Read Toraja-Sa'dan 1 OSSORANNA DATU 10 Bible Online

1 OSSORANNA DATU 10 - Toraja-Sa'dan bible

1 OSSORANNA DATU 10

¹Iatonna sirari to Filistin tu to Israel, mallaimi tu to Israel dio mai tingayona to Filistin sia budai tibambang dao buntu Gilboa.

²Naduttu’ bangmi to Filistin tu Saul sia napatei tu Yonatan, Abinadab na Malkisua, anakna muane Saul.

³Masarrangmi tu rari umpatu Saul; iatonna tiromi to ma’pana tu Saul, ma’parondomi ungkataku’i tu to ma’pana.

⁴Ma’kadami Saul lako bentarana nakua: Nonokki tu pa’dangmu, mutobokna’, ke da duka na iate to tang disunna’ sae unna’ga-a’gana’. Apa manoka tu pa’takinna, belanna lendu’ mataku’na la umpogau’i to. Naalami Saul tu pa’dang, anna songkanni tu kalena rokko.

⁵Iatonna tiromi pa’takinna tu Saul matemo, nasongkan dukaomi tu kalena rokko pa’dangna, anna mate.

⁶Matemi tu Saul sola tu anakna tallu sia mintu’ to lan banuanna mate sola.

⁷Iatonna tiromi mintu’ to Israel, tu torro dio padang marante, kumua mallaimo tu to Israel sia matemo tu Saul sola anakna muane tallu, natampemi tu mintu’ kotana anna mallai. Saemi tu to Filistin anna torro lan.

⁸Iatonna masiangmo dio mai, tonna saemo tu to Filistin urrampa apanna mintu’ to dipatei, naappa’mi tu Saul sola tu anakna muane tallu sumpandan bangmo dao buntu Gilboa.

⁹Narampami tu apanna, naalai tu ulunna sola pa’bunona, nasuai tu tau male ullelei tu lili’na tondok Filistin la umpatale’i tu kareba melo iato lako deatanna sia lako to buda.

¹⁰Iatu pa’bunona Saul napalan banua deatanna, apa iatu kararo ulunna napale’ke’ lako banuanna Dagon.

¹¹Iatonna rangimi mintu’ to Yabesh dio Gilead tu mintu’ penggauranna to Filistin lako Saul,

¹²ke’de’mi tu mintu’ surodadu, naalai tu batang rabukna Saul sia batang rabukna anakna, anna baai lako Yabesh anna lamunni tu bukunna diong garonto’ kayu tarpin dio Yabesh. Mangkato ma’puasami tu tau iato mai pitung allo.

¹³Susimoto tu kamateanna Saul, belanna tang maruru’ lako PUANG sia belanna tae’ napalan penaai tu kadanNa PUANG, ondongpi male mekutana sia umpalaku pa’timbangan lako bombo to mate,

¹⁴anna tae’ nalako PUANG nanii umpalaku pa’timbangan. Iamoto Napatei Puang, anNa benni Daud, anakna Isai tu kadatuanna.