Read Toraja-Sa'dan 2 OSSORANNA DATU 15 Bible Online

2 OSSORANNA DATU 15 - Toraja-Sa'dan bible

2 OSSORANNA DATU 15

¹Narampoimi PenaanNa Puang Matua tu Azarya, anakna Oded.

²Malemi umpessitammui Asa, nama’kada lako nakua: Perangiina’, e Asa, sia mintu’ to Yehuda sia to Benyamin. Narondongkomi PUANG, ke mengkara’pakomi lako Kalena; iake midaka’I, manassa la miappa’; apa iake miboko’i, manassa la Naboko’i dukakomi.

³Masai allomo tu to Israel tae’ Kapenomban tonganna, sia tae’ to minaanna, tu ma’pangada’, sia tae’ tu sukaran alukna.

⁴Apa iake lanni kapussakanna tu tau iato mai, anna sule lako PUANG, Kapenombanna to Israel, sia nadaka’, manassa la naappa’.

⁵Lan attu iato tae’ kamarampasan lako to tassu’ sia tama, sangadinna kamarukkan kapua lako mintu’ tau lan lu tondok.

⁶Sia iatu mai bangsa sikau pada bangsa na iatu mai kota sikau pada kota, belanna Naparampoi kamarukkan Puang Matua tu tau iato mai diona ma’rupa-rupa kapussakan.

⁷Iamoto pabatta’mi tu penaammi, da nalangga’ tu limammi, belanna iatu pengkarangammi la den poleanna.

⁸Iatonna rangimi Asa te mintu’ kada iate, iamotu pa’nubua’na Azarya, anakna Oded, batta’mi tu penaanna, sia naputtai tu megallianna lan mai mintu’ tondok Yehuda sia Benyamin sia lan mai mintu’ kota dao buntu Efraim tu natalo. Sia napemeloi duka tu inan pemalaranNa PUANG, tu dio tingayo serambinNa PUANG.

⁹Narampunmi tu mintu’ to Yehuda sia to Benyamin sisola mintu’ to mentiruran lan lili’na tau iato mai dio mai Efraim sia Manasye sia Simeon — , belanna buda tu tau dio mai Israel male menta’pa lako, tonna tiromi kumua iatu PUANG, Kapenombanna, urrondongi.

¹⁰Malemi tu tau iato mai sirampun lako Yerusalem lan bulan ma’pentallunna taun ma’pessangpulo lima kadatuanna Asa.

¹¹Iatonna allo iato napemalaran lako PUANG tu pangrampa nabaa, pituratu’ sapi na pitungsa’bu tu domba sola bembe’.

¹²Untananmi basse tu tau iato mai, kumua la ponno penaanna sia kalebu deatanna la undaka’ PUANG, Kapenombanna nene’ to dolona.

¹³Sia minda-minda tu tang undaka’ PUANG, Kapenombanna to Israel, manassa la dipatei la to baitti’ la to kapua, la muane la baine.

¹⁴Umpalaomi sumpa tu tau iato mai lako PUANG umpekapuai gamaranna sia unnarrak-arrak sia umpannoni tarompe’ sia napiri tanduk.

¹⁵Mintu’ to Yehuda parannu tongan penaanna tu diona sumpa iato, belanna ponno penaanna umpalao sumpa sia iatu mintu’ pa’poraianna undaka’ PUANG. AnNa eloranni Puang tu Kalena naappa’; Nakamaseimi Puang kamarampasan tiku lao.

¹⁶Moi na iatu Maakha, indo’na, natassu’i dadi datu baine, belanna unggaragai rapang-rapang dipodeata iamotu Asyera. Nata’tak-ta’tak Asa tu rapang-rapang dipodeata megallian sia naballa diong lombok Kidron.

¹⁷Apa iatu inan madao tu dinii memala’ tae’ nadiratoi. Moi susito iatu penaanna Asa lantuk (lako PUANG) lan mintu’ allo katuoanna.

¹⁸Nabaami tama banuanNa Puang Matua tu mintu’ apa napamarimbangan ambe’na sia mintu’ apa tu ia kalena umpamarimbanganni, iamotu salaka, bulaan sia ma’rupa-rupa pareanan.

¹⁹Sia tae’ rari sae lako taun ma’pentallungpulo llima kadatuanna Asa.