Read Toraja-Sa'dan 1 OSSORANNA DATU 25 Bible Online

1 OSSORANNA DATU 25 - Toraja-Sa'dan bible

1 OSSORANNA DATU 25

¹Napamarimbanganmi Daud sia kamandang surodadu lako pentoean kamenomban tu bati’na Asaf, Heman na Yedutun tu susito nabi ma’nubua’ ke marassanni umpannoni katapi, dandi sia taa’-taa’. Inde sia tu sura’ bilanganna tau untoe pentoean iato.

²Iatu anakna muane Asaf iamotu Zakur, Yusuf, Netanya na Asarela; mintu’i te anakna muane Asaf tu napangului Asaf, tu susito nabi ma’nubua’, tu napamanassa datu.

³Diona Yedutun, iatu anakna muane Yedutun iamotu Gedalya, Zeri, Yesaya, Hasabya na Matica, annanni, tu na-pangului ambe’na tu susito nabi ma’nubua’, ke marassanni umpannoni katapi umpudi sia umpakaraya PUANG.

⁴Diona Heman, iatu anakna muane Heman iamotu Bukia, Matanya, Uziel, Sebuel, Yerimot, Hananya, Hanani, Eliata, Gidalti, Romamti-Ezer, Yosbekasa, Maloti, Hotir na Mahaziot.

⁵Mintu’i te anakna muane Heman, to patanda-tandanna datu, tu umbattuananni kadanNa Puang Matua, la umpatarangga tandukna datu; Nakamasei Puang Matua tu Heman sangpulo a’pa’ muane na tallu baine.

⁶Mintu’i te napangului ambe’na unnala nanian lan banuanNa PUANG, ke umpannonii taa’-taa’, dandi na katapi, lan kamenomban lan banuanNa Puang Matua, tu napamanassa datu, iamotu napangului Asaf, Yedutun na Heman.

⁷Iatu bilanganna tau iato mai sola mintu’ siulu’na, tu diada’imo nanian umpudi PUANG, iamotu mintu’ manarangnamo, den duaratu’ karua pulona ngkarua.

⁸Ma’lotereimi tu tau iato mai la umboronganni tu pentoean, la adinna la kakanna, la to manarangna la to melada’pa.

⁹Pa’loterei bunga’na — lako anakna Asaf — Yusuf nakanna; iatu ma’penduanna iamotu Gedalya: ia sisola mintu’ siulu’na sia anakna muane: sangpulo duai.

¹⁰Iate ma’pentallunna iamotu Zakur, sola mintu’ anakna muane sia siulu’na: sangpulo duai.

¹¹Iatu ma’penna’pa’na iamotu Yizri, sola mintu’ anakna muane sia siulu’na: sangpulo duai.

¹²Iatu ma’pellimanna iamotu Netanya, sola mintu’ anakna muane sia siulu’na: sangpulo duai.

¹³Iatu ma’pennannanna iamotu Bukia, sola mintu’ anakna muane sia siulu’na: sangpulo duai.

¹⁴Iatu ma’pempitunna iamotu Yesarela, sola mintu’ anakna muane sia siulu’na: sangpulo duai.

¹⁵Iatu ma’pengkaruanna iamotu Yesaya, sola mintu’ anakna muane sia siulu’na: sangpulo duai.

¹⁶Iatu ma’pengkaseranna iamotu Matanya, sola mintu’ anakna muane sia siulu’na: sangpulo duai.

¹⁷Iatu ma’pessangpulona iamotu Simei, sola mintu’ anakna muane sia siulu’na: sangpulo duai.

¹⁸Iatu ma’pessangpulo misanna iamotu Azareel, sola mintu’ anakna muane sia siulu’na: sangpulo duai.

¹⁹Iatu ma’pessangpulo duanna iamotu Hasabya, sola mintu’ anakna muane sia siulu’na: sangpulo duai.

²⁰Iatu ma’pessangpulo tallunna iamotu Subael, sola mintu’ anakna muane sia siulu’na: sangpulo duai.

²¹Iatu ma’pessangpulo a’pa’na iamotu Matica, sola mintu’ anakna muane sia siulu’na: sangpulo duai.

²²Iatu ma’pessangpulo limanna iamotu Yeremot, sola mintu’ anakna muane sia siulu’na: sangpulo duai.

²³Iatu ma’pessangpulo annanna iamotu Hananya, sola mintu’ anakna muane sia siulu’na: sangpulo duai.

²⁴Iatu ma’pessangpulo pitunna iamotu Yosbekasa, sola mintu’ anakna muane sia siulu’na: sangpulo duai.

²⁵Iatu ma’pessangpulo karuanna iamotu Hanani, sola mintu’ anakna muane sia siulu’na: sangpulo duai.

²⁶Iatu ma’pessangpulo kaseranna iamotu Maloti, sola mintu’ anakna muane sia siulu’na: sangpulo duai.

²⁷Iatu ma’penduangpulona iamotu Eliata, sola mintu’ anakna muane sia siulu’na: sangpulo duai.

²⁸Iatu ma’penduangpulona mmisa iamotu Hotir, sola mintu’ anakna muane sia siulu’na: sangpulo duai.

²⁹Iatu ma’penduangpulona ndua iamotu Gidalti, sola mintu’ anakna muane sia siulu’na: sangpulo duai.

³⁰Iatu ma’penduangpulona ntallu iamotu Mahaziot, sola mintu’ anakna muane sia siulu’na: sangpulo duai.

³¹Iatu ma’penduangpulona nna’pa’ iamotu Romamti-Ezer, sola mintu’ anakna muane sia siulu’na: sangpulo duai.