Read Toraja-Sa'dan 1 OSSORANNA DATU 27 Bible Online

1 OSSORANNA DATU 27 - Toraja-Sa'dan bible

1 OSSORANNA DATU 27

¹Inde sia tu bilanganna mintu’ to Israel situru’ pangulu rapunna sia kamandangna sangsa’bu tau sia kamandangna saratu’ tau sia to ma’parentana, tu umpengkaolai datu lan mintu’ pengkarangan dio golonganna surodadu, tu bulanoi tamaoi sia maleoi; susi bang to sipeupu’ bulan lan sang taun; iake sanggolonganoi den duang pulo nna’pa’sa’bunna.

²Iatu pangulu tuntunan bunga’na lan tu bulan bunga’, iamotu Yasobam, anakna Zabdiel; mintu’ to nalili’ tuntunanna den duangpulo nna’pa’ sa’bu;

³iamo bati’na Peres sia pangulunna mintu’ kamandang surodadu lan bulan bunga’na.

⁴Iatu pangulu tuntunan lan bulan ma’penduanna, iamotu Dodai, to Ahohi, sia ia duka tu nalili’ tuntunanna, iamo arung Miklot; mintu’ to nalili’ tuntunanna den duangpulo nna’pa’ sa’bu.

⁵Iatu kamandang surodadu ma’pentallunna lan bulan ma’pentallunna iamotu Benaya, anakna Yoyada, tominaa kapua; mintu’ to nalili’ tuntunanna den duangpulo nna’pa’ sa’bu.

⁶Benaya iamote tu misa’ pa’barani dio mai to pa’barani tallungpulo sia pangullunna tau tallungpuloi; sia (naala duka lili’) tuntunanna tu Amizabad, anakna.

⁷Iatu ma’penna’pa’na lan bulan ma’penna’pa’na iamotu Asael, siulu’na Yoab, naundinna to Zebaja, anakna muane Asael; mintu’ to nalili’ tuntunanna den duangpulo nna’pa’ sa’bu.

⁸Iatu ma’pellimanna lan bulan ma’pellimanna iamotu kamandang Samhut, to Yizrah; mintu’ to nalili’ tuntunanna den duangpulo nna’pa’sa’bu.

⁹Iatu ma’pennannanna lan bulan ma’pennannanna iamotu Ira, anakna Ikesh, to Tekoa; mintu’ to nalili’ tuntunanna den duangpulo nna’pa’ sa’bu.

¹⁰Iatu ma’pempitunna lan bulan ma’pempitunna iamotu Heles, to Peloni, bati’na Efraim; mintu’ to nalili’ tuntunanna den duangpulo nna’pa’ sa’bu.

¹¹Iatu ma’pengkaruanna lan bulan ma’pengkaruanna iamotu Sibkhai, to Husa, bati’na Zerah; mintu’ to nalili’ tuntunanna den duangpulo nna’pa’ sa’bu.

¹²Iatu ma’pengkaseranna lan bulan ma’pengkaseranna iamotu Abiezer, to Anatot, bati’na Benyamin; mintu’ to nalili’ tuntunanna den duangpulo nna’pa’ sa’bu.

¹³Iatu ma’pessangpulona lan bulan ma’pessangpulona iamotu Maharai, to Netofa, bati’na Zerah; mintu’ to nalili’ tuntunanna den duangpulo nna’pa’ sa’bu.

¹⁴Iatu ma’pessangpulo misanna lan bulan ma’pessangpulo misanna iamotu Benaya, to Piraton, bati’na Efraim, mintu’ to nalili’ tuntunanna den duangpulo nna’pa’ sa’bu.

¹⁵Iatu ma’pessangpulo duanna lan bulan ma’pessangpulo duanna iamotu Heldai, to Netofa, bati’na Otniel; mintu’ to nalili’ tuntunanna den duangpulo nna’pa’ sa’bu.

¹⁶Inde sia tu mintu’ pangulunna suku to Israel, iamotu arung Eliezer, anakna Zikhri, dio to Ruben Sefaca, anakna Maakha, dio to Simeon;

¹⁷Hasabya, anakna Kemuel, dio to Lewi; Zadok dio bati’na Harun;

¹⁸Elihu, misa’i dio mai siulu’na Daud, dio to Yehuda; Omri, anakna Mikhael, dio to Isakhar;

¹⁹Yismaya, anakna Obaja, dio to Zebulon; Yerimot, anakna Azriel, dio to Naftali;

²⁰Hosea, anakna Azazya, dio to Efraim; Yoël, anakna Pedaya, dio sangsesena suku Manasye;

²¹Yido, anakna Zakharia, dio sangsesena suku Manasye, lan lili’na Gilead; Yaasiel, anakna Abner, dio to Benyamin;

²²Azareel, anakna Yeroham, dio to Dan; iamote tu mintu’ pangulunna suku to Israel.

²³Tae’ napaalai bilangan Daud tu mai to duangpulo taunna sia to tang ganna’ duangpulo taunna, belanna mangkamo Napokada PUANG, kumua Ia la umpopemba’ka’ kalle-kalleanmi tu to Israel susi bintoen dao langi’.

²⁴Naparandukmo Yoab anakna Zeruya, umbilangi, apa tae’ napatarru’i, belanna bannang inde to narampo tu kasengkean lako to Israel. Iamoto iatu bilangan iato tae’ nadipatama sura’ ossoranna datu Daud.

²⁵Iatu pangulunna mintu’ pa’palumpunanna datu, iamotu Azmawet, anakna Adiel; iatu pangulunna pa’palumpunan dio lu padang, lan lu kota, lan lu kampong sia lan lu tambakuku, iamotu Yonatan, anakna Uzia.

²⁶Iatu pangulunna mintu’ to lako padang, tu to umbungka’ padang, iamotu Ezri, anakna Kelub.

²⁷Iatu pangulunna mintu’ pa’lak anggoro’, iamotu Simei, to Rama; iatu pangulunna mintu’ pa’palumpunan anggoro’ lan pa’lak anggoro’, iamotu Zabdi, to Syifmi.

²⁸Iatu pangulunna mintu’ kayu saitun sia mintu’ kayu ara pangala’ diong Padang Merrantena, iamotu Baal-Hanan, to Gederi; na Yoas pangulunna tu mintu’ pa’palumpunan minna’.

²⁹Iatu pangulunna mintu’ sapi, tu dilaai dio lu Saron, iamotu Sitrai, to Saron, apa iatu pangulunna mintu’ sapi diong lu lombok, iamotu Safat, anakna Adlai.

³⁰Iatu pangulunna mintu’ unta, iamotu Obil, to Ismael; na pangulunna mintu’ keledai birang, iamotu Yehdeya, to Meronot.

³¹Iatu pangulunna mintu’ domba sola bembe’, iamotu Yazis, to Hagri. Iamote tu mintu’ pangulunna apanna datu Daud.

³²Iatu Yonatan, pa’amberanna Daud, iamo pa’bisara, misa’ to matarru’ sia to umpoissan sura’-sura’; na Yehiel, anakna Hakhmoni, ungkampai anakna muane datu.

³³Iatu Ahitofel pa’bisaranna duka datu, na iatu Husai, to Arki, iamo marengke’na datu;

³⁴na iatu dampi’na Ahitofel, iamotu Yoyada, anakna Benaya na Abyatar. Na iatu kamandang lompona datu, iamotu Yoab.