Read Toraja-Sa'dan 2 OSSORANNA DATU 3 Bible Online

2 OSSORANNA DATU 3 - Toraja-Sa'dan bible

2 OSSORANNA DATU 3

¹Naparandukmi Salomo umbangun Banua Kabusungan dio Yerusalem dao buntu Moria, tu Nanii ombo’ PUANG lako Daud, ambe’na, dao inan tu mangka napamanassa Daud, iamotu inan panglulluranna Ornan, to Yebus.

²Naparandukmi umbangunni tonna bulan ma’penduan sia allo ma’penduan sia taun ma’penna’pa’na kadatuanna.

³Inde sia tu suka’ parandangan nagaragai Salomo la umbangun banuanNa Puang Matua: iatu landona ke direken siku doloi, manangpulo siku na iatu babana duangpulo siku.

⁴Iatu sarambi dio tingo banua pada baba banua tu landona, duangpulo siku na iatu langka’na saratu’ duangpulo siku; anna sapu’i bulaan massang tu lanna lu.

⁵Iatu bilik kapua iato nalopak kayu sendana, anna sapu’i bulaan matasak sia napalakoi passura’ koroma sia pa’rante-rante.

⁶Nabeloimi batu parimata maballo tu bilik iato. Iatu mintu’ bulaan iato, bulaan dio mai Parwaim.

⁷Iatu bilik iato nasapu’ bulaan, iamotu balokna, ampangna, rindingna sia iatu ba’ba patomalinna; na dio tu rindingna nasura’ karubion.

⁸Sia nabangun tu bilik tarru’ maindan; iatu landona pada babana banua duangpulo siku, na iatu babana duangpulo duka siku; nasapu’i bulaan tasak annanratu’ talenta.

⁹Na iatu mintu’ pakunna limangpulo sikele’ bulaan timbanganna. Iatu mintu’ bilik mengkadaoanna nasapu’i duka bulaan.

¹⁰Lan bilik tarru’ maindan nagaragai tu da’dua karubion, panggaraga dipa’, anna sapu’i tau bulaan.

¹¹Iatu mintu’ pani’ karubion duangpulo siku landona; iake misa’ pani’ dio misa’na limang siku, anna sumpu lako to’ rinding banua iato, na iatu pani’ misa’nao limang siku, anna sumpu lako pani’ karubion misa’nao.

¹²Iatu misa’ pani’ karubion ma’penduanna, limang siku landona sia sumpu lako to’ rinding banua iato, na iatu pani’ misa’nao limang siku landona sikande pani’na karubion bunga’na.

¹³Iatu pani’na karubion iate tiballa’ duangpulo siku landona, iatu kalena kelette’ nabendan mentingo tama banua.

¹⁴Ia tu bannang lango-lango, lango-lango makaseda, karamisi na lenang melo nagaragai kulambu, napale’ke’i dio karubion.

¹⁵Nagaragai tu da’dua lentong dio tingayo banua, tallungpulo llima siku landona, sia misa’ parande dipatoppo’ dao, limang siku landona.

¹⁶Nagaragan duka tu pa’rante-rante untikui biringna, napale’ke’ dao tampak lentong sia nagaragan saratu’ bua dalima anna pale’ke’i dio pa’rante-rante iato.

¹⁷Napabendanmi tu lentong dio tingo Banua Kabusungan, misa’ dio rampe kanan na misa’ dio rampe kairinna, nasangai Yakhin tu dio kanan na Boas tu dio kairi.