Read Toraja-Sa'dan 2 OSSORANNA DATU 36 Bible Online

2 OSSORANNA DATU 36 - Toraja-Sa'dan bible

2 OSSORANNA DATU 36

¹Attu iato naangka’mi pa’tondokan tu Yoahas, anakna Yosia, natokkoi dadi datu ussonda ambe’na.

²Iatu Yoahas duangpulomo antallu taunna, tonna dadi datu, anna ma’parenta tallung bulan dio Yerusalem.

³Apa natassu’imo datu Mesir lan mai pangka’ datu dio Yerusalem, sia nadosa tu tondok iato saratu’ talenta salaka na misa’ talenta bulaan.

⁴Naangka’mi datu Mesir tu Elyakim, siulu’na, dadi datu umparenta Yehuda sia Yerusalem, anna sondai tu sanganna umposanga Yoyakim. Apa iatu Yoahas, adinna datu, naala Nekho, nasolan lako Mesir.

⁵Iatu Yoyakim duangpulomo llima taunna, tonna dadi datu, anna ma’parenta sangpulo misa taunna dio Yerusalem. Napogau’mi tu apa kadake dio pentiroNa PUANG, Kapenombanna.

⁶Ke’de’mi tu Nebukadnezar, datu Babel, umpatundukki sia napungo da’dua rante tambaga la nasolan lako Babel.

⁷Sia nabaa Nebukadnezar, datu Babel, tu ba’tu pira-pira pareanan banuanNa PUANG lako Babel, napalanni tongkonan layukna dio Babel.

⁸Iatu tang dipokadannapa tu mintu’ tuna’na Yoyakim sia mintu’ penggauran megallianna sia iatu kakadakean, tu diapparan dio kalena, manassa tisura’mo lan sura’ diona mintu’ datu Israel sia Yehuda. Anna Yoyakhin, anakna muane, ussondai dadi datu.

⁹Iatu Yoyakhin sangpulo karuamo taunna tonna dadi datu, anna ma’parenta tallung bulan sangpulo allona dio Yerusalem. Napogau’mi tu apa kadake dio pentiroNa PUANG.

¹⁰Iatonna taun pole’ to, mesuami datu Nebukadnezar ussolanni lako Babel sola tu mai pareanan ballo lan banuanNa PUANG. Naangka’mi datu tu Zedekia, sangdadianna, undatui Yehuda sia Yerusalem.

¹¹Iatu Zedekia duangpulomo mmisa taunna tonna dadi datu, anna ma’parenta sangpulo misa taunna dio Yerusalem.

¹²Napogau’mi tu apa kadake dio pentiroNa PUANG, Kapenombanna. Tae’ napamadiongan kalena dio tingayona nabi Yeremia, tu ma’kada tete dio sanganNa PUANG.

¹³Ondongpi pabali-bali lako datu Nebukadnezar, tu mangka ussuai umpalao sumpa tete dio sanganNa Puang Matua. Battuk sia umpamakarra’ penaanna naurunganni tang mengkatoba’ lako PUANG, Kapenombanna to Israel.

¹⁴Susi dukato tu mintu’ pangulu to minaa sia to buda umpalolang katangmarurusan, unturu’ penggauran megallianna mintu’ bangsa, sia naruttaki tu banuanNa PUANG, tu Napamarimbanganmo dio Yerusalem.

¹⁵Iatu PUANG, Kapenombanna nene’ to dolona, ussuamo pesuanNa lako tau iato mai, ke melambi’ sia ke mabongioi, belanna Nakamasei tu taunNa sia inan katorroanNa.

¹⁶Apa natelle-telleora tau iato mai tu mintu’ pesuanNa Puang Matua sia nabelle’i tu kadanNa sia nabe’se tu nabinNa, naurungan sakendek-kendekna tu kare’dekan ara’Na PUANG, sae lako tae’mo nama’din dipamatana.

¹⁷Napasaeammi datu to Kasdim tu tau iato mai, tu umpepai pa’dang tu mintu’ to manguranna muane lan inan maindanna, tae’mo nakasayangi tu to mangura muane ba’tu anak dara, ba’tu to matua sia to ubanan; mintu’nato Nasorong nasang tama kuasanna.

¹⁸Iatu mintu’ pareanan banuanNa Puang Matua la kapua la baitti’, sia mintu’ ianan banuanNa PUANG sia mintu’, iananna datu sia mintu’ arungna, nabaa nasang lako Babel.

¹⁹Sia pura naballa tu banuanNa Puang Matua sia narondon tu rinding tembo’ Yerusalem, sia mintu’ tongkonan layukna pura naballa api, sia iatu mintu’ pareanan mellong nasanggang-sanggang duka.

²⁰Minda-minda tilendok dio mai kandean pa’dang napalele lako Babel, na iatu tau iato napokaunan datu sia nasiosso’i anakna sae lako kadatuan to Persia randuk ma’parenta dio:

²¹dikua anna dipalanda’ tu kadanNa PUANG nalopian Yeremia; sae lako disondaimo taun katorroanna tu padang iato. Natorroimi tu padang iato lan mintu’ allo kasangganganna, kumua anna ganna’i pitungpulo taunna.

²²Apa iatonna taun pamulanna kadatuanna Koresh, datu Persia, Napatiakka’mi PUANG tu penaanna Koresh, datu Parsia, dikua anna dipalanda’ tu kadanNa PUANG tu nalopian Yeremia, anna mesua metamba-tamba lan lu mintu’ parentana sia napa’peissanan duka lan sura’, nakua:

²³Inde sia tu kadanna Koresh, datu Persia: Mintu’ kadatuan dao te kuli’na padang Nakamaseammo’ PUANG, Kapenombanna langi’, sia Napasanmo’ la umbangunanNi misa’ banua dio Yerusalem, lan Yehuda. Minda-mindakomi tu naala bilangan golonganna taunNa-Narondongmira PUANG, Kapenombanna, melo ke malemi.