Read Toraja-Sa'dan 1 OSSORANNA DATU 14 Bible Online

1 OSSORANNA DATU 14 - Toraja-Sa'dan bible

1 OSSORANNA DATU 14

¹Iatu Hiram, datu Tirus, ussua sumbungan pudukna lako Daud umbaa kayu arasi’ sia ba’tu pira-pira pande batu sia pande kayu, anna pabendanan Daud misa’ tongkonan layuk.

²Iatonna iato naissanmi Daud, kumua Napamanda’mo PUANG undatui to Israel, belanna dipamala’bi’ tu kadatuanna diona taunNa, iamotu to Israel.

³Naalaomi Daud tu ba’tu pira-pira baine dio Yerusalem anna padadianomi ba’tu pira-pira pia muane sia baine.

⁴Inde sia tu sanganna mintu’ anak dipadadianni dio Yerusalem, iamotu: Syamua, Sobab, Natan, Salomo,

⁵Yibhar, Elisua, Elpelet,

⁶Nogah, Nefeg, Yafia,

⁷Elisama, Beelyada na Elifelet.

⁸Iatonna rangimi to Filistin tu kareba tu diona Daud ditokko undatui mintu’ to Israel, ke’de’mi tu mintu’ to Filistin male undaka’ Daud la natingkan. Iatonna rangimi Daud tu dionato, malemi umpentammui.

⁹Saemi tu to Filistin anna sikarangan dio rante Refaim.

¹⁰Mekutanami Daud lako Puang Matua, nakua: La malera’ka ullaoi tu to Filistin, sia la Misorongraka tama limangku? Mebalimi tu PUANG Nakua: Malemoko, la Kusorong tu tau iato mai tama kuasammu.

¹¹Malemi tu tau iato mai lako Baal-Perasim; nataloi Daud inde to dio. Ma’kadami tu Daud nakua: Limangku Napoparea Naruang tangngai Puang Matua tu ualingku, susito uai ma’tu’ba’. Iamoto nasangai tau tu inan iato Baal-Perasim.

¹²Natampe dukami tau iato mai tu mintu’ rapang-rapang dipodeatanna inde to dio, anna pa’pesuanni Daud umballai api.

¹³Sae pole’omi tu to Filistin, anna sikarangan dio rante iato.

¹⁴Mekutanaomi Daud lako Puang Matua, anna ma’kada Puang Matua lako kalena Nakua: Da mulaoi dio mai boko’na; tigirikko, muurunganni ullaoi dio mai to’ garonto’ pinu’.

¹⁵Iake murangii tu oni butung to tumengka dao lolok pinu’, la maleoko sirari, belanna attu iato tassu’mo tu Puang Matua undoloangko, la untaloi tu surodadu to Filistin.

¹⁶Napogau’mi Daud susitu pepasanNa Puang Matua lako kalena; natalomi tu mintu’ to Filistin randuk dio mai Gibeon ma’palulako Gezer.

¹⁷Kaleleammi tu sanganna Daud lako mintu’ tondok, anNa pasaei PUANG tu katirambanan lan penaanna mintu’ bangsa ungkataku’ Daud.