Read Toraja-Sa'dan 2 OSSORANNA DATU 20 Bible Online

2 OSSORANNA DATU 20 - Toraja-Sa'dan bible

2 OSSORANNA DATU 20

¹Undinnato saemi tu to Moab sola to Amon sola to Meunim ba’tu sangapa budanna la urrarii Yosafat.

²Saemi tu tau umparampo kada lako Yosafat, nakua: Den misa’ tuntunan surodadu kapua ma’palusambali’ mai tasik, dio mai Aram, sae la urrariikomi; rampomo tu tau iato mai dio Hazezon-Tamar, iamotu En-Gedi.

³Mataku’mi tu Yosafat, napamanassai la umpekutanan pa’timbanganNa PUANG; sia umpetamban misa’ kapa’puasan lan mintu’ tondok Yehuda.

⁴Sangsirampunammi tu mintu’ to Yehuda la umpalaku pa’tunduan langngan PUANG; ondongpi sae tu tau dio mai mintu’ kota Yehuda la undaka’ PUANG.

⁵Bendanmi tu Yosafat lan tangngana kombongan to Yehuda sia to Yerusalem dio banuanNa PUANG dio tingayo tarampak ba’ru,

⁶sia ma’kada nakua: O PUANG, Kapenombanna nene’ to doloki, tang Kamuraka Puang Matua lan suruga, sia tang Kamu dukaraka umparenta mintu’ kadatuanna mintu’ tu mai bangsa? Lan limamMi tu kapaan sia kamatotoran, naurunganni moi misa’ tau tae’ ungkullei tumanan unneaKomi.

⁷Tae’raka na Kamu tu Kapenombangki, tu mangkamo urrambai dio mai tingngayona to Israel, taumMi, tu tau lan tondok iate, amMi kamaseanni bati’na Abraham, sangmaneMi, anna pomana’i sae lakona?

⁸Ma’tondokmi inde to dio tu tau iato mai, anna bangunangKomi misa’ inan maindan inde to, iamotu nabangunan sangamMi, sia ma’kada nakua:

⁹Iake denni kamandasan urrampoikanni, la pa’dang la kadipakario-rioan la ropu la karorian, la bendankan dio tingayo banua iate sia dio oloMi, belanna iatu sangamMi lan te banua iate; iake metambakanni lako Kalemi lan kapussakangki, la Miperangii sia la Mitunduikanni.

¹⁰Totemo tiromi iatu to Amon, to Moab sia to dao lu buntu Seir, tu tang Mieloran to Israel ullaoi, tonna tassu’ lan mai tondok Mesir, — belanna sepang dio mai tau iato mai sia tae’ nasanggangi — ,

¹¹totemo tiromi, napabala’imokan kadake, belanna saemo la urrambaikanni dio mai apamMi tu Mibenkanni kipomana’.

¹²O Kapenombangki, tae’raka Mila unnukungi tu tau iato mai? Belanna iake kami tang pa’belakanni la umpatananni tu surodadu pada budannato, tu sae ullaoikan, sia tae’ kitandai tu apa sipatu la kipogau’, apa lako Kalemi kinii mentingara.

¹³Mintu’ to Yehuda bendan dio oloNa PUANG sae lako mintu’ pia’-pia’na sia bainena sia anakna muane.

¹⁴Attu iato saemi tu PenaanNa PUANG tama kombongan iato, lako Yahaziel to Lewi, anakna Zakharia, anakna Benaya anakna Yehiel, anakna Matanya, bati’na Asaf,

¹⁵nama’kada nakua: Perangii, e mintu’ to Yehuda sia pa’tondokan Yerusalem sia kamu, datu Yosafat! Inde sia tu kadanNa PUANG lako kalemi: Da mimataku’ sia da mitiramban lako tu kaponan surodadu pada budannato, belanna tangia rarimmi to, sangadinna rarinNa Puang Matua.

¹⁶Masiang la milaoi tu tau iato mai; iake kendekmi langngan aa’ Zis la miappa’ diong tampak lombok dio tingayona padang pangallaran Yeruel.

¹⁷Tae’ mila manggi’ parari lan kasirarian iato: la bendankomi dio inanmi, ammi tiroi tu kapataloan Nakamaseangkomi PUANG. E to Yehuda sia to Yerusalem, da mimataku’ sia da mitiramban; masiang la milaoi tu tau iato mai, belanna PUANG urrondongkomi.

¹⁸Attu iato iatu Yosafat tukku sae rokko padang, sia mintu’ to Yehuda sia mintu’ pa’tondokan Yerusalem lumbang rokko padang dio oloNa PUANG, la umpenombai PUANG.

¹⁹Iatu mintu’ to Lewi dio mai to Kehat sia to Korah bendan umpudi-pudi PUANG, Kapenombanna Israel, mandu umpekapuai gamaranna.

²⁰Iatonna masiang melambi’, ke’de’mi tu tau iato mai lako padang pangallaran Tekoa. Iatonna ke’de’, malemi lako tingayo tu Yosafat sia ma’kada nakua: Perangiina’, e to Yehuda sia to untongkonni Yerusalem, katappa’i tu PUANG, Kapenombammi, ammi dipamanda’, katappa’i tu mai nabinNa, ammi maupa’.

²¹Sipa’kadami datu tu mai to buda, anna pasirundunanni tu ba’tu pira-pira to la umpenanian sia umpudi-pudi PUANG ma’kassa’ umpopake pakean maindan, anna doloanni tu to ma’pa’buno sia ma’kada, nakua: Pudimi tu PUANG, pa masokan Ia, belanna kamasokananNa tang leluk sae lakona.

²²Iatonna marasan tu tau iato mai unnarrak-arrak sia umpakendek pa’pudi-pudian, Napatudu-tudumi PUANG tu ba’tu pira-pira to mangamu’ la ullaoi to Amon, to Moab sia to dao mai buntu Seir, tu sae ullaoi to Yehuda, anna ditalo tu tau iato mai.

²³Iatonna iato ke’de’mi tu to Amon sola to Moab ullaoi tu to dao mai buntu Seir, la naroto’i sia la namangsanni. Iatonna mangkamo ussabu’i tu to dao mai buntu Seir, pada iami sule sipate-patean, napura mangsan.

²⁴Iatonna rampomo tu to Yehuda lako menara pa’kampan dio padang pangallaran, nata’paimi matanna tu mai surodadu, mangnga untiroi: batang rabukna mannamo situlambenan dio lu padang, moi misa’ tae’ lussu’.

²⁵Saemi tu Yosafat sola taunna mangrampa, nakabu’tui tu pangrampa lendu’ budanna, iamotu ianan sia pakean sia pareanan mellong; naalami, tang nagasa tongan nabaa; tallung allo tu tau iato mai unnalai tu pangrampa, belanna lendu’ budanna.

²⁶Iatonna allo ma’penna’pa’mo sirampunmi tu tau iato mai diong Lombok Pa’pudi-pudian; dio tu nanii tau umpudi PUANG, iamoto nadisangai tu inan iato Lombok Pa’pudi-pudian sae lako allo iate.

²⁷Mangkato tibalikmi tu mintu’ to Yehuda sia pa’tondokan Yerusalem nadoloan Yosafat sule lako Yerusalem situang kaparannuan, belanna Napasende PUANG tu tau iato mai diona kataloanna ualinna.

²⁸Malemi lako Yerusalem tama banuanNa PUANG umbaa dandi, katapi sia tarompe’.

²⁹Misa’ katirambanan dio mai Puang Matua urrampoi mintu’ kadatuanna tondok iato, tonna rangimi tu diona PUANG urrarii mintu’ ualinna Israel.

³⁰Anna iatu kadatuanna Yosafat torro manamanmo, belanna Nakamasei Kapenombanna kamarampasan tiku lao.

³¹Susimoto tu Yosafat umparenta Yehuda. Iatonna dadi datu tu Yosafat, tallungpulo llima taunna, anna ma’parenta duangpulo llima taunna dio Yerusalem. Iatu indo’na disanga Azuba, anakna baine Silhi.

³²Urrundu’mi bate lalanna Asa, ambe’na, tae’ nasepang len dio mai sia napogau’ tu apa malolo dio pentiroNa PUANG.

³³Ia manna tu inan madao, tu dinii memala’, tae’ naputtai, sia iatu penaanna to buda tae’pa napalulakoi Kapenombanna nene’ to dolona.

³⁴Iatu tang dipokadannapa tu tuna’na Yosafat la dolona la undinna, manassa tisura’mo lan sura’ natonno’ Yehu, anakna Hanani, tu dipatama lan sura’na mintu’ datu Israel.

³⁵Undinnato sibassemi Yosafat, datu Yehuda, tu Ahazia, datu Israel; iatu Ahazia lolang tang mekaaluk.

³⁶Siallu’mi la unggaragai kappala’ napasusi kappala’ lako Tarsis. Iatu mintu’ kappala’ nagaragai dio Ezeon-Geber.

³⁷Apa iatu Eliezer, anakna Dodawa, to Maresa, ma’nubua’ umbali Yosafat, nakua: Belanna siallu’mokomi Ahazia, iamoto la Nasanggang PUANG tu pengkarangammi. Pakalan malammu’mi tu mintu’ kappala’, naurunganni tae’mo namassombaran lako Tarsis.