Read Toraja-Sa'dan 2 DATU 9 Bible Online

2 DATU 9 - Toraja-Sa'dan bible

2 DATU 9

¹Natambaimi nabi Elisa tu misa’ passikola nabi nama’kada lako nakua: Ma’tambeke’ko ammu alai te busso’-busso’ nanii minna’ lan, ammu male lako Ramot, lili’na Gilead.

²Iammu rampomo lako, tiroi ba’tu umba nanii tu Yehu, anakna Yosafat, anakna Nimsi. Maleko tama, ammu palakui anna ke’de’ lan tangngana solana, ammu solanni tama inan lendu’ tama.

³Ammu alai tu busso’-busso’ nanii minna’ lan, ammu bolloanni dao ulunna, sia ma’kadako lako kumua: Inde sia tu kadanNa PUANG nakua: La Kutokkoko dadi datunna to Israel. Mangkato bungka’ko ba’ba mutarru’ liu male mallai.

⁴Malemi te tomangura, iamotu nabi mangura lako Ramot, lili’na Gilead.

⁵Iatonna rampomo lako naappa’mi tu mai kamandang surodadu sangsirampunan unno’ko. Ma’kadami nakua: Den kareba la kuparampoangkomi, e kamandang! Mekutanami tu Yehu nakua: Mindarakanni te mintu’ te? Mebalimi nakua: lako kamu e kamandang.

⁶Bendanmi namale tama banua. Nabolloimi minna’ tu ulunna, nama’kada lako nakua: Inde sia tu kadanNa PUANG, Kapenombanna to Israel: La Kutokkoko dadi datunna taunNa PUANG, iamotu mai to Israel.

⁷La mupatei tu mintu’ to lan banuanna Ahab, puangmu, kumua angKu tuntunni tu bala’na rarana taungKu, iamotu mintu’ nabi sia mintu’ taunNa PUANG, lako Izebel.

⁸Mintu’ to lan banuanna Ahab la sanggang; sia iatu muane, bati’na Ahab, la Kumangsanni nasang, la to mala’bi’na la to bitti’na dio lu to Israel.

⁹Attu iato iatu bati’na Ahab la Kupasusi bati’na Yerobeam, anakna Nebat, sia bati’na Baesa, anakna Ahia.

¹⁰Na iatu Izebel la nakande asu dio pa’lak Yizreel, na moi misa’ tau tae’ la male ullamunni. Nabungka’mi to mangura iato tu ba’ba, namale mallai.

¹¹Iatonna tassu’mo Yehu lako tu naninna taunna puangna, ma’kadami misa’ tu tau iato mai lako nakua: Manaman siarokoka? Ma’aparika na iate to bomboan sae umpellambi’iko? Mebalimi lako tau iato mai nakua: Inang mitandaimo tu tau susito sia buangan kadanna.

¹²Apa nakua tu tau iato mai: Buttokko, pokadan dukakanni. Ma’kadami nakua: Susito susite napokadanna’: namane unpokadanna’, kumua: Inde sia tu kadanNa PUANG: La kutokkoko dadi datunna to Israel.

¹³Madomi’mi pantan unnala sambu’na, naampa’imi tu lentekna dio to’ eran, napannonii tu napiri tanduk, anna metamba nakua: Yehumo tu datu.

¹⁴Susimo kasipakulu-kuluanna to tu Yehu, anakna Yosafat, anakna Nimsi la umbali Yoram. Na iatu Yoram sola mintu’ to Israel untorroimo Ramot, lili’na Gilead, la umpangeai tu kota iato unnea Hazael, datu Aram.

¹⁵Iatu datu Yoram sulemi lako Yizreel la umpopedampi bangkena, tu narua to Aram, tonna sirari Hazael, datu to Aram. Ma’kadami tu Yehu nakua: Iake susitu lanna penaanta, moi misa’ tau tae’ nadieloran tassu’ lan mai tondok la umparampo kareba lako Yizreel.

¹⁶Malemi ma’kareta tu Yehu lako Yizreel, belanna iatu Yoram masaki natorro dio. Nasae duka tu Ahazia, datu to Yehuda unto’longi.

¹⁷Bendanmi tu to ma’kampa dao menara dio Yizreel, anna tiroi tu baananna Yehu saemo, nakuami: Kutiromo tu tau sangbaanan. Ma’kadami tu Yoram nakua: Suako misa’ pakkanarang lao umpessitammui, ammu pekutananni kumua: Salama’ siarokomika?

¹⁸Malemi tu pakkanarang umpessitammui tu tau iato mai, sia nakua: Susite tu kadanna datu: Salama’ siarokomika? Mebalimi tu Yehu nakua: La mupa’apairi tu kasalamaran? Tibalikmoko muundi dio boko’ku! Naparampomi to ma’kampa nakua: Iatu to disua rampo sia lako, apa tae’ nasule.

¹⁹Nasua pole’omi tu pakkanarang senga’. Iatonna saemo lako, ma’kadami nakua: Susite tu kadanna datu: Salama’ siarokomika? Mebalimi tu Yehu nakua: La mupa’apairi tu kasalamaran? Tibalikmoko muundi dio boko’ku.

²⁰Naparampomi to ma’kampa lako nakua: Rampo sia tu to disua, apa tae’ nasule. Iatu tau umpalari tu darang susi bang Yehu, anakna Nimsi, belanna susito bomboan umpalarii.

²¹Nakuami tu Yoram: Palakoimi darang tu kareta. Naalami tau tu kareta, napalakoi darang. Ke’de’mi tu Yoram, datu to Israel sia Ahazia, datu to Yehuda, pantan dao karetana, anna tassu’ sola duai lao umpessitammui Yehu. Sitammumi dio pa’lakna Nabot, to Yizreel.

²²Iatonna tiromi Yoram tu Yehu, pakalan ma’kadami nakua: Salama’ siarokoka, Yehu? Mebalimi nakua: Umba la takua salama’, ke tontongpi tu gau’ salana Izebel, indo’mi sia mintu’ issan-issan makambanna?

²³Pakalan nabalikmi Yoram tu darangna, anna mallai, nama’kada lako Ahazia nakua: Denmo pa’tangnga’ leko’, Ahazia.

²⁴Natoemi Yehu tu pana, napanai tu Yoram, naruami tu kasiallaran buku sandukna, naurungan natarru’ tinaran tu buana, nasongka dao karetana.

²⁵Nakuami Yehu lako Bidkar, kamandangna: Angka’i ammu pentibeanni tama pa’lakna Nabot, to Yizreel. Belanna la mukilalai tonta ma’darang sola undi unturu’i tu Ahab, ambe’na, kumua Nasa’bu’mo PUANG te kada iate diona Ahab nakua:

²⁶Sangmai’ bongi Kutiroi tu rarana Nabot sola tu mai anakna, kadanNa PUANG. La Kupa’tuntunniko bala’na dao te pa’lak, kadanNa PUANG. Totemo angka’mi, ammu pentibeanni tama pa’lak iate, susitu kadanNa PUANG.

²⁷Iatonna tiromi Ahazia, datu to Yehuda, tu iannato, mallaimi umpempatui Bet-Hagan. Apa undi naula’ Yehu, nakua: Pongko dukai tu! Panai dao karetana! Napabasaimi tau dio lalan tuka’ langngan Gur, sikandappi’ Yibleam; mallaimi lako Megido, namate dio.

²⁸Napalangngammi kareta taunna tu batang rabukna datu, anna baai lako Yerusalem, anna dipeliang dipasola nene’ to dolona, lan kotana Daud.

²⁹Iatu Ahazia dadi datu umparenta to Yehuda, tonna taun ma’pessangpulo misa kadatuanna Yoram, anakna Ahab.

³⁰Rampomi tu Yehu lako Yizreel. Iatonna rangi Izebel tu iannato, nasilla’mi tu matanna sia nabeloi tu ulunna, nama’penunu dao mai pentiroan.

³¹Mane tama tu Yehu dio mai babangan kota, nakuami tu Izebel: Malaga’-laga’ siaraka tu Zimri, to umpatei puangna?

³²Mentiromi tu Yehu langngan pentiroan, nama’kada nakua: Mindara la unturu’na’? Mindara? Denmi dua, tallu to mase’ponna datu untiroi.

³³Nakuami tu Yehu: Pembuanganni rokko mai. Napembuanganni rokko, naurunganni tibura’ tu rarana lako rinding tembo’ sia lako to’ darang, sia napalungganakki Yehu.

³⁴Malemi tama tu Yehu, anna kumande sia mangiru’. Mangkato nakuami: Malekomi untiroi titi’ to ditampakki ropu ammi lamunni, belanna anak datu duka.

³⁵Malemi tu tau ullamunni, apa tae’ bangmora tu kalena naala, sangadinna kararo ulunna mannamo sia lentekna patomali sola limanna patomali.

³⁶Sulemi tu tau iato mai umpokadanni Yehu, nakuami Yehu: Susimote tu kadanNa PUANG nalopian Elia, to Tisbe, taunNa, nakua: Dao pa’lak dio Yizreel la nanii asu ungkandei tu duku’na Izebel,

³⁷sia iatu batang rabukna Izebel la susito pangangku’ padang dio pa’lak dio Yizreel, naurungan tang napokada lenmo tau kumua: Iamote tu Izebel!