Read Toraja-Sa'dan 2 OSSORANNA DATU 32 Bible Online

2 OSSORANNA DATU 32 - Toraja-Sa'dan bible

2 OSSORANNA DATU 32

¹Iatonna mangkamo tu mintu’ apa iato, tu nanii paan tu kamarurusanna (Hizkia), saemi tu Sanherib, datu Asyur ullaoi Yehuda, Napatama limbumi tu mintu’ kota ditambakuku sia natangnga’ la untaloi.

²Iatonna tiromi Hizkia kumua saemo tu Sanherib la ullaoi Yerusalem,

³sipa’kadami tu mintu’ kamandangna sia pa’baraninna la ullepe’i tu kalimbuang dio salian kota sia mangaku tu tau iato mai la untundui datu.

⁴Budami tu tau sae sirampun, nalepe’i tu mintu’ kalimbuang sia salu, tu lolong unnola tangnga padang iato, nakua: Iake saei tu mai datu Asyur, ma’apari nala ungkabu’tuira uai lempan-lempan?

⁵Sia napangu’kui umpemeloi tu mintu’ rinding tembo’ ro’pok, anna pabendanni tu menara dao sia benteng tembo’ senga’ dio salian. Sia napematoto’i duka tu Milo lan kotana Daud, anna popegaragai doke sia balulang buda.

⁶Naangka’mi tu ba’tu pira-pira kamandang la umpangului surodadu, narampunni tu tau iato mai dio tarampak dio tingayo babangan kota, anna ma’kada umpabatta’i tu penaanna, nakua:

⁷Pabatta’i tu penaammi sia la baranikomi, da mimataku’ sia da mitiramban untiroi tu datu Asyur sia mintu’ to buda nasolan belanna iatu urrondongki’ mandu matoto’ na iatu to nasolan.

⁸Iatu nasolan takia’ duku’ bangri, apa iatu tasolan iamo PUANG, Kapenombanta, tu la untunduiki’ sia umpalalo mintu’ rarinta. Naposande’mi to buda tu kadanna Hizkia, datu Yehuda.

⁹Mangkato nasuami Sanherib, datu Asyur, tu taunna lako Yerusalem, tonna torropa sola mintu’ surodadunna dio tingo Lakhis, umpellambi’i Hizkia, datu Yehuda, sia mintu’ to Yehuda, tu diapparan lan Yerusalem, nakua:

¹⁰Inde sia tu kadanna Sanherib, datu Asyur: Apara mirannuan, ammi torro lan Yerusalem tu dipatama limbu?

¹¹Tang Hizkiaraka umpapusakomi la ussorongkomi lako kamatean napobua’ tangdia’ sia ma’rang, nakua: PUANG, Kapenombanta, la urrampanangki’ lan mai kuasanna datu Asyur.

¹²Tang Hizkia dukaraka tu mangka umputtai tu mintu’ inan madaoNa sia inan pemalaranNa, anna ma’kada lako to Yehuda sia to Yerusalem nakua: Dio manna tingayona misa’ inan pemalaran la minii tukku menomba sia untunu pemala’.

¹³Tae’raka miissanni tu apa mangka kupogau’ sia iatu apa napogau’ nene’ to doloku lako mintu’ to sangpetayanan lan lu tondok senga’? Nakulleraka tu deatanna bangsa lan lu tondok iato urrampanan tondokna lan mai kuasangku?

¹⁴Dio lu mintu’ deatanna bangsa iato, tu nasabu’i nene’ to doloku, mindara ungkullei urrampanan taunna lan mai kuasangku. Iamoto ma’apai nala ungkullei tu Kapenombammi urrampanangkomi lan mai kuasangku?

¹⁵Dadi totemo, da napakenakomi Hizkia sia da napapusakomi, sia da mipatonganni, belanna moi misa’ deata dio lu to sangpetayanan ba’tu kadatuan tae’ tu ungkullei urrampanan taunna lan mai kuasangku sia lan mai kuasanna nene’ to doloku; ondongpi umba la nakua tu Kapenombammi ungkullei urrampanangkomi lan mai kuasangku!

¹⁶Sia ba’tu pira-pirapa tu kada napokada tau iato mai umbali-bali PUANG Kapenomban sia Hizkia, taunNa.

¹⁷Sia nasura’ tu misa’ sura’ tu nanii umbelle’i PUANG, Kapenombanna to Israel, sia napokada tu diona Puang nakua: Susi deatanna mintu’ bangsa lan lu tondok senga’ tae’ narampananni tu taunna lan mai kuasangku, susi dukato tu Kapenombanna Hizkia tae’ nala urrampanan taunNa lan mai kuasangku.

¹⁸Metambami tu tau iato mai umpekapuai gamaranna ma’basa Yehuda lako to Yerusalem tu dao rinding tembo’, la umpakataku’i sia la umpatirambanni tu tau iato mai, kumua anna kullei untaloi tu kota iato.

¹⁹Sia napokada tu diona Kapenombanna Yerusalem susi bangsia tu diona deatanna mintu’ bangsa dao kuli’na padang, iamotu panggaraga lima to lino.

²⁰Apa iatu kamasussan iato napobannang anna massambayang tu datu Hizkia sia nabi Yesaya, anakna Amos, anna meongli’ langngan langi’.

²¹Nassuami PUANG tu misa’ malaeka’ la ussanggangi tu mintu’ pa’barani, arung sia kamandang dio to’ tendana surodadunna datu to Asyur, naurunganni sule lako tondokna natoding siri’. Iatonna tamamo banuanna deatanna, napateimi pa’dang anak dadianna.

²²Susimo ka Narampananna PUANG to tu Hizkia sia mintu’ pa’tondokan Yerusalem lan mai kuasanna Sanherib, datu Asyur, sia lan mai kuasanna mintu’ (ualinna). AnNa kamasei Puang karapasan tiku lao tu tau iato mai.

²³Budami tu tau umbaa pamengan lako Yerusalem lako PUANG, sia pareanan keangga’ lako Hizkia, datu Yehuda. Randuk dio mai attu iato, dipamatandemi tu datu dio pentirona mintu’ bangsa.

²⁴Attu iato masakimi tu Hizkia, sidi’mora namate. Massambayangmi lako PUANG, anNa ma’kada tu Puang lako sia Naben misa’ tanda kalle-kallean.

²⁵Apa iatu Hizkia tang naissan umpakkanni tu pa’kamasean dikamaseanni, belanna madao penaanna; iamoto narampoi kasengkean, sola tu to Yehuda sia to Yerusalem.

²⁶Napamadiongammi sule tu penaanna Hizkia, anna penassanni tu kamadaoan penaanna, la ia la iatu pa’tondokan Yerusalem, naurunganni iatu kasengkeanNa PUANG tae’ narampo lako tau iato mai tonna linona Hizkia.

²⁷Iatu Hizkia sugi’ lallang sia mala’bi’ tongan; nagaragammi kalena tu ba’tu pira-pira bilik pangnannan la dipannii salaka, bulaan, parimata mellong, pebangki’, balulang sia ma’rupa-rupa pareanan keangga’,

²⁸sia ba’tu pira-pira pa’palumpunan la dipannii gandung, uai anggoro’ sia minna’ sia ba’tu pira-pira lantang la dipoinan sanda rupanna patuoan sia bontong la dipannii domba sola bembe’.

²⁹Nabangunni tu ba’tu pira-pira kota ditambakuku sia napopemba’ka’ kalle-kallean tu domba sola bembe’ sia sapi, belanna Nakamasei Puang Matua ianan makamban.

³⁰Hizkia duka untampoi tu saruran Gihon tu rampe daoan, anna palolongi tu uainna rokko ma’palulako rampe matampu’na kotana Daud. Iatu mintu’ apa nagaragai Hizkia, napaupu’ marampa’.

³¹Iatonna sae tu sumbungun puduk tu nasua mintu’ arung Babel lako datu la umpekutananni tu diona tanda kalle-kallean tu dadi lan tondok iato, Napopa’elo’na Puang Matua tu datu la untobai, kumua anna tandai tu mintu’ apa lan penaanna.

³²Iatu tang dipokadannapa tu mintu’ tuna’na Hizkia sia penggauran matinuru’na, manassa iatu iannato tisura’mo lan sura’ Patiro mendeatanna nabi Yesaya, anakna Amos, lan sura’ diona mintu’ datu Yehuda sia Israel.

³³Iatu Hizkia malemo tama batu dilobang sola nene’ to dolona sia dipeliang dio to’ se’pon, nanii liangna bati’na Daud, namintu’ to Yehuda sia to lan Yerusalem umpakarayai lan attu kamateanna. Anna Manasye, anakna muane, ussondai dadi datu.