Read Toraja-Sa'dan 2 OSSORANNA DATU 18 Bible Online

2 OSSORANNA DATU 18 - Toraja-Sa'dan bible

2 OSSORANNA DATU 18

¹Iatonna sugi’ lallangmo tu Yosafat sia mala’bi’ tongan, sibaisenmi Ahab.

²Ba’tu pirang-pirang taun mangkannato, malemi tu Yosafat lako Ahab dio Samaria; natunuammi Ahab domba sia bembe’ sia sapi buda tu Yosafat sola tu to nasolan, sia nanaran la ke’de’ ullaoi Ramot dio lili’na Gilead.

³Ma’kadami tu Ahab datu Israel, lako Yosafat, datu Yehuda, nakua: Morairokomika tamale sola lako Ramot dio lili’na Gilead? Mebalimi lako nakua: Umba susimmi, susi dukana’ to, iatu bangsami susi dukato tu bangsaku; la maleki’ sola tama kasirarian.

⁴Apa nakua tu Yosafat lako datu to Israel: Pekutananni dolo umba nakua tu kadanNa PUANG.

⁵Napasipulungmi datu Israel tu mai nabi, a’pa’ratu’ tau, anna mekutana lako tau iato mai, nakua: La ke’de’rakannika urrarii tu Ramot dio lili’na Gilead, da’i bangmiraka to? Mebalimi tu tau iato mai nakua: Laomokomi, belanna la Nasorong Puang Matua tu kota iato tama limanna datu.

⁶Apa nakua tu Yosafat: Tae’moraka misa’ nabinNa PUANG indete? Melo ke takutanai diona tu apa la tapogau’.

⁷Ma’kadami datu Israel lako Yosafat nakua: Den siapa misa’ tau, tu tapotete ma’din mekutana lako PUANG, apa kukabiri’ belanna tae’ bang maelona tu napokada diona kaleku, sangadinna kadakena manna, iamotu Mikha, anakna Yimla. Nakuami Yosafat: Da nama’kada susito tu datu.

⁸Natambaimi datu Israel tu misa’ to mase’ponna, anna ma’kada nakua: Alai madoi’ tu Mikha, anakna Yimla.

⁹Pada unnisungmi dao inan kapayunganna tu datu Israel na Yosafat, datu Yehuda, umpake pakean kamala’biranna dio rante panglulluran dio salian babangan Samaria, tonna marassan tu mintu’ nabi ma’nubua’ dio olona.

¹⁰Iatu Zedekia, anakna Kenaana, mangkamo unggaragan kalena tanduk bassi, anna ma’kada nakua: Inde sia tu kadanNa PUANG: Tete dio te apa iate la miserokanni tu Aram sae lako misabu’ina nasang tu tau iato mai.

¹¹Susi dukato tu mintu’ nabi ma’nubua’ nakua: Melo ke ke’de’komi lako Ramot, dio lili’na Gilead, manassa la maupa’komi, belanna la Nasorong PUANG tu kota iato tama limanna datu.

¹²Iatu to disua untambai Mikha nakua lako: Iatu kadanna mintu’ nabi, misa’ri sia melo tu napokada lako datu; iatu kadammi la susi duka kadanna simisa’-misa’ tau iato sia ma’kada melokomi.

¹³Apa mebali tu Mikha nakua: La lelukraka tuoNa PUANG, manassa apa tu Napokada Kapenombangku lako kaleku, ia dukamoto tu la kupokada.

¹⁴Iatonna saemo lako datu, ma’kadami tu datu lako nakua: E Mikha! ma’dinrakannika lao urrarii Ramot dio lili’na Gilead, ba’tu da’i bangmiraka to? Mebalimi nakua: Ke’de’mokomi, manassa la maupa’komi; iatu tau iato mai la disorong tama limammi.

¹⁵Apa ma’kada tu datu nakua: Pempiran bangra’ la umpopassumpakomi, kumua da mipokadai lako kaleku, ke tae’i natonganna tete dio sanganNa PUANG?

¹⁶Nakuami tu Mikha: Kutiromo tu mintu’ to Israel sisarak-sarak dao lu tanete butung to domba tae’ to mangkambi’na; anna ma’kada tu PUANG Nakua: Iate mai tau tae’mo puangna, da’ito anna pantan sule marampa’ lako banuanna.

¹⁷Ma’kadami tu datu Israel lako Yosafat nakua: Tang kukuaraka mati’, kumua tae’ napa’nubuaranna’ tu apa melo, sangadinna kadakena manna?

¹⁸Nakuami Mikha: Iamoto perangii tu kadanNa PUANG: Kutiromo tu PUANG unnisung dao isungan kapayunganNa namintu’ baananna suruga bendan dio kanan kairinNa.

¹⁹Ma’kadami tu PUANG Nakua: Mindara tu unnaran Ahab datu Israel, naurunganni ke’de’ male sia la mate dio Ramot, dio lili’na Gilead? Misa’ ma’kada susite, misa’ ma’kada susito.

²⁰Saemi tu misa’ penaa mennolo sia bendan dio oloNa PUANG, anna ma’kada nakua: Aku la unnaranni. Ma’kadami PUANG lako Nakua: Umba la mupakuanni?

²¹Mebalimi nakua: La malena’, angku mempenaa bulituk lan pudukna mintu’ nabinna. Ma’kadami tu Puang, Nakua: Manassa la munaran sia mubela umpogau’i to; malemoko mupogau’i.

²²Na totemo manassa Napatamamo PUANG pudukna mintu’ nabimmi tu misa’ penaa bulituk sia Nara’ta’mo PUANG tu misa’ kamandasan lako kalemi.

²³Saemi tu Zedekia, anakna Kenaana, ussala’pai tu pili’na Mikha sia nakua: Umba nakua tu penaanNa PUANG la lele dio mai kaleku, anna ma’kada lako kalemu?

²⁴Apa ma’kada tu Mikha nakua: Manassa la mutiro sia tu allona, tu la munii mallai membuni dio bilik misa’ lako bilik senga’.

²⁵Ma’kadami tu datu Israel nakua: Alai tu Mikha solanni sule mibaai lako Amon, pangulu kota, sia lako Yoas, anakna datu,

²⁶kuanni kumua nakua tu datu: Palanni pa’tarungkuan te tau iate sia ben bangi roti sia uai sidi’ anna mandasa sae lako sule marampa’ku.

²⁷Nakuami tu Mikha: Iake sule marampa’komi, manassa tae’ NaPuang tu ma’kada nalopian pudukku. Sia nakua: Perangii, e kamu mintu’ bangsa.

²⁸Mangkato ke’de’mi tu datu Israel sola Yosafat, datu Yehuda, la urrarii Ramot dio lili’na Gilead.

²⁹Ma’kadami tu datu Israel lako Yosafat, nakua: La umbalilina’ kaleku tama kasirarian; apa pake bangmi kamu tu pakean kamala’birammi. Umbalilimi kalena tu datu Israel, anna tama kasirarian sola duai.

³⁰Iatu datu Aram mangkamo umpa’peparentanni lako mintu’ kamandang karetana, nakua: Da misirari tu mai to bitti’ ba’tu to kapua, sangadinna ia manna tu datu to Israel.

³¹Iatonna tiromi mintu’ kamandang kareta tu Yosafat, metambami tu tau iato mai, nakua: Iamotu tu datu Israel. Napatama limbumi tau iato mai la ullaoi. Apa meongli’ tu Yosafat anna tundui PUANG, Napatiakka’mi Puang Matua tu penaanna tau iato mai, anna toyang dio mai kalena.

³²Iatonna tiromi mintu’ kamandang kareta, kumua tangia datu Israel, tibalikmi dio mai kalena.

³³Apa den misa’ tau ma’pana tae’ naangga’i, anna ruai tu datu Israel dio to’ pa’pasitammuan bayu kararran. Nakuami lako tu to untoe ulang darang karetana: Bintingi sule tu ulang, ammu solanna’ sun lan mai to’ surodadu, belanna bangkemo’.

³⁴Apa samasarrang-sarrangna tu rari allo iato sia umpabatta’ kalena bendan bang tu datu lan karetana sitingoan to Aram sae lako makaroenna. Matemi tu datu tonna la lambun allo.