Read Toraja-Sa'dan 2 OSSORANNA DATU 21 Bible Online

2 OSSORANNA DATU 21 - Toraja-Sa'dan bible

2 OSSORANNA DATU 21

¹Mangkato malemi tama batu dilobang tu Yosafat sola nene’ to dolona, anna dipeliang sola nene’ to dolona lan kotana Daud; anna Yoram, anakna muane, ussondai dadi datu.

²Iatu adinna, anakna muane Yosafat, iamotu: Azaria, Yehiel, Zakharia, Azaryahu, Mikhael na Sefaca. Mintu’i te anakna muane nasang Yosafat, datu Israel.

³Nabenmi ambe’na ba’tu pira-pira pamengan tu tau iato mai, iamotu salaka, bulaan sia pareanan keangga’, sola kota ditambakuku lan Yehuda, apa iatu kadatuan naben Yoram, belanna iamo pa’bunga’na.

⁴Iatonna toemi Yoram tu kadatuanna ambe’na sia matoto’mo nasa’ding, napateimi pa’dang tu mintu’ adinna sia ia duka tu ba’tu pira-pira arungna to Israel.

⁵Iatu Yoram tallungpulo ndua taunna tonna dadi datu, nama’parenta karua taunna dio Yerusalem.

⁶Umpeolaimi gau’na mintu’ datu Israel, susi penggauranna to lan tongkonan layukna Ahab belanna umpobaine anakna Ahab sia umpogau’ apa kadake dio pentiroNa PUANG.

⁷Apa iatu PUANG tae’ namorai ussabu’i tu bati’na Daud tu diona basse Natanan sola Daud, belanna mangkamo Napokada, kumua la Nakamasei Puang misa’ palita sae lakona tu kalena sia mintu’ anakna.

⁸Iatonna linona memboko’mi tu to Edom, anna lendokan kalena dio mai kuasa Yehuda, naangka’i tu misa’ datu umparentai.

⁹Malemi tu Yoram sola mintu’ kamandangna sia mintu’ kareta, nake’de’ tonna bongi, anna taloi tu to Edom, tu umpatama limbui sola tu mai kamandang karetana.

¹⁰Moi susito memboko’ duka tu Edom, anna lendokan kalena dio mai kuasa Yehuda sae lako allo iate. Attu ia dukamoto namemboko’ duka tu Libna nalendokan kalena dio mai kuasanna, belanna naboko’imo tu PUANG, Kapenombanna nene’ to dolona.

¹¹Sia nagaragai duka tu inan madao dao buntu Yehuda naada’i tu pa’tondokan Yerusalem lan la umpenombai deata sia napapusa tu to Yehuda.

¹²Attu iato saemi misa’ sura’ lako kalena dio mai nabi Elia, nakua: Inde sia tu kadanNa PUANG, Kapenombanna Daud, nene’ to dolomi: Belanna tae’ mituru’i tu bate lalanna Yosafat, ambe’mu, sia Asa, datu Yehuda,

¹³sangadinna unturu’ko bate lalanna tu mai datu Israel, sia unnada’i to Yehuda sia pa’tondokan Yerusalem umpenombai deata susito lan tongkonan layukna Ahab, ondongpi belanna mupatei duka tu mintu’ siulu’mu, tu musangamberan, tu mandu melo na iko, —

¹⁴manassa la Naparampoi PUANG kamandasan tu bangsamu sia mintu’ anakmu muane sia mintu’ bainemu, sia mintu’ iananmu;

¹⁵sia iko kalena la narua saki mandarra’, iamotu pa’di’ tambuk, naurunganni ba’tu sangapa undinnato la sun tu tambuk barrinni’mu napobua’ saki iato.

¹⁶Napatiakka’mi PUANG tu to Filistin sia to Arab, tu torro dio sa’dena to Kusyi la urrarii Yoram,

¹⁷naurunganni tu tau iato mai ke’de’ ullaoi Yehuda tarru’ tama, unnalai tu mintu’ ianan naappa’ lan tongkonan layuk, ondongpi nabaa nasang tu anakna muane sia mintu’ bainena, naurunganni tae’mo anakna muane torro sangadinna Yoahas, anak tampakna.

¹⁸Iatonna mangkamo tu mintu’ apa iate Naparampoimi PUANG misa’ saki tang dampi-dampian lan tambuk barinni’na.

¹⁹Sia iatonna ba’tu sangapa undinnato, iamo tonna agi-agi duang taunmo lendu’na, tassu’mi tu tambuk barinni’na, belanna saki iato, naurunganni mate, napobua’ saki metakuran iato. Apa tae’ napadukkuanni api bangsana susi dipogauran nene’ to dolona.

²⁰Iatonna tallungpulomo ndua taunna, dadimi datu, anna ma’parenta dio Yerusalem karua taunna, matemi tang didikkanan. Napeliangmi tau lan kotana Daud, apa tae’ nalan liangna mintu’ datu.