Read Toraja-Sa'dan 2 OSSORANNA DATU 27 Bible Online

2 OSSORANNA DATU 27 - Toraja-Sa'dan bible

2 OSSORANNA DATU 27

¹Iatu Yotam duangpulomo llima taunna tonna dadi datu, anna ma’parenta sangpulo annan taunna dio Yerusalem. Iatu indo’na disanga Yerusa, anakna Zadok.

²Napogau’mi tu apa malolo dio pentiroNa PUANG susitu mintu’ napogau’ Uzia, ambe’na, apa tae’ natama banua kabusunganNa PUANG. Apa iatu to buda tontong bangpa ma’gau’ kadake.

³Iatu datu umbangun babangan Daona lu banuanNa PUANG, nabuda duka tu pengkarangan dio rinding tembo’ Ofel nabangun.

⁴Sia umbangun ba’tu pira-pira kota ditambakuku dao lu buntu Yehuda, sia umbangun duka benteng sia menara lan lu pangala’.

⁵Sirarimi datu to Amon, nataloi, naurunganni lan taun iato napennoloan to Amon tu salaka saratu’ talenta sia gandung sangpulo sa’bunna koro sia dalle sisikan sangpulo sa’bunna koro. Susi dukato tu napennoloan to Amon, tonna taun ma’penduan sia ma’pentallun.

⁶Susimoto tu Yotam umpaombo’ kuasanna belanna tontong malolo tu gau’na dio oloNa PUANG, Kapenombanna.

⁷Iatu tang dipokadannapa tu mintu’ tuna’na Yotam, sia mintu’ rarinna sia penggauranna, manassa iatu iannato tisura’mo lan sura’ diona mintu’ datu Israel sia Yehuda.

⁸Duangpulomo llima taunna tonna dadi datu, anna ma’parenta sangpulo annan taunna dio Yerusalem.

⁹Mangkato malemi tama batu dilobang tu Yotam sola nene’ to dolona, anna dipeliang lan kotana Daud. Anna Ahas, anakna muane, ussondai dadi datu.