Read Toraja-Sa'dan 2 OSSORANNA DATU 12 Bible Online

2 OSSORANNA DATU 12 - Toraja-Sa'dan bible

2 OSSORANNA DATU 12

¹Iatonna pabantangmi Rehabeam tu kadatuanna sia matoto’mo, naboko’imi tu Sukaran alukNa PUANG sola mintu’ to Israel.

²Iamoto iatonna taun ma’pellimanna Rehabeam ma’parenta, saemi Sisak, datu Mesir, ullaoi tu Yerusalem, belanna tang maruru’mo tu tau iato mai lako PUANG,

³sibaa kareta parari sangsa’bu duaratu’ sia pakkanarang annan pulona sa’bu sia mintu’ surodadu tu nasisolan sae dio mai Mesir, tang dikemba’ diia’, iamotu to Libia, to Suki sia to Etiopia.

⁴Natalomi tu mintu’ kota ditambakuku tu nalili’ Yehuda, natarru’ lako Yerusalem.

⁵Attu iato saemi tu Nabi Semaya mennolo lako Rehabeam sia mintu’ pangulu to Yehuda, tu sirampun dio Yerusalem diona tu kasaeanna Sisak sia ma’kada lako tau iato mai nakua: Inde sia tu kadanNa PUANG: Belanna miboko’iMo’, iamoto Kuboko’i dukakomi sia la Kusorongkomi tama limanna Sisak.

⁶Attu iato umpamadiongammi kalena tu mintu’ pangulunna to Israel sia iatu datu, anna ma’kada nakua: Iatu PUANG malambu’.

⁷Iatonna tiromi PUANG kumua umpamadiongammo penaanna tu tau iato mai, saemi tu kadanNa PUANG lako Semaya nakua: Belanna umpamadiongammo penaanna tu tau iato mai, iamoto tae’mo Kula ummangsanni, sangadinna la Kukamasei kadirampanan madoi’, naurungan tae’mo Kula umbarrakan kasengkeangKu lako Yerusalem umpoparea limanna Sisak.

⁸Apa iatu tau iato mai la napotau Sisak, naurunganni untandai tu kasisengaranna kamengkaolan lako Kaleku na kamengkaolan lako mintu’ kadatuan iato.

⁹Ke’de’mi tu Sisak, datu Mesir, ullaoi Yerusalem, narampami tu mintu’ pareanan lan banuanNa PUANG sia mintu’ pareanan lan tongkonan layukna datu, napoli’ nasang. Naala duka tu mintu’ balulang bulaan tu nagaragai Salomo.

¹⁰Nagaragami Rehabeam tu ba’tu pira-pira balulang tambaga la sondana, anna patageranni kamandang to ma’kampa, tu ungkampai babangan tongkonan layukna datu.

¹¹Iake maleoi tu datu lako banuanNa PUANG, naalaomi to ma’kampa tu balulang iato, undinna to napasuleomi tama bilikna to ma’kampa.

¹²Belanna umpamadiongammo penaanna, soro’mi tu kasengkeanNa PUANG dio mai kalena, iamoto natae’ sia Nasanggangi nasangi. Dio lu to Yehuda denpa tu ba’tu pira-pira apa melo.

¹³Iatu datu Rehabeam umpamatoto’ parentana dio Yerusalem. Patangpulomo mmisa taunna Rehabeam, tonna dadi datu, anna sangpulo pitu taunna ma’parenta dio Yerusalem, iamotu kota Napilei langsa’ PUANG dio lu mintu’ suku Israel, la Nanii umpatulangdan sanganNa. Iatu indo’na disanga Naama, to Amon.

¹⁴Napogau’ tu apa kadake, belanna tae’ natontong tu penaanna la undaka’ PUANG.

¹⁵Iatu mintu’ tuna’na Rehabeam, la iatu dolona la iatu undinna, tang tisura’moraka lan sura’ tuna’, nakarang nabi Semaya sia Ido, to patanda-tandan, unturu’ sura’ ossoranna? Tontong bang tu kasirarianna Rehabeam na Yerobeam.

¹⁶Mangkato malemi tama batu dilobang tu Rehabeam sola nene’ to dolona, anna dipeliang lan kotana Daud. Anna Abia, anakna muane, ussondai dadi datu.