Read Toraja-Sa'dan 2 OSSORANNA DATU 30 Bible Online

2 OSSORANNA DATU 30 - Toraja-Sa'dan bible

2 OSSORANNA DATU 30

¹Attu iato nasuami Hizkia tu ba’tu pira-pira pesua umpa’peissananni lako mintu’ to Israel sia to Yehuda, ondongpi umpa’pea sura’ lako to Efraim sia to Manasye, kumua nasangsaean nasang tu tau iato mai lako to’ banuanNa PUANG dio Yerusalem la umpakarayanni PUANG, Kapenombanna to Israel, tu Pa’pasa.

²Sipa’kadami datu tu mintu’ pangulunna sia mintu’ kombongan dio Yerusalem la umpakaraya Pa’pasa, lan bulan ma’penduan.

³Belanna tae’pa nadadi umpakaraya Pa’pasa, ke attunna, belanna tae’ naganna’ tu to minaa umpamasero kalena sia iatu to buda tae’pa nasirampun dio Yerusalem.

⁴Tonganmi tu apa iato dio pentirona datu sia dio pentirona mintu’ kombongan.

⁵Napamanassami tau iato mai la umpasun petamba lan lu mintu’ Israel, randuk dio mai Bersyeba sae lako Dan la male lako Yerusalem la umpakarayanni PUANG, Kapenombanna to Israel, tu Pa’pasa, belanna tae’ napakarayai tau lan misa’ kombongan, susitu atoran mangka disura’.

⁶Malemi tu pebaa sura’ malinta’ umbaa sura’na datu sia mintu’ pangulunna umpasilamban-lamban Israel sia Yehuda sia ma’kada susi pepasanna datu nakua: E kamu mintu’ to Israel, tibalikmokomi sule lako PUANG. Kapenombanna Abraham, Ishak, sia Israel, anNa tibalik duka sule lako to torrona siapa, tu tilendok dio mai kuasanna to Asyur.

⁷Damo misusitu mintu’ nene’ to dolomi sia siulu’mi, tu tang maruru’ lako PUANG, Kapenombanna nene’ to dolona; iamoto Naeloranni tu tau iato mai dadi apa megiangan, susitu mitiro.

⁸Damo mipamakarra’ penaammi, susi nene’ to dolomi, dondonganni tu limammi lako PUANG, ammi male lako inan maindanNa, tu Napamarimbangan sae lakona, sia mengkaolakomi lako PUANG, Kapenombammi, kumua anna soro’ dio mai kalemi tu kare’dekanna ara’Na.

⁹Belanna iake sulemokomi lako PUANG, iatu mintu’ siulu’mi sia anakmi la nakamasei to mangka urrampai, anna sule lako tondok iate. Belanna iatu PUANG, Kapenombammi, maturu-turu sia mamase; manassa tae’ Natanannikomi boko’, ke sulekomi lako Kalena.

¹⁰Malemi tu mintu’ pebaa sura’ malinta’maringan umpasilamban-lamban mintu’ kota lan lili’na Efraim sola Manasye sae lako Zebulon, apa napetaai sia natelle-telle tau.

¹¹Apa den ba’tu pira-pira tau dio mai Asyer sia Manasye sia Zebulon umpamadiongan penaanna, anna male lako Yerusalem.

¹²Dio duka Yehuda lalo tu kuasanNa PUANG, anna sanginaa tu tau iato mai unturu’ pepasanna datu sia mintu’ pangulu susitu kadanNa PUANG.

¹³Budami tau sirampun lako Yerusalem la umpakaraya pa’gauran roti tang diragii lan bulan ma’penduan, iamotu kombongan marua’ tongan.

¹⁴Attu iato ke’de’ nasangmi tu tau iato mai, naangka’i tu inan pemalaran lan Yerusalem sia ia duka tu mintu’ inan pemalaran pantunuan dupa, anna pembuanganni rokko salu Kidron.

¹⁵Mangkato natunumi tu domba Pasa tonna allo ma’pessangpulo a’pa’na lan bulan ma’penduan. Iatonna iato masiri’mi tu ba’tu pira-pira to minaa sia to Lewi, anna pamaseroi tu kalena sia umbaa pemala’ ditunu pu’pu’ tama banuanNa PUANG.

¹⁶Bendanmi tu tau iato mai dio lu inanna unturu’ atoran, susi lan Sukaran alukna Musa, taunNa Puang Matua. Napa’pi’pikammi to minaa tu rara natarimai to Lewi.

¹⁷Belanna buda bangsia tu tau lan kombongan tu tae’pa napamasero kalena, iamoto nadipa’pesuan lako to Lewi untunu mintu’ domba Pasa la ussondai tu tau tang maseropa, anna dipamaindanan PUANG.

¹⁸Belanna taa budannapa tu to buda, iamotu buda tu tau dio mai Efraim, Manasye, Isakhar sia Zebulon tae’pa napamasero kalena, sangadinna ungkande Pasa, tang susitu disura’na. Apa napassambayangan Hizkia tu tau iato mai nakua: Na PUANG masokanmora umpadenanni kadibasean kasalanna,

¹⁹tu mintu’ to umpasakka’ penaanna la undaka’ Puang Matua, iamotu PUANG, Kapenombanna nene’ to dolona, moi anna tang sitinaya kamaseroan tu sipatu lako apa maindan.

²⁰Naperangiimi PUANG tu passambayangna Hizkia, anna pamakarimmanni tu to buda.

²¹Iatu mintu’ to Israel tu torro lan Yerusalem, siparannu-rannu tongan umpakaraya pa’gauran roti tang diragii lan pitung allo. Na iatu mintu’ to Lewi sia mintu’ to minaa umpudi-pudimo PUANG keallo-keallo, dipasiala oni-onian la umpangke’ PUANG.

²²Ma’kada-kadami tu Hizkia la umpakatana penaanna mintu’ to Lewi, tu umpa’pekitanan kapaissanan kapua lan kamenomban lako PUANG. Susimoto tu tau iato mai ungkandei tu kande allo kapua lan pitung allo sia untunu pemala’ kasalamaran sia umpudi PUANG, Kapenombanna nene’ to dolona.

²³Umpadenmi kasiturusan tu mintu’ kombongan la umpogau’pi tu pa’maruasan pitung allo, napogau’mi tu pa’maruasan situang kasendean.

²⁴Belanna iatu Hizkia, datu Yehuda, umpa’kamasean sapi laki sangsa’bu na domba sola bembe’ pitungsa’bu lako kombongan; na iatu mintu’ pangulu umpa’kamasean sapi laki sangsa’bu na domba sola bembe’ sangpulo sa’bunna lako kombongan. Buda dukami to minaa umpamasero kalena.

²⁵Mintu’ kombongan to Yehuda siparannu-rannumo sola mintu’ to minaa sola to Lewi, sia mintu’ kombongan tu sae dio mai Israel sia mintu’ to mentiruran la saena dio mai tondok Israel la iatu torrona lan lu Yehuda.

²⁶Denmi kaparannuan kapua lan Yerusalem, belanna randuk dio mai linona Salomo, anakna Daud, datu Israel, tae’ bangpa dadi susito lan Yerusalem.

²⁷Mangkato bendanmi tu mintu’ to minaa, bati’na Lewi, anna passakkei tu to buda; na iatu gamaranna Narangi PUANG; iatu passambayangna tau iato mai landa’ langngan inan maindanNa, dao suruga.