna’na sia tani’ enoanna, kumua ammi tuo, da mimate. Apa da miperangii tu kadanna Hizkia, belanna napapusakomi, tu nakua: PUANG la ullendokangki’.

³³Denraka misa’i tu deatanna mintu’ bangsa ma’din urrampanan tondokna lan mai kuasanna datu Asyur?

³⁴Umbara tu mai deatanna Hamat sia Arpad, umbara tu mai deatanna Sefarwaim, Hena sia Iwa? Nakulleraka ullendokan Samaria dio mai kuasangku?

³⁵Dio lu mintu’ deatanna tondok iato, mindara ungkullei ullendokan tondokna lan mai kuasangku, naurunganni ma’din dukao tu PUANG urrampanan Yerusalem lan mai kuasangku?

³⁶Apa kappa bang tu to buda sia tae’ napebalii moi sangbuku kada, belanna napa’parentan datu kumua: Da mibali lenni.

³⁷Saemi tu Elyakim, anakna Hilkia, pangulu sandan uai sia Sebna, pangulu to massura’, sia Yoah, anakna Asaf, pa’paelean, usserek-serek tamangkalena umpennoloi Hizkia, anna parampoi lako datu tu mintu’ kadanna kamandang lompo.