Read Toraja-Sa'dan 2 OSSORANNA DATU 14 Bible Online

2 OSSORANNA DATU 14 - Toraja-Sa'dan bible

2 OSSORANNA DATU 14

¹Mangkato malemi tama batu dilobang tu Abia sola nene’ to dolona anna dipeliang lan kotana Daud. Anna Asa, anakna muane, ussondai dadi datu. Tonna linona marampa’ tu tondok sangpulo taunna.

²Iatu Asa umpogau’ apa malolo sia melo dio pentiroNa PUANG, Kapenombanna.

³Naputtai tu inan pemalaranna to sae sia inan madao dinii memala’, natesse tu batu dipodeata, sia nalelleng tu lentong dipodeata;

⁴sia nasua tu mai to Yehuda undaka’ PUANG, Kapenombanna nene’ to dolona, sia unturu’ Sukaran alukNa sia pepasanNa.

⁵Naputtai duka lan mai mintu’ kota Yehuda tu inan madao dinii memala’ sia inan pemalaran pantunuan dupa. Rapa’mi tu kadatuan tonna ma’parenta.

⁶Nabangun duka tu ba’tu pira-pira kota ditambakuku lan Yehuda, belanna rapa’ tu tondok sia tae’ rari umpatui lan mintu’ taun iato, belanna Nakamasei PUANG kamarampasan.

⁷Nakuami lako to Yehuda: Melo ke tapematoto’i te mintu’ kota sia tapalilingi benteng tembo’ tu nanii menara, babangan sia salli’na, su’ding kita siapa puangna te tondok, belanna mangkamoki’ undaka’ PUANG, Kapenombanta; belanna tadaka’mo, iamoto Nakamaseangki’ kamarampasan tiku lao. Nabangunmi tau iato mai tu kota iato sia napamangka mana’pa.

⁸Iatu Asa unnampui surodadu talluratu’ sa’bunna muane dio mai Yehuda, tu ma’balulang kapua sia ma’doke, sia duaratu’ ngkarua pulona sa’bu muane dio mai Benyamin, tu ma’balulang bitti’ sia ma’pana. Mintu’nate to lalong nasang.

⁹Ke’de’mi tu Zerah, to Kusyi, ullaoi tu tau iato mai, ussolan surodadunna sangsa’bu sa’bunna na talluratu’ kareta. Rampomi lako Maresa.

¹⁰Ke’de’mi tu Asa la unneai; sipa’pampangammi tu tau iato mai diong lombok Zefata, sikandappi’ Maresa.

¹¹Meongli’mi tu Asa lako PUANG, Kapenombanna, nakua: O PUANG, tae’ tu misa’ tau saliananna Kamu la untundui to langga’ unnea to matoto’. Tunduikanni, o PUANG, Kapenombangki, belanna sande’kan lako Kalemi sia tete dio sangamMi angki ke’de’ unneai te to pada budanna to. O PUANG, Kamumo tu Kapenombangki, ke ma’dinni da naden misa’ ma’rupa tau ungkullei unneaKomi.

¹²Napatalomi PUANG tu mintu’ to Kusyi dio tingayona Asa sia to Yehuda, naurungan mallai tu to Kusyi.

¹³Naula’mi sola mintu’ surodadunna tu tau iato mai sae lako Gerar, sia lendu’ ia budanna tu to Kusyi mate, naurunganni moi misa’ tu tau iato mai tae’mo tuo, belanna disabu’i dio oloNa PUANG sia surodadunna. Iatu to Yehuda unnala pangrampa lendu’ budanna.

¹⁴Mangkato natalomi tu mintu’ kota untikui Gerar, belanna katirambanan lu dio mai PUANG urrampoi tu kota iato; napeurangi to Yehuda tu kota iato, belanna buda pangrampa lan.

¹⁵Sia nasanggang duka tu mintu’ tendana to mangkambi’, sia lendu’ budanna tu domba sia bembe’ sia unta nabaa male. Mangkato sulemi lako Yerusalem.