Read Toraja-Sa'dan 2 OSSORANNA DATU 13 Bible Online

2 OSSORANNA DATU 13 - Toraja-Sa'dan bible

2 OSSORANNA DATU 13

¹Iatonna ma’sangpulo karuamo taunna datu tu Yerobeam, dadimi datu tu Abia, umparenta to Yehuda.

²Tallung taun ma’parenta dio Yerusalem; na iatu indo’na disanga Mikhaya, anakna Uriel, to Gibea. Sirari bangmi Abia tu Yerobeam.

³Untananmi ra’ tu Abia sola pa’barani lalong a’pa’ratu’ sa’bunna surodadu, anna iatu Yerobeam ma’pampangammo la mangea sola pa’barani lalong karua ratu’ sa’bunna surodadu.

⁴Attu iato bendanmi tu Abia dao tanete Zemaraim dio lu buntu Efraim, nama’kada nakua: Perangiina’, Yerobeam sia mintu’ to Israel.

⁵Tang miissanraka, kumua iatu PUANG, Kapenombanna to Israel, ussorongan kadatuan Israel lako Daud sae lakona la ia, la ia tu mai bati’na, umpobasse sia?

⁶Apa iatu Yerobeam, anakna Nebat, taunna Salomo, anakna Daud, bendan umbali puangna.

⁷Sirampunmi dio tu ba’tu pira-pira to tae’ gai’na sia to bulituk, tu ussau’ Rehabeam, anakna Salomo, tonna mangurapa tu Rehabeam sia malamma’pa penaanna, naurungan tang nakullepa unneai tu tau iato mai.

⁸Totemo misanga la misau’ tu kadatuanNa PUANG, tu lan limanna bati’na Daud, belanna to budakomi sia miampui tu anak sapi bulaan, tu napadadiangkomi Yerobeam la mipokapenomban.

⁹Tang milolairaka tu to minaanNa PUANG, iamotu mai bati’na Harun sia mintu’ to Lewi, ammi tappuan to minaa kalemi, susitu mintu’ bangsa senga’? Minda-minda tu sae la ditokko anna umbaa misa’ sapi laki mangura sia pitu domba laki, iamoto tu ditappu to minaanna tu tangia kapenomban.

¹⁰Apa iatu kami te, PUANG kami tu Kapenombangki, tae’ kiboko’i; iatu mai bati’na Harun iamoto minaa umpengkaolai PUANGna iatu mintu’ to Lewi untoe pentoeanna.

¹¹Iake melambi’ sia makaroen natunuan PUANG tu pemala’ ditunu pu’pu’ sia dupa busarungngu’; naparandananni tu roti dipennoloan dao meda masero sia tongkonan palita bulaan sola palitanna la dipaudukku ke bongioi. Belanna kikaritutui tu apa Napasanangkan PUANG, Kapenombangki, apa iatu kamu miboko’imo.

¹²Manassa iatu Puang Matua undoloangkan, sia iatu mai to minaanNa umbaa tarompe’ kapua oninna, la dipannoni umpatirambankomi. Da’ ammi sirarianni tu PUANG, Kapenombanna nene’ to dolomi, e bati’na Israel, belanna tae’ ammi la maupa’.

¹³Nasuami Yerobeam tu ba’tu pira-pira surodadunna ullaoi dio mai boko’, naurungan ta’pa bu’tu dio boko’na tu to palaoan, anna (iatu surodadu senga’) bendan dio tingayona to Yehuda, na iatu to palaoan dio mai boko’ diomo boko’na.

¹⁴Iatonna messailemo tu to Yehuda, natiromi tu to parari dio tingayona sia dio boko’na, apa metamba tu tau iato mai langngan PUANG umpannoni tarompe’na tu to minaa.

¹⁵Sia unnarrak tu mintu’ to Yehuda tonna parari. Iatonna unnarrakmo tu to Yehuda, Napapatalomi Puang Matua tu Abia sia mintu’ to Yehuda, tonna sirari Yerobeam sia mintu’ to Israel.

¹⁶Anna sisarambuan mallai tu to Israel dio tingayona to Yehuda, Nasorongi Puang Matua tama limanna.

¹⁷Iatu Abia sola mintu’ surodadunna umpateimo to Israel buda tongan, anna mate tu to Israel limaratu’ sa’bunna tu pa’barani lalong.

¹⁸Susimoto tu to Israel dipamatuna, apa iatu to Yehuda pasau’mo, belanna tau iato mai umposande’ PUANG, Kapenombanna nene’ to dolona.

¹⁹Naula’mi Abia tu Yerobeam, narampai tu ba’tu pira-pira kotana, iamotu Betel sola mintu’ lili’na sia Yesana sola mintu’ lili’na sia Efron sola mintu’ lili’na.

²⁰Iatu Yerobeam tang pakullemo tempon tuona Abia; Napata’pai lima PUANG, naurunganni mate.

²¹Samandu-mandunnami tu kuasanna Abia. Napobainemi tu baine sangpulo a’pa’; na iatu anakna muane duangpulo ndua sia iatu anakna baine sangpulo annan.

²²Iatu tang dipokadannapa tu tuna’na Abia sia mintu’ apa napogau’ sia torro ke’de’na tisura’mo lan Sura’ Pa’battuanan tu natono’ nabi Ido.