Read Toraja-Sa'dan EZRA 1 Bible Online

EZRA 1 - Toraja-Sa'dan bible

EZRA 1

¹Iatonna taun pamulanna kadatuanna Koresh, datu Persia, Napatiakka’mi PUANG tu penaanna Koresh, datu Persia, kumua anna dipalanda’ tu kadanNa PUANG, tu nalopian Yeremia, anna mesua metamba-tamba lan lu mintu’ parentana sia napa’peissanan duka lan sura’ nakua:

²Inde sia tu kadanna Koresh, datu Persia nakua: Mintu’ kadatuan dao te kuli’na padang Nakamaseammo’ PUANG, Kapenombanna langi’, sia Napasanmo’ la umbangunanNi misa’ banua dio Yerusalem, lan Yehuda.

³Minda-mindakomi tu naala bilangan golonganna taunNa Narondongmira Kapenombanna, anna ke’de’ lako Yerusalem, lili’na Yehuda, anna bangunni tu banuanNa PUANG, Kapenombanna to Israel, Iamo Puang Matua unnisungi Yerusalem.

⁴Minda-minda tu torropa dio umba-umba nanii butung to mentiruran la natundui sangtondokna nabenni salaka sia bulaan sia ianan sia patuoan, senga’pi tu misa’ pa’kamase tanning inaa, disorong lako banuanNa Puang Matua, tu unnisungi Yerusalem.

⁵Attu iato ke’de’mi tu mintu’ pangulu rapunna Yehuda sia Benyamin, sia ia duka tu mintu’ to minaa sia to Lewi, iamotu mintu’ to Napatiakka’ Puang Matua tu penaanna la umbangun banuanNa PUANG, tu unnisungi Yerusalem.

⁶Iatu mintu’ to ma’tondok untikui, untundui pareanan salaka, bulaan, ianan sia patuoan sia ba’tu sangapa-apa ianan ballo, senga’pi tu mintu’ pa’kamase tanning inaa.

⁷Sia napatassu’ nasang datu Koresh tu mintu’ parea banuanNa PUANG, tu mangka nabaa Nebukadnezar dio mai Yerusalem, napalanni banua kabusunganna mintu’ deatanna.

⁸Mesuami Koresh, datu Persia, la umpatassu’i, napa’patuduan Mitredat, pangulu sandan uai, anna ia’i dio tingayona Sesbazar, arung to Yehuda.

⁹Inde sia tu iaranna: pindan bulaan tallungpulo, pindan salaka sangsa’bu, piso duangpulo ngkasera,

¹⁰irusan bulaan tallungpulo, sia denpa irusan salaka a’pa’ratu’ ssangpulo, na sangsa’bu parea senga’.

¹¹Mintu’ parea bulaan sia salaka den limangsa’bu nna’pa’ratu’. Mintu’nate nabaa nasang Sesbazar, tonna disolan tu to dipali’, dio mai Babel lako Yerusalem.