Read Toraja-Sa'dan 2 DATU 24 Bible Online

2 DATU 24 - Toraja-Sa'dan bible

2 DATU 24

¹Iatonna linona Yoyakim ke’de’mi tu Nebukadnezar, datu Babel, male lako, anna mengkanorong tu Yoyakim tallung taun lako kalena; apa undinnato tibalikomi tu penaanna, anna balii.

²Nasuami PUANG tu surodadu to Kasdim sia surodadu to Aram sia surodadu to Moab sia surodadu to Amon la ullaoi Yoyakim; iatu tau iato mai Nasua Puang la ullaoi Yehuda sia ussanggangi, susi kadanNa PUANG tu Napokada nalopian taunNa, iamotu mintu’ nabi.

³Tonganna iate mintu’na te urrampoi Yehuda susi kadanNa PUANG, la ussabu’i tu tau iato mai dio mai oloNa, tu belanna mintu’ kasalan napogau’ Manasye;

⁴sia belanna diona rara to tang sala tu napatibollo, belanna umponnoi Yerusalem tu rara to tang sala. Anna mengkailing PUANG umpagarri’i.

⁵Iatu tang dipokadannapa tu mintu’ tuna’na Yoyakim sia mintu’ apa napogau’, tang tisura’moraka lan sura’ ossoranna mintu’ datu Yehuda?

⁶Iatu Yoyakim tamamo batu dilobang dipasola nene’ to dolona, anna Yoyakhin, anakna muane, dadi datu ussondai.

⁷Tae’mo natolei tu datu to Mesir tassu’ lan mai tondokna, belanna naala nasang datu to Babel tu mintu’ tondok naala lili’na Mesir randuk dio mai salu’-salu’ Mesir sae lako salu Efrat.

⁸Iatu Yoyakhin sangpulo karuamo taunna tonna dadi datu, anna ma’parenta tallung bulan dio Yerusalem. Iatu indo’na disanga Nehusta, anakna Elnatan dio mai Yerusalem.

⁹Napogau’mi tu apa kadake dio pentiroNa PUANG, susitu penggauranna ambe’na.

¹⁰Attu iato ke’de’mi tu surodadunna Nebukadnezar, datu Babel, ullaoi Yerusalem; napatama limbumi tau tu tondok iato.

¹¹Sia Nebukadnezar kalena, datu Babel, sae ullaoi tu tondok iato, tonna marassan umpatama limbui mintu’ surodadunna.

¹²Malemi tu Yoyakhin, datu Yehuda, umpennoloi datu Babel, la ia, la indo’na, la pangulunna, la arungna, la to mase’ponna. Natingkanmi datu to Babel, tonna taun ma’pengkarua kadatuanna.

¹³Naalaimi inde to dio mai tu mintu’ pareanan lan banuanNa PUANG sia lan tongkonan layuk; sia nata’takki tu bulaan dio mai mintu’ pareanan tu nagaragai Salomo, datu to Israel, lan banua kabusunganNa PUANG, susi kadanNa PUANG.

¹⁴Napali’mi tu mintu’ pa’tondokan Yerusalem sola mintu’ arung sia to malinta’ parari, sangpulo sa’bunna, susi duka tu mai pande sia pande bassi; moi misa’ tae’mo torro, sangadi to mase-mase mannamo dio lu to buda lan tondok.

¹⁵Sia napali’ tu Yoyakhin lako Babel; ia duka tu indo’na datu sia iatu mai bainena datu, sia mintu’ to mase’ponna sia mintu’ to paa lan tondok nabaa nasang dio mai Yerusalem lako Babel.

¹⁶Sia napali’ datu Babel lako Babel tu to malinta’ parari-pitungsa’bu, sia to pande sia to pande bassi — sangsa’bu — mintu’nato, to barani sia lalong parari.

¹⁷Naangka’mi datu Babel tu Matanya, pa’amberanna Yoyakhin, dadi datu, la ussondai, anna gantii Zedekia.

¹⁸Iatu Zedekia duangpulo mmisa taunna tonna dadi datu; anna ma’parenta sangpulo misa taunna dio Yerusalem. Iatu indo’na disanga Hamutal, anakna Yeremia dio mai Libna.

¹⁹Napogau’mi tu apa kadake dio pentiroNa PUANG susitu mintu’ penggauranna Yoyakim.

²⁰Belanna kasengkeanNa PUANG, anna sakerangngan-rangnganna tu kakadakeanna Yerusalem sola Yehuda, sae lako Nasualei dio mai oloNa. Pabali-balimi Zedekia lako datu Babel.