Read Toraja-Sa'dan 2 OSSORANNA DATU 19 Bible Online

2 OSSORANNA DATU 19 - Toraja-Sa'dan bible

2 OSSORANNA DATU 19

¹Sule marampa’mi tu Yosafat, datu to Yehuda, lako banuanna dio Yerusalem.

²Malemi tu Yehu, anakna Hanani, umpessitammui, anna ma’kada lako datu Yosafat nakua: Sipaturokomika untundui tu to tang mekaaluk sia sisangmane to ungkabiri’ PUANG? Iamoto narampoikomi kare’dekan ara’na PUANG.

³Moi susito den duka sia dio kalemi tu ba’tu pira-pira kameloan, belanna iatu mai lentong dipodeata miputtai lan mai tondok sia mipabatta’ tu penaammi undaka’ Puang Matua.

⁴Torromi tu Yosafat dio Yerusalem. Maleomi tu datu dio lu to’ to buda randuk dio mai Bersyeba sae lako buntu Efraim, anna patibalikki tu tau iato mai lako PUANG, Kapenombanna nene’ to dolona.

⁵Natappumi tu ba’tu pira-pira to ma’paolai salu lan tondok iato, iamotu lan mintu’ kota ditambakukunna Yehuda randuk dio mai misa’ kota lako kota senga’.

⁶Ma’kadami tu datu lako mintu’ to ma’paolai salu, nakua: Pengkilalai tonganni tu apa mipogau’, belanna tangia to lino mipalolangan pa’paolaian salu, sangadinna PUANG, tu dioren, ke ma’paolai salukomi.

⁷Iamoto la narampoikomi katirambanan tu lu dio mai PUANG; kanandai meloi tu apa mipogau’, belanna dio PUANG, Kapenombanta, tae’ tu apa tang malambu’, tae’ tu mentiro rupa, ba’tu untarima pappe’.

⁸Dio duka Yerusalem nanii Yosafat untappu ba’tu pira-pira to Lewi, sia to minaa sia pangulu rapunna to Israel, la umpalolang pa’paolaian salu unturu’ atoranNa PUANG sia kara-kara. Iatu tau iato mai torro tontong dio Yerusalem.

⁹Mepasanmi tu datu lako tau iato mai nakua: Ungkataku’ PUANG situang kamarurusan sia bulo lollong la mipogau’, susite:

¹⁰iamotu lan mintu’ kara-kara tu naparampo mintu’ siulu’mi lako kalemi, tu torro lan kotana — , diona passosoan, diona sukaran aluk, pepasan, apa dipondok sia atoran — la mipakilala tu tau iato mai, da nasala dio oloNa PUANG, da narampoikomi kasengkeanNa Puang sia iatu mai mintu’ siulu’mi. Iake lolang susikomito, tae’ mila sala.

¹¹Iatu Amarya, tominaa kapua, iamo pangulummi lan mintu’ kara-kara diona alukNa PUANG sia Sebaja, anakna Ismael, arungna suku Yehuda, lan mintu’ kara-kara diona atoranna datu, na to Lewi miala pareami. La lolangkomi umpabatta’ penaammi, anna PUANG urrondongi tu to bulo lollong.