Read Toraja-Sa'dan 1 OSSORANNA DATU 18 Bible Online

1 OSSORANNA DATU 18 - Toraja-Sa'dan bible

1 OSSORANNA DATU 18

¹Mangkato natalomi Daud tu to Filistin, napopengkanorongi, sia narampa tu Gat sola lili’na dio mai to Filistin.

²Sia natalo duka tu Moab, naurunganni mengkanorong tu to Moab lako Daud sia umbaya’ sima.

³Sia natalo Daud tu Hadadezer, datu Zoba, sikandappi’ Hamat, tonna male umpabantang kuasanna dio lu salu Efrat.

⁴Narampami Daud tu sangsa’bu kareta parari dio mai datu iato, pitungsa’bu pakkanarang sia to lumingka duangpulo sa’bu; sia napa’pesuan Daud urra’ta’i tu ura’ lette’na mintu’ darang kareta, apa iatu saratu’ napopa’elo’na bang.

⁵Pakalan saemi tu to Aram dio mai Damsyik la untundui tu Hadadezer, datu Zoba, apa natalo Daud tu to Aram, anna mate duangpulo sa’bu.

⁶Mangkato napao’ko’imi Daud (pa’kampan surodadu) lan tu ba’tu pira-pira tondok dio Aram, lili’na Damsyik, anna mengkanorong tu to Aram lako Daud sia umbaya’ sima. Susimoto tu PUANG ungkamasei kapataloan tu Daud, umba-umba nanii male.

⁷Naalami Daud tu mintu’ balulang bulaan, tu napake mintu’ surodadunna Hadadezer nabaai lako Yerusalem.

⁸Sia lan mai Tibhat sia Kun, tondokna Hadadezer, nanii Daud unnala tambaga bu’dak. Na tambaga iato mai nagaragai Salomo tasik tambaga sia lentong da’dua sia mintu’ pareanan tambaga.

⁹Iatonna rangimi Tou, datu Hamat, kumua natalomo Daud tu mintu’ surodadunna Hadadezer, datu Zoba,

¹⁰nasuami tu Hadoram, anakna muane, umbaa ba’tu pira-pira pareanan bulaan, salaka sia tambaga, napennoloan lako Daud, la umpekutananni tu kamalaga’-lagaranna sia umparampo passalama’ lako kalena, belanna mangkamo urrarii Hadadezer anna taloi, belanna iatu Hadadezer tontong bang siea Tou.

¹¹Iatu mintu’ pareanan iato napamarimbangan datu Daud lako PUANG, sola tu mai bulaan, salaka, tu mangka narampa dio mai mintu’ bangsa, iamotu dio mai to Edom, to Moab, to Amon, to Filistin sia to Amalek.

¹²Iatu Abisai, anakna muane Zeruya, untalo to Edom, diong Lombok Ma’sin, namate sangpulo karua sa’bunna.

¹³Sia napao’ko’i pa’kampan surodadu tu tondok Edom, naurungan mengkanorong nasang tu mintu’ to Edom lako Daud. Nakamasei PUANG, kapataloan tu Daud umba-umba tu nanii male.

¹⁴Iatonna datuimi Daud tu mintu’ to Israel, untoemi salunna sia kamalamburan dio lu mintu’ taunna.

¹⁵Iatu Yoab, anakna Zeruya, iamo kamandang lompona surodadu, sia Yosafat, anakna Ahilud, pa’paelean;

¹⁶iatu Zadok, anakna Ahitub, sia Abimelekh, anakna Abyatar, iamoto minaa; iatu Sausa iamo pangulu to massura’.

¹⁷Na iatu Benaya, anakna Yoyada, iamo pangulunna to Kreti sia to Pleti; iatu mintu’ anakna muane Daud iamo pangulu to mase’ponna datu, tu nasiayokan datu.