Read Toraja-Sa'dan 1 OSSORANNA DATU 5 Bible Online

1 OSSORANNA DATU 5 - Toraja-Sa'dan bible

1 OSSORANNA DATU 5

¹Iatu anakna muane Ruben, pa’bunga’na Israel, belanna iamo pa’bunga’, apa belanna mangka urrutai kamammaranna ambe’na, iamoto na iatu katonganan anak pa’bunga’ dibengan lu lakomo anakna muane Yusuf, anakna muane Israel — apa lan sura’ ossoran tae’ nadisura’, kumua ia anak pa’bunga’;

²moi Yehuda tu matoto’na dio lu mintu’ siulu’na sia misa’i dio mai bati’na tu dadi datu, apa iatu katonganan anak pa’bunga’ napotaa Yusuf — ,

³iatu anakna muane Ruben, pa’bunga’na Israel, iamotu Henokh na Palu, Hezron na Karmi.

⁴Iatu anakna muane Yoël iamotu Semaya, anakna muane, na iatu anakna muane Semaya iamotu Gog, na iatu anakna muane Gog iamotu Simei,

⁵na iatu anakna muane Simei iamotu Mikha na iatu anakna muane Mikha iamotu Reaya, na iatu anakna muane Reaya iamotu Baal,

⁶na iatu anakna muane Baal iamotu Beera, tu napali’ Tiglat-Pilneser, datu Asyur; iamo arungna bati’na Ruben.

⁷Iatu siulu’na situru’ pa’rapuanna, tu disura’ lan sura’ situru’ ossoranna, iamotu Yeiel, pangulunna, Zakharia,

⁸na Bela, anakna Azas, anakna Sema, anakna Yoël; iamo umpa’tondokki Aroër sia sae lako Nebo na Baal-Meon;

⁹sia dio rampe matallo nanii ma’tondok siundu’ biringna padang pangallaran, tu randuk dio mai salu Efrat; belanna iatu patuoanna samemba’ka’-ba’ka’na dio lu padang Gilead.

¹⁰Iatonna linona Saul sirarimi tau iato mai tu to Hagri; iatonna talomi, torromi lan tendana dio mintu’ lili’na Gilead rampe matallona.

¹¹Iatu bati’na Gad ma’tondokmo sitingayo tau iato mai dio padang Basan sae lako Salkha.

¹²Iatu Yoël iamo pangulunna, na Safam ma’penduanna; ia duka tu Yaenai na Safat ma’tondok dio Basan.

¹³Iatu mintu’ siulu’na situru’ rapunna iamotu Mikhael, Mesulam, Syeba, Yorai, Yakan, Ziya na Eber, pitui.

¹⁴Mintu’nate anakna muane Abihail, anakna muane Huri, anakna muane Yaroah, anakna muane Gilead, anakna Muane Mikhael, anakna muane Yesisai, anakna muane Yahdo, anakna muane Bus.

¹⁵Ahi, anakna muane Abdiel, anakna muane Guni, iamotu pangulunna rapunna.

¹⁶Napa’tondokimi tau iato mai tu Gilead sia Basan sia mintu’ lili’na sia mintu’ padang kariuan randuk dio mai Saron sae lako tampakna.

¹⁷Mintu’na tau iato mai dipatama sura’ ossoran tonna linona Yotam, datu Yehuda, sia Yerobeam, datu Israel.

¹⁸Iatu bati’na Ruben na bati’na Gad na sesena suku Manasye, tu ma’din parari — tu to untetang balulang sia pa’dang, tu to ma’pana sia manarang parari — patangpulo nna’pa’sa’bu’ pituratu’ annan pulona, tu ma’din tama kapararian.

¹⁹Iatu tau iato mai sirari to Hagri na Yetur, to Nafish na to Nodab.

²⁰Ditunduimi tu tau iato mai sirari to Hagri, naurunganni iatu to Hagri sola mintu’ solana disorong tama limanna, belanna meongli’ lan kasirarian lako Puang Matua, anNa perangii tu pasambayangna, belanna ma’rannuan lako.

²¹Narampami tu patuoanna, iamotu unta limangpulo sa’bu, domba duaratu’ llimangpulo sa’bu, keledai duangsa’bu sia tau saratu’ sa’bu —

²²sia buda tau mate, belanna rari iato lu dio mai Puang Matua; — torromi tu tau iato mai lan inanna sae lako malena dipali’.

²³Iatu mintu’ bati’ sangsesena suku Manasye torro lan tondok iato; memba’ka’mi randuk dio mai Basan sae lako Baal-Hermon, Senir sia buntu Hermon.

²⁴Inde sia tu pangulu rapunna, iamotu Hefer, Yisei, Eliel, Azriel, Yeremia, Hodawya na Yahdiel, to lalong, tu kalelean sanganna, pangulu rapunna.

²⁵Apa tau iato mai tang maruru’ lako Kapenombanna nene’ to dolona sia ma’gau’ salamo unturu’ deatanna mintu’ bangsa lan tondok, tu mangka Nasabu’i Puang Matua dio tingayona.

²⁶Iamoto Napatiakka’i Kapenombanna to Israel tu penaanna Pul, datu Asyur, iamotu penaanna Tiglat-Pilneser, datu Asyur, naurunganni umpali’i tu tau iato mai, iamotu to Ruben, to Gad na sangsesena suku Manasye. Anna palelei lako Halah, Habor, Hara na salu Gozan, tu nanii torro sae lako allo iate.