Read Toraja-Sa'dan 1 OSSORANNA DATU 15 Bible Online

1 OSSORANNA DATU 15 - Toraja-Sa'dan bible

1 OSSORANNA DATU 15

¹Nagaragammi kalena Daud tu ba’tu pira-pira banua lan kotana Daud, napasakkarammi misa’ inan tu pattinNa Puang Matua anna pabendananni misa’ tenda.

²Attu iato nakuami Daud: Moi misa’ tau tae’ nama’din umbulle pattinNa Puang Matua sangadinna to Lewi, belanna tau iato mai tu Natonno’ PUANG la umbulle pattinNa PUANG sia la umpengkaolai sae lakona.

³Natambaimi Daud tu mintu’ to Israel ma’kombongan dio Yerusalem la umbaai tu pattinNa PUANG lako inan tu mangka napasakkaranni.

⁴Narampunmi Daud tu bati’na Harun sia to Lewi;

⁵iatu bati’na Kehat: iamotu Uriel, pangulu na mintu’ siulu’na, saratu’ duangpulo;

⁶bati’na Merari; Asaya, pangulu na mintu’ siulu’na, dua ratu’ duangpulo;

⁷bati’na Gerson: Yoël, pangulu na mintu’ siulu’na, saratu’ tallungpulo;

⁸bati’na Elsafan: Semaya, pangulu na mintu’ siulu’na, duaratu’;

⁹bati’na Hebron: Eliel, pangulu na mintu’ siulu’na, karua pulona;

¹⁰bati’na Uziel: Aminadab, pangulu na mintu’ siulu’na, saratu’ sangpulo dua.

¹¹Natambaimi Daud tu to minaa Zadok na Abyatar, sia to Lewi, iamotu Uriel, Asaya, Yoël, Semaya, Eliel na Aminadab.

¹²Ma’kadami tu datu lako tau iato mai nakua: Iate kamu pangulunna mintu’ to Lewi, pamaseroi tu kalemi, la kamu la iatu mai siulu’mi, ammi ma’din umbaai tu pattinNa PUANG, Kapenombanna to Israel lako inan, tu kupasakkaranni.

¹³Belanna tae’ mipogau’i to, tonna dolona, iamoto Naparampoiki’ kamandasan kapua PUANG, Kapenombanta, belanna tae’ tapalaku pa’timbanganNa, susitu sipato’na.

¹⁴Iamoto anna pemaseroi kalena tu mintu’ to minaa sia to Lewi la umpalelei tu pattinNa PUANG, Kapenombanna to Israel.

¹⁵Napadaomi palempengna to Lewi tu bullean pattinNa Puang Matua, nabullei susitu napasan Musa situru’ kadanNa PUANG.

¹⁶Mesuami tu Daud lako mintu’ pangulunna to Lewi kumua anna popa’tibangi tu siulu’na, iamotu to menani umbaa oni-onian, dandi, katapi na taa’-taa’, la umpannoni tanda pa’maruasan kaparannuan.

¹⁷Napopa’tibangmi to Lewi tu Heman, anakna Yoël, sia dio mai siulu’na, iamotu Asaf, anakna Berekhya, sia iatu bati’na Merari siulu’na, iamotu Etan, anakna Kusaya;

¹⁸sia iatu nasolan tau iato mai iamotu mintu’ siulu’na untoe pangka’ ma’penduan, iamotu: Zakharia, Ben, Yaaziel, Semiramot, Yehiel, Uni, Eliab, Benaya, Maaseya, Matica, Elifele, Mikneya, Obed-Edom na Yeiel, to ma’kampa babangan.

¹⁹Iatu to menani Heman, Asaf na Etan dipamanassa umbaa taa’-taa’ tambaga la napannoni.

²⁰Iatu Zakharia, Aziel, Semiramot, Yehiel, Uni, Eliab, Maaseya na Benaya dipamanassa umbaa dandi dipamadao oninna.

²¹Na iatu Matica, Elifele, Mikneya, Obed-Edom, Yeiel na Azazya dipamanassa umbaa katapi, dipasosso’ karua ton, la unnanta’i tu nanian.

²²Iatu Kenanya, pangulunna to Lewi, umbandoro’i to umpalele patti; ia umpasirundunan to umpalele patti, belanna ia to manarang.

²³Iatu Berekhya sola Elkana iamotu to ma’kampa babangan la ungkampai tu patti.

²⁴Na iatu to minaa Sebanya, Yosafat, Netaneel, Amasai, Zakharia, Benaya na Eliezer umpannoni tarompe’ dio tingayo pattinNa Puang Matua; na Obed-Edom na Yehia iamotu to ma’kampa babangan la ungkampai tu patti.

²⁵Attu iato malemi tu Daud, sia pekaamberanna to Israel na kamandangna to sangsa’bu ma’marua’-rua’ la umpalelei tu patti basseNa PUANG dio mai banuanna Obed-Edom.

²⁶Sia Natundui Puang Matua tu to Lewi, tu umbulle patti basseNa PUANG, iamoto napemalaranni tau iato mai tu pitu sapi laki na pitu domba laki.

²⁷Iatu Daud ma’bayu lamba’ lenang melo, susi duka tu mintu’ to Lewi, tu umbulle patti, to menani na Kenanya, tu umpangului to menani, tonna dipalele tu patti; na iatu Daud ma’bayu lenang.

²⁸Iatu mintu’ to Israel umbaa patti basseNa PUANG unnarrak-arrak sia umpannoni napiri tanduk, tarompe’ na taa’-taa’, sia ma’dandi na ma’katapi.

²⁹Iatonna rampomo tu patti basseNa PUANG lako kotana Daud, ta’kala mentiromi tu Mikhal anakna Saul, dao mai pentiroan banuanna, natiromi tu datu Daud tumbang-tumbang sia unnondo, nasayumi lan penaanna.