Read Toraja-Sa'dan 1 OSSORANNA DATU 4 Bible Online

1 OSSORANNA DATU 4 - Toraja-Sa'dan bible

1 OSSORANNA DATU 4

¹Iatu anakna muane Yehuda iamotu Peres, Hezron, Karmi, Hur na Syobal.

²Reaya, anakna Syobal, undadian Yahat, na Yahat undadian Ahumai na Lahad; iamote tu pa’rapuanna to Zora.

³Inde sia tu anakna muane Etam, iamotu Yizreel, Isma na Idbas; na iatu anak daranna disanga Hazlelponi;

⁴sia Pnuel, ambe’na Gedor na Ezer, ambe’na Husa. Iamote tu anakna muane Hur, pa’bunga’na Efrata, ambe’na Betlehem.

⁵Asyur, ambe’na Tekoa, da’dua bainena, iamotu Hela na Naara.

⁶Na Naara undadianni tu Ahuzam, Hefer, to Temeni na to Ahastari: iamote tu anakna muane Naara.

⁷Iatu anakna muane Hela iamotu Zeret, Yezohar na Etnan,

⁸Kos undadian Anub na Hezobeba, sia ia duka tu bati’na Aharhel, anakna Harum.

⁹Na ia tu Yabes iamo dikasiri’na na mintu’ siulu’na; nasangaimi indo’na Yabes, belanna nakua: masussa kudadian.

¹⁰Meongli’mi tu Yabes lako Kapenombanna to Israel nakua: Ke ma’dinni Mipamasakke tonganna’i sia Mipakalua’ tu lili’ku, sia narondongna’ limamMi, sia patoyangi dio mai kaleku tu kamandasan, naurunganni tae’ naruana’ kamasolangan! Nakamaseammi Puang Matua tu apa napalaku.

¹¹Iatu Kelub, siulu’na Suha, undadian Mehir; iamote tu ambe’na Eston.

¹²Iatu Eston undadian Bet-Rafa, Paseah na Tehina, ambe’na Ir-Nahas; iamote tu to Rekha.

¹³Iatu anakna muane Kenas iamotu: Otniel na Seraya; iatu anakna Otniel iamotu Hatat na Meonotai.

¹⁴Iatu Meonotai undadian Ofra. Iatu Seraya undadian Yoab, ambe’na mintu’ to umpa’tondokki lombok Pande, belanna iatu tau iato mai pande nasangi.

¹⁵Iatu anakna muane Kaleb, anakna Yefune, iamotu Iru, Ela na Naam, na iatu anakna muane Ela iamotu Kenas.

¹⁶Iatu anakna muane Yehalelel iamotu Zif, Zifa, Tireya na Asareel.

¹⁷Iatu anakna muane Ezra iamotu Yeter, Mered, Efer na Yalon. Inde sia tu anakna Bica, anakna baine Firaun, tu napobaine Mered: nadadianni tu Miryam, Samai na Yisbah, ambe’na Estemoa.

¹⁸Na iatu baine, to Yehuda undadian Yered, ambe’na Gedor, Heber, ambe’na Sokho, na Yekutiel, ambe’na Zanoah.

¹⁹Iatu anakna muane, bainena Hodia, anak daranna Naham iato tu Abi-Kehila, to Garmi, na Estemoa, to Maakha.

²⁰Iatu anakna muane Simon iamotu Amnon, Rina, Benhanan na Tilon; iatu anakna muane Yisei iamotu Zohet na Ben-Zohet.

²¹Iatu anakna muane Sela, anakna muane Yehuda iamotu Er, ambe’na Lekha, Lada, ambe’na Maresa, sia bati’na to ma’tannun lenang dio mai Bet-Asybea.

²²Sia Yokim na to Kozeba; Yoas na Saraf tu umparenta Moab; na Yasubi-Lehem — iamote tu ulelean dadi dolo-dolona.

²³Iatu tau iato mai to ma’tampa kurin, umpa’tondokki Netaim na Gedera; iatu tau iato mai torro sikandappi’ datu sia untoean pengkaranganna datu.

²⁴Iatu anakna muane Simeon iamotu Nemuel, Yamin, Yarib, Zerah na Saul;

²⁵na iatu anakna muane iamotu Salum, na iatu anakna muane Salum iamotu Mibsam, na iatu anakna muane Mibsam iamotu Misma.

²⁶Na iatu anakna muane Misma iamotu Hamuel, na iatu anakna muane Hamuel iamotu Zakur, na iatu anakna muane Zakur iamotu Simei.

²⁷Iatu anakna muane Simei sangpulo annan muane na annan baine; apa iatu siulu’na muane tae’ nabuda anakna muane. Iatu mintu’ rapu lan pa’rapuanna tae’ namarapuan susi bati’na Yehuda.

²⁸Napa’tondokkimi tau iato mai tu Bersyeba, Molada, Hazar-Sual,

²⁹Bilha, Ezem, Tolad,

³⁰Betuel, Horma, Ziklag,

³¹Bet-Markabot, Hazar-Susim, Bet-Biri na Saaraim. Mintu’nate, napokota tau iato mai sae lako dadinna datu tu Daud.

³²Sia iatu inan napa’tondokki iamotu Etam, Ain, Rimon, Tokhen na Asan, lima kota;

³³sia ia duka tu mintu’ inan napa’tondokki tiku lao kota iato sae lako Baal. Iamote mai tu inan nanii torro. Manda’ natoe tau iato mai tu Sura’ ossoranna.

³⁴Na Mesobab, Yamlekh, Yosa, anakna muane Amazia,

³⁵Yoël, Yehu — anakna muane Yosibya, anakna muane Seraya, anakna muane Asiel — ,

³⁶Elyoënai, Yaakoba, Yesohaya, Asaya, Adiel, Yesimiel, Benaya,

³⁷na Ziza — anakna muane Sifei, anakna muane Alon, anakna muane Yedaya, anakna muane Simri, anakna muane Semaya — ,

³⁸mintu’ tu tau iato mai tu disa’bu’ sanganna, arung lan pa’rapuanna. Iatu bati’na memba’ka’ kalle-kallean;

³⁹iamoto malemi tu tau iato mai ma’palulako rampe matampu’ Gedor sae lako rampe matallona lombok iato, la undakaran inan kariuan dombana sia bembe’na.

⁴⁰Nakabu’tuimi tau iato mai tu padang malompo sia melo; iatu padang iato maluangan liu, sia manaman sia marampa’, moi na iatu tau untorroi dolona bati’na Ham.

⁴¹Iatu mintu’ tau, tu disura’ sanganna, saemo tonna linona Hizkia, datu to Yehuda, nasanggangi tu tendana sia natalo tu to Meunim tu naapparan inde to dio. Nasabu’i tu tau iato mai sae lako allo iate, anna male tama umpa’tondokki tu tondokna, belanna inde to dio silasa tu riu nakande dombana sia bembe’na.

⁴²Sangtaan duka dio mai bati’na Simeon, iamotu limaratu’ tau male langngan buntu Seir, na iatu pangulunna iamotu Pelaca, Nearya, Refaya na Uziel, anakna Yisei.

⁴³Napatei tau iato mai tu to Amalek torronapa, tu lussu’ dolona, anna ma’tondok dio sae lako totemo.