Read Toraja-Sa'dan 2 DATU 2 Bible Online

2 DATU 2 - Toraja-Sa'dan bible

2 DATU 2

¹Den pissan, tonna la unnangka’mi PUANG tu Elia langngan suruga naputu’ talimpuru’, malemi tu Elia sola Elisa dio mai Gilgal.

²Ma’kadami tu Elia lako Elisa nakua: Torromoko inde te, belanna Nasuana’ PUANG male lako Betel. Apa mebali tu Elisa nakua: La lelukraka tuoNa PUANG sia tonganna susi tuomi, inang tae’ kula untampekomi. Malemi tu tau iato mai rokko Betel.

³Attu iato tassu’mi tu mintu’ passikola nabi, tu torro dio Betel, lako Elisa sia mekutana lako nakua: Miissan siaraka, kumua allo iate la Naangka’ PUANG tu puangmi dao mai ulummi? Mebali nakua: Kuissan duka sia; kappakomi.

⁴Ma’kadami tu Elia lako nakua: O Elisa, torromoko indete, belanna Nasuana’ PUANG lako Yerikho. Apa mebali nakua: La lelukraka tuoNa Puang sia tonganna susi tuomi, inang tae’ kula untampekomi. Nasusito rampomi tu tau iato mai lako Yerikho.

⁵Attu iato saemi tu mintu’ passikola nabi dio Yerikho lako Elisa sia mekutana lako nakua: Miissan sia raka, kumua allo iate la Naangka’ PUANG tu puangmi dao mai ulummi? Mebali nakua: Kuissan duka sia; kappakomi.

⁶Ma’kadami tu Elia lako nakua: Torromoko inde te, belanna Nasuana’ PUANG lako Yordan. Apa mebali nakua: La lelukraka tuoNa PUANG sia tonganna susi tuomi, inang tae’ kula untampekomi. Nasusito tarru’mi male sola duai.

⁷Limangpuloi dio mai mintu’ passikola nabi male duka, anna bendan mambela dio mai tau iato mai, tonna bendan sola duai dio biring Yordan.

⁸Naalami Elia tu bayu lamba’na, anna lulunni, nasambakki tu uai, anna tipa’dua lu rekke sia lu sau’, anna lamban sola duai dao to’ karangkeanna.

⁹Iatonna rampomo sola duai lian, ma’kadami tu Elia lako Elisa, nakua: Palakumi tu apa ma’din kupogaurangko kumane diangka’ dio mai kalemu. Mebalimi tu Elisa nakua: Ke ma’dinni na iatu penaammi duang taan untorroina’.

¹⁰Ma’kadami tu Elia nakua: Iatu palakummu misa’ apa masuli’. Iammu tirona’ ke marassanna’ diangka’ dio mai kalemu, manassa la dadi tu susinna to lako kalemu, apa iake tae’i, manassa tae’ duka nala dadi.

¹¹Iatonna marassan lumingka sipa’ulelean, ta’kala denmi misa’ kareta api sola darang api umpasisarakki sola duai. Susimoto tu kakendekanna Elia langngan suruga naputu’ talimpuru’.

¹²Iatonna tiroi Elisa tu apa iato, metambami nakua: O ambe’ku, ambe’ku! Karetana sia pakkanarangna to Israel! Ta’kala natae’mo natiro. Nalalakkimi tu pakeanna, naserekki napa’dua.

¹³Naalami tu bayu lamba’na Elia, tu rondon dio mai kalena, anna sule sia bendan dio biring Yordan.

¹⁴Naalami tu bayu lamba’na Elia, tu rondon dio mai kalena, anna sambakki tu uai sia metamba nakua: Umbara tu PUANG, Kapenombanna Elia, manassa iamo Ia? Nasambakkimi tu uai anna tipa’dua lu rekke sia lu sau’, anna ma’din ullambanni Elisa lian.

¹⁵Iatonna tiromi mintu’ passikola nabi dio Yerikho, tu bendan mambela, nakuami: Manassa iatu penaanna Elia diomo Elisa. Saemi tu tau iato mai umpessitammui Elisa, anna tukku rokko padang menomba dio olona.

¹⁶Ma’kadami tu tau iato mai lako nakua: Tonganna den dio taummi tu muane malinta’ limangpulo; da’ito namale undaka’ puangmi, Naangka’ manii PenaanNa PUANG, anna popengkalaoi dao misa’ tanete ba’tu Naparokkoi misa’ lombok. Apa nakua Elisa: Da misua tau.

¹⁷Apa iatonna tole-tolemi tau iato mai umpalakui lako, masiri’mi tu Elisa anna ma’kada nakua: Sua bangmi. Nasuami tu tau limangpulo, nadaka’i lan tallung allo, apa tae’ naappa’i.

¹⁸Sulemi tu tau iato mai lako Elisa, tonna torro siapa dio Yerikho, anna ma’kada Elisa lako: Tae’raka kupokadangkomi kumua: da mimale?

¹⁹Ma’kadami tu pa’tondokan lako Elisa nakua: Tonganna melomo torrona te kota iate susitu natiro puangki, apa iatu uainna kadake sia iatu padang umpaden katangmemba’karan.

²⁰Nakuami tu Elisa: Alanna’ misa’ pindan ba’ru, ammi parokkoi sia. Nabaami tau lako tu pindan.

²¹Tassu’mi tu Elisa namale lako to’ kalimbuang, nabuangi tu sia tama nama’kada nakua: Inde sia tu kadanNa, PUANG: La Kupamelo te uai iate, tae’mo nala umpaden kamatean sia katangmemba’karan.

²²Melomi tu uai sae lako allo totemo susitu kada mangka napokada Elisa.

²³Ke’de’mi Elisa inde to dio mai lako Betel. Iatonna marassan tuka’ langngan, sunmi tu ba’tu pira-pira pia lan mai tondok untelle-tellei sia meoli lako nakua: Kendekmoko mai, to pese! Kendekmoko mai, to pese!

²⁴Messailemi anna tiroi tu pia iato mai, anna tampakki ropu tete dio sanganNa PUANG. Saemi da’dua beruang birang lan mai pangala’, nasepak-sepakki tu pia patangpulondua.

²⁵Ke’de’mi tu Elisa inde to dio mai, namale lako buntu Karmel na inde to dio mai nanii sule lako Samaria.