Read Toraja-Sa'dan EZRA 10 Bible Online

EZRA 10 - Toraja-Sa'dan bible

EZRA 10

¹Iatonna marassan tu Ezra massambayang sia unnaku kasalanna sia tumangi’ tukku dio tingayo banuanNa Puang Matua, sirampunmi tu tau buda tongan dio mai to Israel lako kalena, iamotu muane, baine sia pia, belanna iatu to buda randukmo siurrukan.

²Attu iato ma’kadami tu Sekhanya, anakna Yehiel, bati’na Elam, lako Ezra nakua: Tang maruru’mokan unturu’ Kapenombanta, belanna umpobainemokan ba’tu pira-pira baine senga’ dio mai mintu’ bangsa lan tondok iato; moi susito den siapa kapa’rannuanan lako to Israel.

³Melo ke untananki’ basse sola Kapenombanta, kumua la tasua male tu mintu’ baine sia mintu’ pia nadadian, situru’ tu pa’pakilalanna puangku sia mintu’ tau tu ma’parondo ungkataku’ pepasanNa Kapenombanta; melo ke lolangki’ unturu’i tu Sukaran aluk.

⁴Ke’de’mokomi, belanna kamu dipatanggungi te tanggungan iate sia kami duka sola nasang la urrondongkomi. Pabatta’i tu penaammi sia pogau’i te apa iate.

⁵Ta’kala ke’de’mi tu Ezra, anna suai tu mintu’ pangulu tominaa sia to Lewi sia mintu’ to Israel umpalao sumpa la umpogau’i susite kada iate; umpalaomi sumpa tu tau iato mai.

⁶Mangkato ke’de’mi tu Ezra dio mai tingayo banuanNa Puang Matua, anna male tama bilikna Yohanan, anakna Elyasib, tu nanii ma’bongi; tae’ nakumande sia tae’ namangiru’, belanna masussa penaanna natumang katangmarurusanna to sule dipali’.

⁷Mesuami tu mai tau umpetambanni lan lu Yehuda sia Yerusalem lako mintu’ tu to mangkamo dipali’, kumua anna sirampun lako Yerusalem.

⁸Minda-minda tae’ nasae lan to tallung allo, susitu pangra’ta’na mintu’ pangulu sia pekaamberan, la dialai tu mintu’ apanna napa’pemalian lako Puang, sia kalena duka la disarakki dio mai kombongan to dipali’.

⁹Ta’kala sirampunmi tu mintu’ muane to Yehuda sia Benyamin dio Yerusalem lan to tallung allo, iamotu bulan ma’pengkasera, allo ma’penduangpulona bulan iato; unno’ko’mi tu mintu’ tau iato dio lu padang tingayo banuanNa Kapenomban, sipa’parondoan belanna iatu kara-kara iato sia belanna angin bara’.

¹⁰Ke’de’mi tu to minaa Ezra anna ma’kada lako tau iato mai nakua: Umpokamokomi kamarurusan, belanna umpobainemokomi baine senga’, tu mipobannang urrangnganni pole’ kasalanna to Israel.

¹¹Apa totemo pangke’i tu PUANG, Kapenombanna nene’ todolomi, sia pogau’i tu apa nakalo’ penaanNa sia toyangangkomi kalemi dio mai mintu’ bangsa lan tondok iate sia dio mai mintu’ baine senga’.

¹²Mebalimi tu mintu’ kombongan iato umpekapuai gamaranna nakua: Iamo mipokada iamo sipatu kipogau’.

¹³Apa tarru’ buda tu tau sia palauran, naurungan tang unnattai torro bendan dio salian; ondongpi iate apa iate tangia pengkarangan sangallo ba’tu duang allo, belanna buda tu kapatengkangki lan apa iate.

¹⁴Melo ke bendanni tu mintu’ pangulunta ussonda mintu’ kombongan; namintu’ tu to lan kotata, tu umpobaine baine senga’, la sae mentingayo lan attu dipamanassa sola mintu’ pekaamberan sia toma’paolai salu dio mai mintu’ kota, sae lako tapatoyangna tu kare’dekanna ara’Na Kapenombanta dionate apa iate.

¹⁵Yonatan manna, anakna Asael, sia Yahzeya, anakna Tikwa tang ussituru’i tu apa iato, anna tundui Mesulam sola Sabetai, to Lewi.

¹⁶Apa iatu tau iato mai tu mangkamo dipali’ umpogau’i susito. Attu iato napileammi tominaa Ezra tu ba’tu pira-pira tau, iamotu pangulu rapu, pantan la umpogau’i to lan rapunna, namintu’nato disangai nasang, naparandukmi tau iato mai ma’kombongan tonna allo bunga’na bulan ma’pessangpulo la umparessai tu kara-kara iato.

¹⁷Upu’mi tu tau iato mai umparessa kara-karana mintu’ muane tu umpobaine baine senga’, tonna allo bunga’na bulan bunga’na.

¹⁸Naurunganni dio lu bati’ tominaa tu umpobaine, baine senga’ den diapparan tu anakna Yesua, anakna Yozadak, sia iatu mai siulu’na, iamotu Maaseya, Eliezer, Yarib na Gedalya.

¹⁹Umpasisala’pami limanna tu tau iato mai sia mangallu’ la ussuai male tu bainena; iatu suru’ pengkalossoranna tau iato mai, iamotu misa’ domba laki dio mai tuntunan dombana.

²⁰Dio mai bati’na Imer iamotu Hanani sia Zebaja.

²¹Dio mai bati’na Harim iamotu Maaseya, Elia, Semaya, Yehiel na Uzia.

²²Dio mai bati’na Pasyhur iamotu Elyoënai, Maaseya, Ismael, Netaneel, Yozabad na Elasa.

²³Dio mai to Lewi iamotu Yozabad, Simei, Kelaya (iamotu Kelita), Petahya, Yuda na Eliezer.

²⁴Dio mai tomenani iamotu Elyasib. Dio mai toma’kampa babangan iamotu Salum, Telem na Uri.

²⁵Dio mai to Israel, dio mai bati’na Paros iamotu Ramya, Yezia, Malkia, Miyamin, Eleazar, Malkia na Benaya.

²⁶Dio mai bati’na Elam iamotu Matanya, Zakharia, Yehiel, Abdi, Yeremot na Elia.

²⁷Dio mai bati’na Zatu iamotu Elyoënai, Elyasib, Matanya, Yeremot, Zabad na Aziza.

²⁸Dio mai bati’na Bebai iamotu Yohanan, Hananya, Zabai na Atlai.

²⁹Dio mai bati’na Bani iamotu Mesulam, Malukh, Adaya, Yasub, Seal na Yeramot.

³⁰Dio mai bati’na Pahat-Moab iamotu Adna na Kelal, Benaya, Maaseya, Matania, Bezaleel, Binui na Manasye.

³¹Dio mai bati’na Harim iamotu Eliezer, Yisia, Malkia, Semaya, Simeon.

³²Benyamin, Malukh na Semarya.

³³Dio mai bati’na Hasum iamotu Matnai, Matata, Zabad, Elifelet, Yeremai, Manasye na Simei.

³⁴Dio mai bati’na Bani iamotu Maadai, Amram, Uel,

³⁵Benaya, Bedeya, Keluhu,

³⁶Wanya, Meremot, Elyasib,

³⁷Matanya, Matnai, Yaasai,

³⁸Bani, Binui, Simei,

³⁹Selemya, Natan, Adaya.

⁴⁰Makhnadbai, Sasai, Sarai,

⁴¹Azareel, Selemya, Semarya,

⁴²Salum, Amarya na Yusuf.

⁴³Dio mai bati’na Nebo iamotu Yeiel, Matica, Zabad, Zebina, Yadai, Yoël na Benaya.

⁴⁴Mintu’nai te umpobainemo baine salian lembang, na dio lu bainena tau iato mai denmo tu undadian pia muane.