Read Toraja-Sa'dan 2 OSSORANNA DATU 11 Bible Online

2 OSSORANNA DATU 11 - Toraja-Sa'dan bible

2 OSSORANNA DATU 11

¹Iatonna rampomo tu Rehabeam lako Yerusalem, naarakmi tu mintu’ bati’na Yehuda sia bati’na Benyamin, den saratu’ karuapulona sa’bu, to mangura, tu manakka parari la urrarii to Israel, kumua anna pasulei tu kadatuan lako Rehabeam.

²Apa rampo tu kadanNa PUANG lako Semaya, taunNa Puang Matua, nakua:

³Pokadanni Rehabeam, anakna Salomo, datu Yehuda, sia mintu’ to Israel lan lili’na Yehuda sia Benyamin, kumua:

⁴Inde sia tu kadanNa PUANG: Da milaoi ba’tu urrarii tu mai sangsiulurammi. Sangadinna pantan la sulekomi lako to’ banuammi, belanna tete dio Aku anna dadi tu apa iate. Naturu’mi tau iato mai tu kadanNa PUANG, anna sule, sia tae’mo nalaoi tu Yerobeam.

⁵Torromi tu Rehabeam dio Yerusalem sia nabangun tu ba’tu pira-pira kota ditambakuku lan Yehuda;

⁶nabangun tu Betlehem sia Etam sia Tekoa.

⁷Sia Bet-Zur sia Sokho sia Adulam,

⁸sia Gat sia Mares sia Zif,

⁹sia Adoraim sia Lakhis sia Azeka,

¹⁰sia Zora sia Ayalon na Hebron; mintu’nato iamo kota ditambakuku lan lili’na Yehuda sia Benyamin.

¹¹Napematoto’imi tu mintu’ benteng, napalanni tu kamandang sia napannii kinallo sia minna’ sia uai anggoro’;

¹²senga’pi, ke misa’oi kota napalan duka tu ba’tu pira-pira balulang sia doke. Napematoto’i tongan tu kota iato. Nasusito iatu Yehuda sia Benyamin nalili’ parentana.

¹³Iatu mintu’ to minaa sia to Lewi tu dio lu mintu’ tondok Israel, ke’de’ dio mai mintu’ lili’ tondokna sirampun lako kalena.

¹⁴Iatu to Lewi natampe tu mintu’ padang kariuanna sia mintu’ barang apanna, anna male lako tondok Yehuda sia lako Yerusalem, belanna nasuale Yerobeam sia mintu’ anakna tu tau iato, naurunganni tae’mo nama’din untoe pentoean menomba lako PUANG.

¹⁵Belanna naangka’mo Yerobeam tu ba’tu pira-pira tau napotominaa la menomba dao inan madao sia menomba lako ampu padang sia lako anak sapi nagaragai.

¹⁶Undinnato dio mai mintu’ suku to Israel ba’tu pira-piramo tau unturu’ to Lewi, tu umpamatu’tunmo penaanna la umpennoloi PUANG, Kapenombanna to Israel, rampomo lako Yerusalem la memala’ lako PUANG, tu Kapenombanna nene’ to dolona.

¹⁷Napematoto’i tau iato mai tu kadatuan Yehuda sia umpamanda’ Rehabeam, anakna Salomo, lan tallung taun, belanna tallung taun nanii unturu’i tu bate lalanna Daud sola Salomo.

¹⁸Napobainemi Rehabeam tu Mahalat, anakna Yerimot, anakna muane Daud, ma’indo’ Abihail, anakna Eliab, anakna muane Isai.

¹⁹Napadadiammi pia muane iamotu Yeush, Semarya na Zaham.

²⁰Undinnato umpobaineomi Maakha, anakna Absalom; nadadianni tu Abia, Atai, Ziza na Selomit.

²¹Napalosongammi penaa Rehabeam tu Maakha, anakna Absalom, mandu na iatu mintu’ bainena sia gundi’na, belanna iatu bainena sangpulo karua na iatu gundi’na annan pulona; na iatu anakna muane duangpulo ngkarua na iatu anakna baine annan pulona.

²²Iatu Abia, anakna Maakha, natappu Rehabeam anna padadi pangulu, iamo arung dio lu mintu’ siulu’na, belanna iamo la naangka’ datu.

²³Matarru’mi lan penggauranna tu datu sia natale’ tu mai anakna muane dio lu mintu’ lili’na Yehuda sia Benyamin, lan lu mintu’ kota ditambakuku; anna benni kande lendu’ budanna sia napakebaine sibuda.