Read Toraja-Sa'dan 2 OSSORANNA DATU 9 Bible Online

2 OSSORANNA DATU 9 - Toraja-Sa'dan bible

2 OSSORANNA DATU 9

¹Narangimi datu baine dio mai Syeba tu kareba diona Salomo. Pakalan saemi dio Yerusalem la umpeponto bannangi tu Salomo, naturu’ baanan makamban sia ba’tu pira-pira unta unteke’ pebangki’ sia bulaan lendu’ ia budanna sia ma’rupa-rupa parimata ballo. Rampomi lako Salomo, anna pokadai lako tu mintu’ apa lan penaanna.

²Nabattuanannimi Salomo lako tu mintu’ pekutananna; moi misa’ tae’ tu tang nakita datu, tu tang nabattuananni lako.

³Iatonna tiromi datu baine dio mai Syeba tu mintu’ kamatarrusanna Salomo sia iatu banua mangka napabendan,

⁴sia iatu mai kande dao medana, sia kao’koranna to mase’ponna, sia bendanna mintu’ to ma’kamayana sia pakeanna tau iato mai, sia mintu’ to ma’pairu’na sia pakeanna tau iato mai, sia pemala’ ditunu pu’pu’na tu biasa napennoloan lan banuanNa PUANG, pakalan pa’de deatami tu datu baine iato.

⁵Nakuami lako datu: Tongannamo tu apa kurangi dio tondokku tu diona a’gammi sia kakinaammi.

⁶Apa tae’ kupatonganni tu kadanna tau iato, tonna tae’pa kusae sia tae’pa namatangku kalena untiroi; tonganna sangsesenapa tu kakinaan kapuami tu tang napokadampa’ tau; mila’biipa tu mintu’ kareba kurangi.

⁷Maupa’ tu mintu’ taummi sia maupa’ te mintu’ to mase’ponmi tu tontong bendan dio olomi ma’kamaya sia umperangii tu kakinaammi.

⁸Mintu’na kadipudian lu langngan nasang PUANG, Kapenombammi, tu umpopaimankomi, naurunganni umpaunnisungkomi dao isungan kapayunganNa dadi datu tete dio PUANG, Kapenombammi. Belanna Kapenombammi ungkamasei to Israel, anNa patontongi tu tau iato mai sae lakona, iamoto Natokkokomi undatui tu tau iato mai, kumua ammi pogau’ katonganan sia kamaloloan.

⁹Nabenmi bulaan tu datu Salomo saratu’ duangpulo talenta sia lendu’ budanna bulaan sia pebangki’ sia ma’rupa-rupa parimata ballo; tae’ bang susinna tu pebangki’ napa’bengan datu baine Syeba lako datu Salomo.

¹⁰Nabaa dukapa taunna Huram sola taunna Salomo, tu umbaa bulaan dio mai Ofir, tu kayu algummin sia ma’rupa-rupa parimata ballo.

¹¹Iatu kayu algummin iato nagaraga datu Eran banuanNa PUANG sia banuanna datu sia nagaragai katapi sia dandi napake to massengo. Iatu kayu susito tae’ bangpa natiroi tau dolona lan tondok Yehuda.

¹²Nabenmi datu Salomo tu mintu’ apa naporai sia napalaku datu baine Syeba, losong na iatu apa mangka naban datu. Mangkato sulemi sola mintu’ to mase’ponna lako tondokna.

¹³Iatu timbanganna mintu’ bulaan dipataman Salomo lan sangtaun, annanratu’ nnannanpulona nnannan talenta bulaan.

¹⁴Boko’ ia tu apa napatama to ma’balili kapua sia to ma’baluk-baluk; susi dukato tu mintu’ to Arab sia to maraa lan lu mintu’ tondok ussorong bulaan sia salaka lako Salomo.

¹⁵Nagaragami datu Salomo tu balulang duaratu’, bulaan dikalubabak digaragai; annanratu’ batu bulaan napake, ke misa’oi balulang kapua;

¹⁶sia talluratu’ balulang bitti’, bulaan dikalubabak digaragai; talluratu’ batu bulaan napake, ke misa’oi balulang bitti’. Napatorromi datu lan banua: Pangala’ Libanon.

¹⁷Sia nagaragapa datu tu misa’ isungan kapayungan kapua gading digaragai, anna sapu’i bulaan massang.

¹⁸Iatu isungan kapayungan iato annan lau’na tu eranna na misa’ pellesean bulaan, tu dipale’ke’ lako isungan kapayungan, sia dio sa’dena patomali tu isungan den sissareanna; da’dua singa bendan dio sa’de sissarean iato,

¹⁹na sangpulo dua singa bendan dio sa’dena patomali dao to’ eran annan lau’na; iatu apa susito tae’pa digaragan len moi misa’ kadatuan.

²⁰Iatu mintu’ irusanna datu Salomo bulaan nasang, sia mintu’ pareanan lan banua: Pangala’ Libanon bulaan massang; iatonna linona Salomo tae’ naangga’i tau tu salaka.

²¹Belanna den tu lembangna datu ma’palulako Tarsis sola taunna Huram, sipissan lan tallung taun natamao tu lembang dio mai Tarsis umbaa bulaan sia salaka sia gading sia seba sia merak.

²²Susimoto tu datu Salomo mandu pasau’ anna iatu mintu’ datu dao kuli’na padang la diona kasugiran la diona kakinaan.

²³Mintu’ datu dao kuli’na padang morai tongan la umpessitiroi Salomo la umperangii kakinaanna, tu mangka natanan Puang Matua lan penaanna.

²⁴Pantan umbaami pamenganna, iamotu oongan salaka sia bulaan, pakean, pa’buno, pebangki’, darang sia bagala’, ke taunoi.

²⁵Naampui duka Salomo tu barung darang sia kareta patangsa’bu napakkanarang sangpulo dua sa’bunna; anna palanni lu mintu’ kota dipannii kareta sia napadio sola datu dio Yerusalem.

²⁶Napuangi nasang tu mintu’ datu randuk dio mai Salu sae lako tondok Filistin sia sae lako passaparanna tondok Mesir.

²⁷Belanna sara’na datu anna iatu salaka dio Yerusalem tarru’ buda susi batu sia iatu kayu arasi’ sangtinti kayu ara pangala’, tu buda tuo dio Merrantena.

²⁸Nabaammi darang tau dio mai Misraim tu Salomo sia dio mai mintu’ tondok.

²⁹Iatu tang dipokadannapa tu mintu’ tuna’na Salomo, la dolona la undinna, tang tisura’raka lan sura’ tuna’ tu nakarang nabi Natan, sia lan pa’nubua’na Ahia, to Silo, sia lan sura’ patiro mendeatanna Yedo, to patanda-tandan, diona Yerobeam, anakna Nebat?

³⁰Iatu Salomo umparenta mintu’ to Israel dio Yerusalem patangpulo taunna.

³¹Mangkato malemi tama batu dilobang tu Salomo sola nene’ to dolona, anna dipeliang lan kotana Daud, ambe’na; na Rehabeam, anakna muane, ussondai dadi datu.