Read Toraja-Sa'dan 2 DATU 8 Bible Online

2 DATU 8 - Toraja-Sa'dan bible

2 DATU 8

¹Ma’kadami Elisa lako tu baine mangka napatuo anakna, nakua: Ke’de’moko ammu male sola to lan banuammu, sia mempue umba-umba nii musanga melo, belanna Napasaemo PUANG tu karorian. Dadi tonganmo lan tu tondok pitung taun.

²Ke’de’mi tu baine iato, naturu’i tu kadanna taunNa Puang Matua; malemi sola mintu’ to lan banuanna, anna mempue pitung taun lan tondok to Filistin.

³Iatonna ganna’mo pitung taun sulemi tu baine iato dio mai tondok to Filistin, anna male ma’parapa’ lako datu tu diona banuanna sia pa’lakna.

⁴Sipa’kada bangsiapa datu tu Gehazi, to ma’kamayanna taunNa Puang Matua, nakua: Uleleanna’ tu mintu’ penggauran kapua tu napogau’ Elisa.

⁵Marassan naulelean lako datu tu umba nakua umpatuoi sule tu misa’ to mate, pakalan saemi tu baine, tu umpoanakki tu pia napatuo sule, la ma’parapa’ lako datu tu diona banuanna sia pa’lakna. Nakuami tu Gehazi: O puangku datu, iamora te tu baine, na iamote tu anakna, tu napatuo Elisa sule.

⁶Mekutanami tu datu lako baine iato, anna uleleanan nasangi lako. Nasuami datu tu to mase’ponna misa’ ussolanni, nakua: Pasuleanni tu mintu’ apanna sia mintu’ bura padangna randuk dio mai natampena te tondok sae lako allo iate.

⁷Saemi tu Elisa lako Damsyik tonna masaki tu Benhadad, datu to Aram. Naparampomi tau lako datu, kumua: Iatu taunNa Puang Matua diomo mai.

⁸Ma’kadami tu datu lako Hazael, nakua: Alai tu apa la mupa’kamasean, ammu male umpessitammui taunNa Puang Matua ammu pekutananni lako PUANG nalopian taunNa Puang Matua, kumua: La matana siapara’ka dio mai te saki iate?

⁹Malemi tu Hazael umpessitammui, naalami tu ianan ballo dio mai Damsyik la napa’kamasean, napateke’i tu unta patangpulo. Rampomi umpennoloi Elisa, nakuami: Iate aku te, nasuana’ anakmi, Benhadad, datu to Aram, sae lako kalemi umpekutananni, nakua: La matana siapara’ka dio mai te saki iate?

¹⁰Nakuami tu Elisa lako: Malemokomi pokadanni kumua: Manassa la matana siakomi. Apa Napaombo’mo PUANG lako kaleku kumua manassa la matemo.

¹¹Kanunu-nunu bangmi tu taunNa Puang Matua sia ma’pakappa bang, anna pomasiri’i tau; ta’kala si’dan-si’danmi tumangi’.

¹²Nakuami tu Hazael: Ma’apai mitumangi’ra? Mebalimi nakua: Belanna kutandai tu mintu’ kadake la migauran to Israel: la miballa tu bentengna sia la mipatei pa’dang tu mai pia muanena sia la miru’puk-ru’puk tu mai pia’-pia’na sia la miballak tu mai baine ma’tambuk.

¹³Nakuami tu Hazael: Minda toda iate taummite, tu sangtinti asu, anna la umpogau’ri te apa kapua iate? Nakuami tu Elisa: Mangkamo Napaombo’ PUANG lako kaleku, kumua kamumo la dadi datunna to Aram.

¹⁴Messimanmi lako Elisa, namale. Iatonna rampomo lako puangna, nakutanaimi, nakua: Apara napokada Elisa lako kalemu? Mebalimi nakua: Nakuanna’ kumua: Manassa la matana siapokomi.

¹⁵Iatonna masiang to, naalami tu misa’ sambu’ parramba’, naotonni rokko to’ uai, nasamboi tu lindona, naurunganni mate tu datu. Na iatu Hazael mendadi datu ussondai.

¹⁶Iatonna taun ma’pellima kadatuanna Yoram, anakna Ahab undatui to Israel, — tonna Yosafat undatui to Yehuda — , dadimi datu tu Yoram, anakna Yosafat, umparenta to Yehuda.

¹⁷Tallungpulomondua taunna tonna dadi datu, nama’parenta karua taunna dio Yerusalem.

¹⁸Unturu’mi bate lalanna mintu’ datu Israel, susi penggauranna to lan tongkonan layukna Ahab, belanna umpobaine anakna Ahab; napogau’i tu apa kadake dio pentiroNa PUANG.

¹⁹Apa tae’ duka nala ussanggangi PUANG tu to Yehuda belanna diona Daud, taunNa, susitu Napokada lako, kumua la Nakamasean misa’ palita, iamotu mai bati’na undinna.

²⁰Iatonna linona memboko’mi tu to Edom, nalendokan kalena dio mai kuasa to Yehuda, naangka’i tu misa’ datu umparentai.

²¹Malemi tu Yoram tarru’ lako Zair sola mintu’ karetana; ke’de’mi tu datu tonna bongi anna taloi tu to Edom, tu umpatama limbui sia iatu mai pangulu karetana; nasangmallaian tu to buda lako tendana.

²²Moi susito memboko’ duka tu Edom, nalendokan kalena dio mai kuasa Yehuda sae lako allo iate. Na attu iato iatu Libna memboko’ dukamo.

²³Iatu tang dipokadannapa tu mintu’ tuna’na Yoram sia mintu’ apa napogau’, tang tisura’moraka lan sura’ ossoranna datu Yehuda?

²⁴Iatu Yoram malemo tama batu dilobang sola nene’ to dolona, anna dipeliang sola nene’ to dolona lan kotana Daud. Na Ahazia, anakna muane, ussondai dadi datu.

²⁵Iatonna taun ma’pessangpulo dua kadatuanna Yoram, anakna Ahab, datu to Israel, dadimi datu tu Ahazia, anakna Yoram, umparenta to Yehuda.

²⁶Iatu Ahazia tonna dadi datu, duangpulomo ndua taunna, anna ma’parenta dio Yerusalem sangtaun; iatu indo’na disanga Atalya, ampona Omri, datu to Israel.

²⁷Unturu’mi bate lalanna bati’na Ahab sia umpogau’ apa kadake dio pentiroNa PUANG, susi penggauranna bati’na Ahab, belanna to sirapu dio bati’na Ahab.

²⁸Malemi sola Yoram, anakna Ahab, nasirari Hazael, datu to Aram dio Ramot, lili’na Gilead. Nabangkeimi to Aram tu Yoram.

²⁹Sulemi tu Yoram lako Yizreel la umpopedampi bangkena, tu narua to Aram dio Rama, tonna sirari Hazael, datu Aram. Saemi tu Ahazia, anakna Yoram, datu Yehuda, untollongi Yoram, anakna Ahab, dio Yizreel, belanna masaki bangmo.