Read Toraja-Sa'dan EZRA 5 Bible Online

EZRA 5 - Toraja-Sa'dan bible

EZRA 5

¹Apa ma’nubua’ tu nabi Hagai sia Zakharia, anakna Ido, dio lu mintu’ to Yahudi, tu torro lan Yehuda sia Yerusalem tete dio sanganNa Kapenombanna to Israel.

²Ke’de’mi tu Zerubabel, anakna Sealtiel, sia Yesua, anakna Yozadak, anna parandukki umbangunni tu banuanNa Puang Matua, tu unnisung lan Yerusalem; na iatu nabinNa Puang Matua untundui tu tau iato sola duai.

³Attu iato saemi lako tau iato tu Tatnai, to maraa lompo lili’ sambalinna lu Salu sia Syetar-Boznai sola sangpangka’na, anna ma’kada lako tau iato mai, nakua: Mindara ussuakomi umbangunni te banua iate sia ussundunni te benteng tembo’ iate?

⁴Mangkato ma’kadami lako tau iato mai nakua: Apara sanganna tu tau umbangunni te banua iate?

⁵Apa iatu matanna Kapenombanna tontong umpenunui tu mintu’ pekaamberanna to Yahudi, naurunganni tae’ napa’parentanni tau iato mai la untorroi tu pengkarangan iato, sae lako dipa’peissananna lako Darius sia natarima tu balikan sura’na dio mai taunna Darius.

⁶Iamote tu oni sura’ dipallemba’ dio mai sura’ napa’pea Tatnai, to maraa lompo dio lili’ sambalinna lu Salu sola Syetar-Boznai sia sangpangka’na, iamotu mintu’ to diala parea dio lili’ sambalinna lu Salu lako datu Darius;

⁷napa’peammi tau iato mai tu misa’ sura’ lako datu tu nanii ulelean lan nakua: Diparampo lako olona datu Darius, dennoupa’ anna salama’ lan mintu’na!

⁸Melo ke naissanni datu, kumua kami te male lako propinsi Yehuda, lako banuanNa Puang Matua pasareongan; iato banua iato dibangun sule umpake batu kapua, sia mintu’ rindingna dilopak kayu, iatu pengkarangan iato ditonganni tongan dikarang sia madoi’ nagaraga tau iato mai.

⁹Mekutanamokan lako mintu’ pekaamberan iato: ma’kadamokan lako tau iato mai kikua: Mindara umpa’parentanni lako kalemi umbangunni te banua iate sia ussundunni te benteng tembo’ iate?

¹⁰Sia kipekutanan duka lako tau iato mai tu sanganna tau iato mai, angki pa’peissananni lako olona puangki, iamoto angki sura’i tu sanganna mintu’ pangulunna tau iato mai.

¹¹Mebalimi tu tau iato mai lako kaleki, nakua: Kami te taunNakan Kapenombanna langi’ sola lino, sia kibangunmo sule te banua iate, tu mangka dibangun masai allomo lendu’na, tu nabangun sia napasundun misa’ datu tarompo’na to Israel.

¹²Apa iatonna mangkamo tu nene’ to doloki umpare’dek ara’Na Puang Matua dao suruga, Nasorongmi tu tau iato mai tama limanna Nebukadnezar, datu Babel, iamotu to Kasdim; iamotu datu iato tu ussanggangi te banua iate sia umpali’i tu bangsa iato lako Babel.

¹³Apa iatonna taun bunga’na kadatuanna Koresh, datu Babel, napa’parentammi datu Koresh umbangunni sule te banuanNa Puang Matua.

¹⁴Ondongpi iatu mintu’ pareanan bulaan sia salaka dio banuanNa Puang Matua tu naala Nebukadnezar lan mai Banua Kabusungan dio Yerusalem, nabaa lako banua kamenomban dio Babel, napesuan datu Koresh unnalai lan mai banua kamenomban dio Babel, napaingko’i misa’ tau disanga Sesbazar, tu naangka’mo to maraa.

¹⁵Mesuami datu lako nakua: Alai te pareanan iate, ammu patorroi lan Banua Kabusungan dio Yerusalem sia melo ke dibangunni sule tu banuanNa Puang Matua dao inanna.

¹⁶Ta’kala saemi te Sesbazar, anna otonni tu mintu’ parandangan banuanNa Puang Matua, tu unnisung lan Yerusalem, na randuk dio mai attu iato naposara’mi tau, apa tae’pa nasundun.

¹⁷Totemo iake naalai penaanna puang, melo ke diparessai lan bilik pangannanna datu iti’ Babel, ba’tu la den tonganni parenta napatassu’ datu Koresh la umbangunni sule te banuanNa Puang Matua dio Yerusalem; sia datu la umparampoi lako kaleki sola nasang tu kara’tasanna.