Read Toraja-Sa'dan EZRA 7 Bible Online

EZRA 7 - Toraja-Sa'dan bible

EZRA 7

¹Iatonna mangkamo tu mintu’ apa iato, tonna ma’parenta tu Artahsasta, datu Persia, ke’de’mi tu Ezra, anakna Seraya, anakna Azarya, anakna Hilkia,

²anakna Salum, anakna Zadok, anakna Ahitub,

³anakna Amarya, anakna Azarya, anakna Merayot,

⁴anakna Zerahya, anakna Uzi, anakna Buki,

⁵anakna Abisua, anakna Pinehas, anakna Eleazar, anakna Harun, iamo tominaa kapua —

⁶iamote tu Ezra ke’de’ dio mai Babel. Ia misa’ pandita sura’, tu manarang lan Sukaran alukna Musa, tu Napa’bengan PUANG, Kapenombanna to Israel; nabenmi datu tu mintu’ pa’poraianna, belanna narondong limanNa PUANG, Kapenombanna.

⁷Ke’de’ dukami tu ba’tu pira-pira to Israel sia tominaa, sia to Lewi, sia tomenani, sia toma’kampa babangan sia topabali-balian lan Banua Kabusungan, lako Yerusalem, tonna taun ma’pempitu kadatuanna Artahsasta.

⁸Rampomi lako Yerusalem tonna bulan ma’pellima, taun ma’pempitu kaparentanna datu.

⁹Belanna iatonna bulan bunga’na, allo bunga’na ke’de’mi dio mai Babel, anna rampo lako Yerusalem tonna allo bunga’na bulan ma’pellima, belanna narondong lima masokanNa Kapenombanna.

¹⁰Belanna napabatta’mo Ezra tu penaanna la umparessai tu Sukaran alukNa PUANG sia la unturu’i sia umpa’pangadaranni tu mintu’ apa dipondok sia atoran dio lu to Israel.

¹¹Iamote tu sura’ dipallemba’ dio mai sura’, tu napa’bengan datu Artahsasta lako Ezra, tominaa sia pandita sura’, tu matarru’ lan mintu’ pepasan sia pa’pana’ta’Na PUANG lako to Israel.

¹²Iate sura’ iate lu dio mai Artahsasta, datunna mintu’ datu lako tominaa Ezra, to matarru’ lan mintu’ Sukaran alukNa Puang Matua dao suruga, sia senga’-senga’na.

¹³Mangkamo kupatassu’ tu parenta, kumua minda-minda tu naala bilanganna to Israel lan kadatuangku sia tominaa sia to Lewi, tu malangngo’ penaanna la sule lako Yerusalem, ma’din musolan.

¹⁴Nasuako datu sola tu pitu tongkonan ada’ lompona la male umparessai tu mintu’ apa dio Yehuda sia dio Yerusalem situru’ Sukaran alukNa Kapenombammu, tu mutoe;

¹⁵sia la umbaai lako tu salaka sia bulaan, tu langngo’ inaanna datu sola tongkonan ada’ lompona umpa’benganni lako Kapenombanna to Israel, tu dio Yerusalem isunganNa,

¹⁶sia mintu’ salaka sia bulaan tu muappa’ lan mintu’ propinsi Babel sola mintu’ pamengan langngo’ inaa, tu napa’bengan bangsa iato sola mintu’ tominaa lako banuanNa Kapenombanna, tu unnisung lan Yerusalem.

¹⁷Iamoto la mukanana’i melo te doi’ iate la mupangallian sapi laki, domba laki, anak domba, sia dipangallian duka apa dipasisolanni, iamotu kande dipemalaran sia pemala’ pantedok, anna dipemalaran dao inan pemalaran lan banuanNa Kapenombammi, tu unnisung lan Yerusalem.

¹⁸Sia iatu musanganna melo sola siulu’mu la mugauranni tu salaka sia bulaan merodo, la mipogau’ to situru’ pa’poraianNa Kapenombammi.

¹⁹Apa mintu’ pareanan, tu dibenko la dipake lako Kamenomban lan banuanNa Kapenombammu, sorong nasangito lako Puang Matua dio Yerusalem.

²⁰Na iatu apa parallupa lako banuanNa Kapenombammu, tu musanga la mubaya’pa, ma’din mupatassu’ lan mai pa’rampunan doi’na kadatuan.

²¹Sia aku, datu Artahsasta, umpa’parentan dukapi lako mintu’ kapala kantoro’ doi’ dio lili’ sambalinna lu Salu, kumua iatu mintu’ apa napalaku tominaa Ezra, to matarru’ lan Sukaran alukNa Puang Matua dao suruga, lako kalemi, la mipamadomi’ umpatassu’i.

²²Iatu salaka ma’angge saratu’ talenta, gandung saratu’ koro’ uai anggoro’ saratu’ ba’, minna’ saratu’ ba’, na iatu sia tae’ nadianggean.

²³Mintu’ atoran, tu bu’tu lan mai pepasanNa Puang Matua dao suruga, manassa la dipogau’ tongan lako banuanNa Puang Matua dao suruga, kumua da narompoi kasengkeanNa Puang tu kadatuanna datu sia mintu’ anakna muane.

²⁴Sia kupokada duka lako kalemi tu diona mintu’ tominaa sia mintu’ to Lewi, sia tomenani, sia toma’kampa babangan sia topabali-balian lan Banua Kabusungan sia mintu’ toma’paraka lan banuanNa Puang Matua kumua tae’ nama’din miparuai sima, sassung ba’tu sima balukan.

²⁵Na iko, e Ezra, sitinaya tu kakinaanNa Kapenombammu dio kalemu, angka’i tu toma’parenta sia toma’paolai salu, anna paolai salu tu mintu’ tau, tu torro dio lili’ sambalinna lu Salu, tu mintu’ to untandai Sukaran alukNa Kapenombammu; sia iatu mai to tae’ natandai, la mupokadan.

²⁶Minda-minda tae’ naturu’i tu Sukaran alukNa Kapenombammu sia parentana datu, la dipapatui tongan ukunganna: ba’tu dipatei, ba’tu dipali’i, ba’tu didosai, ba’tu ditarungkui.

²⁷Mintu’ kadipudian lu lako PUANG, Kapenombanna nene’ to dolota, tu mangka umpatiakka’ penaanna datu la umpakala’bi’ banuanNa PUANG, tu unnisung dio Yerusalem,

²⁸sia umpatiakka’ penaanna datu, sia mintu’ tongkonan ada’ lompona sia mintu’ arung tarompo’na datu, anna katuru-turuina’! Iamoto angku pabatta’ penaangku belanna kamatotoranNa PUANG, Kapenombangku, urrondongna’, angku rampunni tu mintu’ pangulunna to Israel angku ke’de’ sola.