Read Toraja-Sa'dan EZRA 4 Bible Online

EZRA 4 - Toraja-Sa'dan bible

EZRA 4

¹Iatonna rangimi to umbali-bali to Yehuda sia to Benyamin, kumua iatu to sulemo dipali’ umbangun misa’ Banua Kabusungan lako PUANG, Kapenombanna to Israel,

²saemi tu tau iato mai lako Zerubabel sia mintu’ pangulu rapu nakua: Da’ito anta pabendanni sola, belanna kidaka’ duka tu Kapenombammi, susi kamu; sia memala’ dukakan lako randuk dio mai linona Esarhadon. Datu Asyur, tu mangka ussuakanni sae indete.

³Apa mebali tu Zerubabel, Yesua sia mintu’ pangulu rapu senga’na to Israel lako tau iato mai, nakua: Tae’ misipatu kumua la sisolaki’ umpabendananni misa’ banua tu Kapenombangki, belanna kami kalena la umpabendananni PUANG, Kapenombanna to Israel, susitu napasan datu Koresh, iamotu datu Persia, lako kaleki.

⁴Napalangga’mi pa’tondokan iato tu bangsa Yehuda, sia napakataku’ tau iato mai la umbangunni tu banua.

⁵Sia napappe’ tu ba’tu pira-pira pa’bisara umbalii tu tau iato mai, kumua anna dampai tu tanan penaanna tempon tuona Koresh, datu Persia, sae lako tonna ma’parenta Darius, datu Persia.

⁶Sia iatonna ma’parenta Ahasweros, lan pamulanna kaparentanna, nagaragami tau iato mai misa’ sura’ la umparapa’i tu to Yehuda sia to Yerusalem.

⁷Apa iatonna linona Artahsasta unggaragaimi misa’ sura’ tu Bislam, Mitredat, Tabeel sia iatu sangpangka’ senga’na lako Artahsasta, datu Persia; iatu sura’ iato disura’ lan basa Aram, sibaa misa’ pallemba’na.

⁸Rehum, to maraa, sia Simsai, pangulu to massura’, umpa’pea misa’ sura’ lako datu Artahsasta diona Yerusalem, nakua:

⁹Kami, Rehum, to maraa sia Simsai, pangulu to massura’ sia iatu mai sangpangka’ senga’na, to ma’paolai salu sia mintu’ to diala parea dio lili’ sambalinna lu Salu sia pa’tondokanna Afarsa, Erekh, Babel sia Susan, iamotu to Elam,

¹⁰sia mintu’ bangsa senga’ tu napalele Asnapar, to tarompo’ sia kabarre-alloan, tu napatorro lan kota Samaria sia lan lu lili’ senga’ sambalinna lu Salu, —

¹¹susite tu oni sura’ dipallemba’ dio mai sura’ iato tu napakatu — lako datu Artahsasta, dio mai taummi, iamotu mintu’ tau lan lili’ sambalina Salu.

¹²La naissan puang, kumua iatu to Yahudi, tu ke’de’ dio mai puang lako kaleki, rampomo lako Yerusalem; marassanmo nabangun sule tu kota marittuk sia kadake; nasundunnimo napabendan tu benteng tembo’ sia naotonmo tu mai parandangan.

¹³La naissan puang, kumua iake bendanni te kota iate sia sundunmo tu benteng tembo’na, manassa tae’mo nabaya’i tau iato mai tu sima ulu, sassung sia sima balukan, naurunganni ma’katampakanna karugian tu puang.

¹⁴Belanna kami te sola nasang siumpu’kan tongkonan layuk sia tae’ nasipato’ lako kaleki la untiro-tiro bangi tu kadibelleran urrampoi puang, iamoto angki pa’peai te kareba iate lako puang,

¹⁵kumua anna paressai tau lan sura’ ossoranna nene’ to dolona puang. Manassa la naapparan sia la nakabu’tui puang lan sura’ ossoran iato, kumua iate kota iate misa’ kota marittuk, sia umpadenan karugian mintu’ datu sia propinsi sia inang tempon diopa mai anna umpadenmo kamarukkan lan. Iamoto nadisanggang tu kota iato.

¹⁶Kipaissanan puang, kumua iake dipabendanni sule te kota iate, sia dipasundun sule tu rinding tembo’na, manassa tae’mo nakullei puang ungkuasai tu lili’ sambalinna lu Salu.

¹⁷Nabalikammi datu tu sura’ iato nakua: Salama’ku lako Rehum, to maraa, Simsai, pangulu to massura’, sia mintu’ sangpangka’ senga’na, tu torro dio Samaria sia dio lu mintu’ lili’ senga’na sambalinna lu Salu.

¹⁸Iatu sura’ mipa’pea lako kaleku, mangkamo dipamalesang dibasa dio oloku.

¹⁹Kupa’parentamo anna paressai tau, naapparanni kumua iate kota iate inang tempon diopa mai anna umbali-bali datu, sia iamo dinii umpaden kapabali-balian sia kamarukkan.

²⁰Sia den duka dolona tu mai datu tarompo’ umparenta Yerusalem, tu ungkuasai mintu’ lili’ sambalinna lu Salu sia iatu nanii tau umbaya’ sima ulu sia sassung sia sima balukan.

²¹Totemo la mesuakomi natorroi tau tu pengkarangan, kumua da nabangunni sule te kota iate, sae lako kupa’parentanna pole’.

²²Pengkilalai da mikasalioi te apa iate; matumbari nala sakerangngan-rangnganna te kakadakean iate, naurungan karugian tu mai datu?

²³Iatonna dibasammo Rehum, Simsai, pangulu to massura’, sia mintu’ sangpangka’na tu sura’ dipallemba’ dio mai sura’na datu Artahsasta, madomi’mi male tu tau iato lako Yerusalem, lako to Yahudi, sia undampai tu pengkarangan iato situang kamatotoran sia kamasa’garan.

²⁴Susito ditorroimi tu pengkarangan dio banuanNa Puang Matua dio Yerusalem, anna tadang sae lako taun ma’penduan kadatuanna Darius, datu Persia.