Read Toraja-Sa'dan NEHEMIA 1 Bible Online

NEHEMIA 1 - Toraja-Sa'dan bible

NEHEMIA 1

¹Inde sia tu tuna’na Nehemia, anakna Hakhalya. Iatonna bulan Kislew, taun ma’penduangpulo, tongku lan tambakuku Susan,

²saemi lako kaleku tu Hanani, misa’i siulu’ku sola ba’tu pira-pira tau dio mai Yehuda. Kupekutanammi lako tau iato mai tu diona to Yahudi, tu tilendokmo, iamotu torronapa dio mai mintu’ to dipali’, sia diona duka Yerusalem.

³Ma’kadami tu tau iato mai lako kaleku nakua: Iatu mintu’ to torropa, iamotu torronapa dio mai to dipali’, tu lan propinsi iato, lan kamandasan kapua sia kadibelleran, sia iatu rinding tembo’ Yerusalem ro’pokmo, na iatu babanganna pura diballa api.

⁴Iatongku rangii te mintu’ kada iate, unno’ko’mo’ tumangi’ sia ma’pote dibolong ba’tu pirang-pirang allo. Ma’puasa dukamo’ sia massambayang dio oloNa Puang Matua dao suruga,

⁵kukua: O PUANG, Puang Matua dao suruga, o Puang Matua pasareongan sia dikabangnga’, tu ungkanana’i basse sia kamasokanan lako tu mintu’ tau ungkamali’Komi sia ungkaritutui pepasanMi.

⁶La Mitanding talinga sia la Mibidaran tu matamMi la umperangii passambayangna taumMi, tu kupennoloan lako Kalemi keallo sia kebongi diona to Israel, taumMi; kupangakuammo tu kasalanna to Israel, tu kipogau’ umbaliKomi; ia duka tu aku sia sangdadiangku umpogau’ nasangmokanni kasalan.

⁷Kadake tongan tu gau’ki lako Kalemi, belanna tae’mo kikaritutui tu pepasanMi, apa Mipondok sia atoramMi, tu Mipasan lako Musa, taumMi.

⁸Kilalai tu kada Mipokadan Musa, taumMi, nakua: Iake umpokakomi kamarurusan, manassa la Kupatisambo’komi dio lu mintu’ bangsa.

⁹Apa iake mengkatoba’komi lako Kaleku sia iake mikaritutui tonganni tu pepasanKu — moi ammi den diula’i sae lako randan langi’, manassa la Kurampun tu tau iato mai inde to dio mai angKu solanni lako inan tu mangka Kupilei la Kunii umpaunnisung sangangKu.

¹⁰Tonganna tau iato mai taumMi sia bangsaMi, tu mirampanan tete dio kamatotoran kapuaMi sia lima mawatangMi.

¹¹O PUANG, tananni talingamMi tu passambayangna taumMi sia iatu passambayangna mintu’ taumMi, tu parannu penaanna ungkabangnga’ sangamMi, sia pamaupa’i tu taumMi allo iate, dennoupa’ nalolongan kamamasean dio olona tau iate. Belanna iate aku te pangulu to ma’pairu’na datu.