Read Toraja-Sa'dan 2 OSSORANNA DATU 7 Bible Online

2 OSSORANNA DATU 7 - Toraja-Sa'dan bible

2 OSSORANNA DATU 7

¹Iatonna mangkamo tu Salomo massambayang, pakalan songlo’mi tu api dao mai langi’, umpepurai nakande tu pemala’ ditunu pu’pu’, sia mintu’ pemala’ pangrere’, na iatu kamala’biranNa PUANG ussitutu’i tu banua iato.

²Iatu mai to minaa tang nasaramo tama banuanNa PUANG, belanna iatu kamala’biranNa PUANG ussitutu’imo banuanNa PUANG.

³Iatonna tiromi mintu’ to Israel tu api sia iatu kamala’biranNa PUANG songlo’ dao banua iato, malinguntu’mi tu tau iato mai natukku sae rokko padang diong sali, anna menomba umpudi-pudi PUANG, nakua: Belanna masokan Ia, belanna iatu kamasokananNa tang leluk sae lakona.

⁴Iatu datu sia mintu’ pa’tondokan umpemalaran ba’tu pira-pira pemala’ dio oloNa PUANG.

⁵Napemalaranni datu Salomo tu pemala’ duangpulo ndua sa’bu sapi sia saratu’ duangpulo sa’bu domba sola bembe’. Susimoto tu datu sia mintu’ pa’tondokan urrara banuanNa Puang Matua.

⁶Iatu mintu’ to minaa pada bendan dio lu to’ pentoeanna, na iatu mintu’ to Lewi sitangke oni-onianNa PUANG, tu nagaragai Daud la umpudi PUANG, ke napa’pesuanomi Daud umpenanian pa’pudi-pudian tete dio pentoeanna tu tau iato mai, nakua: Belanna iatu kamasokananNa tang leluk sae lakona. Na iatu mintu’ to minaa umpannoni tarompe’na sitingoan tau iato mai, anna bendan nasang tu mintu’ to Israel.

⁷Napamaindanmi Salomo tu tangnga’ tarampak, tu dio tingayo banuanNa PUANG, belanna inde to dio nanii umpasakka’i, tu mintu’ pemala’ sia lompo pemala’ kasalamaran, belanna iatu inan pemalaran tambaga, tu nagaragai Salomo, tang tama tu pemala’ ditunu pu’pu’ sia kande dipemalaran sia iatu lompona.

⁸Attu iato napakarayami Salomo sola mintu’ to Israel tu pa’maruasan mangrara lan pitung allo, iamotu misa’ kombongan kapua, randuk dio mai lalan lu lako Hamat sae lako salu’-salu’ Masir.

⁹Iatonna allo ma’pengkarua ma’kombongammi umpakaraya allo kapua iato, belanna iatu mangrara inan pemalaran napakarayamo lan pitung allo; na iatu pa’maruasan kapua pitung allo duka.

¹⁰Iatonna allo ma’penduangpulona ntallu bulan ma’pempitu, naelorammi datu tu to buda sule lako tendana, siparannu-rannu sia matana penaa diona kameloan Napogau’ PUANG lako Daud sia Salomo sia lako to Israel, taunNa.

¹¹Iatonna sundunmo tu Salomo umbangun banuanNa PUANG sia tongkonan layukna datu sia mintu’-mintu’na apa lan penaanna Salomo la napogauran banuanNa PUANG sia tongkonan layukna datu, napaupu’ marampa’mo,

¹²ta’kala ombo’mi tu PUANG lako Salomo tonna ibongi, Nama’kada lako Nakua: Iatu passambayangmu Kuperangiimo na inan iate Kupileiammo Kaleku la dipobanua dinii memala’.

¹³Iake Kututu’i tu langi’, anna tang uran, sia iake Kuparampoi tu batik la ussopui tu bura padang, ba’tu Kuparampoi ropu tu taungKu,

¹⁴na iatu taungKu, tu umpotoding sangangKu, anna umpamadiongan penaanna massambayang sia umpengkanorongiNa’ sia mengkatoba’ dio mai lalan kadakena, la Kuperangii dao mai suruga sia la Kupa’dei tu kasalanna sia la Kupamasakke-sakke sule tu tondokna.

¹⁵Totemo la ma’penunuNa’ sia iatu talingangKu la umperangii tu passambayang indete inan iate.

¹⁶Belanna totemo Kupilei langsa’mo te banua iate sia kupamarimbangan, kumua anna iatu sangangKu torro dio sae lakona; iatu matangKu sia penaangKu la dio duka kiallo-kiallo.

¹⁷Apa iatu iko, ke lolangko dio oloKu susi kalolanganna Daud, ambe’mu, ammu pogau’i tu mintu’ apa Kupasan lako kalemu sia ungkaritutui tu mintu’ apa Kupondok sia Kupa’parentan,

¹⁸manassa la Kupabantang tu isungan kadatuammu, susitu Kuallu’ lako Daud, ambe’mu, kumua: tang la ka’tu dio mai kalemu tu misa’ tau la umparenta to Israel.

¹⁹Apa iake sorong boko’komi dio mai Kaleku sia miboko’i tu apa Kupondok sia Kupa’parentan, Kupatuduangkomi, ammi male umpengkaolai tu kapenomban senga’, sia tukku umpenombai,

²⁰manassa la Kulampi’i tu tau iato mai lan mai padangKu tu Kukamaseanni; na iate banua Kupamarimbangan sangangKu la Kutibe dio mai oloKu, angKu padadii misa’ parumbasan sia kaditellean dio lu mintu’ bangsa.

²¹Iate banua dipamatande susito — minda-minda tu lendu’ dio, la magiang, anna ma’kada nakua: Ma’apai anNa pasusii PUANG to te tondok sia banua iate?

²²La napebalii tau nakua: Belanna tau iato mai untampemo PUANG, Kapenombanna nene’ to dolona, tu mangka ussolanni tassu’ lan mai tondok Mesir, sia la’ka’ lakomo kapenomban senga’ tu penaanna, sia tukkumo umpenombai sia umpengkaolai, iamoto Naparampoi Puang lako kalena te mintu’ kasanggangan iate.