Read Toraja-Sa'dan 1 OSSORANNA DATU 20 Bible Online

1 OSSORANNA DATU 20 - Toraja-Sa'dan bible

1 OSSORANNA DATU 20

¹Iatonna taun pole’omo, tu attu nanii datu biasa tassu’ parari, narampunmi Yoab tu mintu’ surodadunna sia nasolan la parari, anna sanggangi tu tondokna to Amon; iatonna mangkato malemi anna patama limbui tu Raba, apa iatu Daud torro dio Yerusalem. Natalomi Yoab tu kota Raba, nasanggangi.

²Naalami Daud tu makota dao mai ulunna datunna tau iato mai. Naappa’mi tu bulaanna sangtalenta timbanganna, nanii parimata intan dio, iatu makota iato dipasongkoran ulunna Daud. Sia buda duka pangrampa nabaa lan makota iato.

³Mintu’ tu to torro lan napesuan untassu’i sia napesuan umpasumpandanni diongna lu gare’ge’ sia diongna lu panglulluran bassi sia napesuan unta’tak-ta’takki uase. Susimoto tu penggauranna Daud lako mintu’ kota to Amon. Mangkato sulemi tu Daud sola mintu’ surodadu lako Yerusalem.

⁴Mangkato dirariimi tu to Filistin dio Gezer; attu iato napateimi Sibkhai, to Husa tu Sipai, bati’na Refa, anna taloi tu tau iato.

⁵Undinnato sirari pole’omi to Filistin, napateimi Elhanan, anakna Yair, tu Lahmi, siulu’na Goliat, to Gat; na iatu batang dokena sama tandaan to ma’tannun.

⁶Sia den pole’omi kasirarian dio Gat; den dio tu misa’ muane kala’dok sia iatu mai tangkena rundun siannan tu rakka’na patomali, mintu’na duangpulo nna’pa’; tau ia dukato bati’na Rafa.

⁷Natelle-telle tu to Israel, apa napatei Yonatan, anakna Simea, kakanna Daud.

⁸Tau iate mai bati’na Rafa dio Gat; iatu tau iato napatei Daud sola mintu’ to lalongna.